Ում եւ ինչպես է «ֆռռացնում» ժողովրդի վարչապետը

Ինչպես հայտնի է, կառավարությունը որոշել է 30 միլիոն դրամ հատկացնել 2008թ. մարտի 1–ի բախումների ժամանակ սպանվածների իրավահաջորդներին։ Ծանր վիրավորները կստանան 15 միլիոն դրամ, իսկ վիրավորները՝ 5 միլիոն դրամ։ Մենք մի անգամ անդրադարձել ենք այս խնդրին, բազում հարցադրումներ հնչեցրել՝ ինչու միայն մարտյան իրադարձությունների դեպքով, ինչու այդքան գումար եւ այլն։ Գրել էինք նաեւ, որ սա բարոյական չէ առնվազն հայրենիքի պաշտպանության համար զոհվածների դեպքում, որոնց համար անհամեմատ ցածր փոխհատուցման չափ ու պայման է գործում։

Իհարկե, խնդիրն այստեղ գումարի չափը չէ, ի վերջո, մարդկային կյանքը գին չունի եւ ցանկացած դեպքում լինելու է անհամարժեք։ Բայց կա հարցի բարոյական կողմ՝ ինչու մի հատվածին այսպիսի խոշոր գումար է տրամադրվում, մյուսներին՝ ոչ։
Եւ այս պարագայում խիստ տրամաբանական էր, որ բնական ռեակցիա է առաջացնելու ռազմական գործողությունների ժամանակ զոհվածների հարազատների ու հանրության լայն շրջանակների մոտ։

Եւ ահա, այսօր զոհերի հարազատները բողոքի ակցիա են կազմակերպել կառավարության շենքի առջեւ եւ պահանջում են արդարացի մոտեցում։
«Ինչպե՞ս կարելի է Երևանի օպերայի շենքից մինչև Լեո փողոց գնացածին, մարտի մեկին անկարգություն անողներին, խանութ թալանողներին ու ոստիկանների վրա հարձակվողներին ավելի արժևորել, քան սահմանը պահելիս կամ պատերազմին մասնակցելիս զոհվածին»,–հայտարարում էին զոհերի հարազատները։

Կառավարությունում փակել էին դուռն ու զոհվածների հարազատներին տեւական ժամանակ չէին ընդունում, բայց ի վերջո, հասկացան, որ ալիքը մեծանում է ու վարչապետ Փաշինյանն իջավ ցուցարարների մոտ։ Բայց լուծումներ առաջարկելու, վրդովված հանրության հետ երկխոսելու փոխարեն նա անցավ մանիպուլացիաների։

Մասնավորապես հարձակվեց գեներալի նախկին օգնական Մեսրոպ Մանուկյանի վրա, ով 1000 դրամների հոգաբարձուների խորհրդի անդամ է եւ ի պաշտոնե մասնակցում է հավաքին։ Երբ նա մոտեցավ ու փորձում էր ներկայացնել որդեկորույս մայրերի պահանջը, Փաշինյանը նախ ճշտեց, թե ինքն արդյոք գեներալ Մանվելի օգնականը չէ, ապա ասաց ՝ինչու նախորդ տարիներին Մանվել Գրիգորյանի ունեցվածքը չեն վաճառել օգնելու զոհված զինծառայողների հարազատներին:

Իշխանական շրջանակները հայտնի կենդանու հրճվանքով տարածում են Փաշինյանի եւ օգնականի այս երկխոսությունը՝ փորձելով հաղթած դուրս գալ այս մարտից, բայց իրականում սա մանր մանիպուլացիա է։

Ի վերջո, մեկ տարուց ավել է Մանվել Գրիգորյանը իշխանության ձեռքերում է ու փոխարենը այդ մարդուն գերեզման տանելը, Նիկոլ Փաշինյանի իշխանությունն ունի այն լայն հնարավորությունը դատավարությունն ավարտին հասցնելու ,եթե գեներալը յուրացրել է պետական եւ ոչ պետական միջոցներ, դա վերադարձրեք ժողովրդին ու հենց այս մայրերին, այլ ոչ նման պահանջ ներկայացրեք նրա օգնականին, որը չունի նման հնարավորություն եւ լիազորություն։

Անի Սահակյան