«Կհանդիպենք՝ կռվի դաշտում». Բաքվից արդեն սպառնում են Փաշինյանին

Ադրբեջանի Պաշտպանության նախարար Զաքիր Հասանովը մեկնաբանել է Հայաստանի Հանրապետության վարչապետ Նիկոլ Փաշինյանի՝ «Արցախը Հայաստան է և վերջ» հայտարարությունը: Ադրբեջանցի Պնախարարը հանդես է եկել ռազմատենչ սպառնալիքներով:

«Մենք մեր խոսքը կասենք կռվի դաշտում, երազում ենք այդ մասին: Եվ դա կկատարվի ժամանակներս: Այդ ժամանակ կտեսնենք՝ նա պատասխան տալի՞ս է իր խոսքերի համար, թե ոչ: Կարծում եմ մեր ԱԳՆ-ն արժանապատիվ պատասխան է տվել»,- ասել է Ադրբեջանի ՊՆ նախարարը: Ըստ ադրբեջանական ԶԼՄ-ների՝ Հասանովը նման հայտարարությամբ հանդես է եկել Real TV հեռուստաալիքին տված հարցազրույցի ժամանակ:

Զաքիր Հասանովը նաև հիշատակել է 2016թ. քառօրյա պատերազմը՝ ասելով, որ Հայաստանը օգնություն խնդրեց Ռուսաստանից: «Չեմ կարծում, որ նրանց հովանավորները երկրորդ անգամ օգնության ձեռք մեկնեն»,-հավելել է նա: Նա նաև հավելել է, թե Հայաստանը՝ «միայն դատարկ խոսում է, քանի Երևանը մինչև հիմա չի ճանաչել ԼՂՀ անկախությունը»:

Այսպես ասած՝ հերթը հասավ Ադրբեջանի պաշտպանության նախարարին, որը որոշեց մեծ ուշացով Փաշինյանին սպառնալ, մոտավորապես այս տոնայնությամբ՝ «կտեսնենք, թե ով է ձեզ օգնելու նոր պատերազմի դեպքում»:

Այսինքն, հնարավոր առաջիկա պատերազմից առաջ պաշտոնական Բաքուն սպառնալից հայտարարություններով փորձում է «սթափեցնել» Փաշինյանին:

Սա, սակայն միայն Փաշինյանին ուղղված ուղերձ չէ. պատերազմի սպառնալիքը նաև միջազգային հանրությանն է ուղղված: Բաքուն դրանով փորձ է անում հասկացնել միջազգային հանրությանը, որ, եթե պատերազմ հրահրեն, դրա պատճառը Փաշինյանի դիրքորոշումն է:

Այլ կերպ ասած՝ Ալիևը միջազգային հանրությունից պատերազմ սկսելու քարտ-բլանշ է խնդրում:

Թամար Բագրատունի