Կրեմլի առաջարկն ու Սերժ Սարգսյանի ակնարկը

Այսպիսով Ռուսաստանի  արտգործնախարար Սերգեյ Լովրովի այցն այլևս այնքան պատմական չէ, որքան ենթադրում էինք, որ կարող է լինել: Պարզվեց, որ Լավրովն, այնուամենայնիվ,  Ղարաբաղի հարցով պայմանագրի  որևէ  տեքստ չէր բերել Կրեմլից  կամ էլ, եթե բերել էր այն չընդունվեց: Լավրովի հետ հանդիպման ժամանակ   Հայաստանի նախագահը, անդրադառնալով  Արցախում Ադրբեջանի կողմից սանձազերծված  ապրիլյան քառօրյա  պատերազմին,   հայտարարել է, որ սկսելով լայնամաշտաբ ռազմական գործողություններ Լեռնային Ղարաբաղի դեմ՝ Ադրբեջանը ևս մեկ անգամ ապացուցեց, որ Ղարաբաղը Ադրբեջանի հետ ոչ մի ընդհանուր բան չի կարող ունենալ. <<Ինը տարվա ընթացքում մենք այդ գործընթացի ակտիվ վկան ու մասնակիցն ենք եղել, փորձել ենք գտնել փոխընդունելի որոշումներ, լինել կառուցողական: Մենք համոզված ենք եղել, որ իսկապես այդ հարցը կարող է լուծվել բացառապես փոխզիջումների հիման վրա, խաղաղ ճանապարհով, բայց այսօր մենք ունենք այն, ինչ ունենք: Դրա համար էլ ինձ համար չափազանց կարևոր է Ձեր տեսակետը՝ ինչո՞ւ, այնուամենայնիվ, դա պատահեց: Իհարկե, մենք մեր պատկերացումն ունենք, բայց Դուք շատ ավելի եք տեղեկացված, այդ իսկ պատճառով շնորհակալ կլինենք, եթե Դուք ներկայացնեք Ձեր պատկերացումը>>,-ասել է Նախագահ Սերժ Սարգսյանը: Սերժ Սարգսյանի տված հարցին, Լավրովի պատասխանն ավելի քան խորհրդանշական է. <<Ինչո՞ւ իրավիճակը հայտնվեց նման ճգնաժամային կետում, ես չեմ կարող որոշել Հայաստանի, Ադրբեջանի կամ ղարաբաղցիների փոխարեն, բայց ես կարծում եմ, որ եթե մեզ հաջողվեր քաղաքական գործընթացում առաջ շարժվել, թեկուզ մի փոքր, եթե մենք թեկուզ նախանշեինք ընդհանուր սկզբունքներ, որոնք կողմերը գոնե հիմք կընդունեին արդեն իրավականորեն պարտավորեցնող փաստաթղթերի մշակման, նախապատրաստման համար, իհարկե, դա ոչ միայն կարևոր դեր կխաղար բանակցությունների վերսկսման համար, այլ նաև զսպող գործոն կհանդիսանար բռնության բռնկումներ թույլ չտալու համար: Բայց, կրկնում եմ, լուծման կարող են հասնել միայն իրենք՝ կողմերը>>: Լավրովի խոսքով՝ առաջին իսկ րոպեներից ռուսական կողմը՝ անձամբ Նախագահը, ձգտել են կասեցնել այն համաձայնագրերի խախտումները, որոնք ստորագրվել են 94-95թթ. և ունեն անժամկետ բնույթ և  կոչ են  արել ոչ մի ձևով կասկածի տակ չդնել այդ կարևորագույն փաստաթղթերը: Մինչն այդ  Հայաստանի արտաքին գործերի նախարարի հետ համատեղ ասուլսում ևս  Լովրովը, հայտարարել էր, որ Ռուսաստանը, իբրև  բանակցային գործընթացի ակտիվ մասնակից և Միսկի խմբի համանախագահող երկիր, գտնում է, որ  կողմերի  համար այս փուլում շատ կարևոր է պահպանել 1994-1995 թվականի հրադադարի  պայմանագիրը, որն անժամկետ փաստաթուղթ է: Սա փաստացի նշնակում է, որ  Կերմլն առաջարկում է առայժմ առաջնորդվել ստատուս քվոյով: Ինչպես հայտնի  է՝ Ղարաբաղի հարցի կարգավորման երեք հիմնական տարբերակ կա, որոնք  շրջանառության մեջ էին դրված դեռևս Լևոն Տեր-Պետրոսյանի կողմից.

1. 1. Փաթեթային տարբերակ.
2. 2. Փուլային տարբերակ.
3. 3. Ստատուս-քվոյի պահպանում։