Ում մահն է գուժում ուժայինների հրաժարականը. Նիկոլ Փաշինյանի պլան Բ-ն

 Ազգային Անվտանգության ծառայության պետի հրաժարականով մեկնարկած ուժայինների հրաժարականի շքերթը ցույց է տալիս, որ Նիկոլ Փաշինյանը անցնում է թավշյա հեղափոխության կոշտ փուլին:

Վանեցյանից ու Օսիպյանից հետո պաշտոնին, ըստ ամենայնի հրաժեշտ կտա նաև պաշտպանության նախարար Դավիթ Տոնոյանը: Նա լրագրողների հետ զրույցում հավանական է համարել, որ ինքը ևս վարչապետի կողմից պաշտոնանկ կարվի: Պատասխանելով հարցին, թե դրա համար ինչ հիմքեր կամ պատճառներ կան, Տոնոյանը նշել է, որ վարչապետն ունի նման լիազորություն, սակայն աշխատանքով պայմանավորված` որևէ հիմք կամ պատճառ չկա:

Իրականում դժվար է պնդել, թե կառավարության ամենավատ աշխատող հատվածը ուժայինների բլոկն էր: Սա ավելի շատ քաղաքական որոշում է, որով վարչապետ Նիկոլ Փաշինյանը սեփական դիրքերն ավելի է ամրապնդում` իր իշխանությունը դարձնելով ավելի ամուր: Ուժային համակարգերում յուրայիններին բերելուց հետո նա հանգիստ կարող է անցնել հեղափոխության պլան Բ-ին: Սրանք թերևս այն քայլերն են, որի մասին հեղափոխականների ծայրահեղական հատվածը վաղուց էր խոսում: Դա առաջին հերթին կապիտալի վերաբաշխումը և դատական համակարգի վերջնական սեփակաշնորհումն է: Հեղափոխությունից հասարակության պառակտվածությունը վերացնելու, հանրային երկխոսության ճանապարհով գնալու փոխարեն` Փաշինյանը որոշել է իրադարձությունները զարգացնել առավել կտրուկ գործողություններով, իսկ նման ռազմավարության դեպքում ուժայինների հավատարմությունն ու խիստ վերահսկելիությունը անհրաժեշտություն է:
Թերևս այս առումով Փաշինյանը ունեցել է որոշակի մտավախություններ առ այն, որ իր ոչ բոլոր հրահանգները կարող են անշեղորեն կատարվել:
Բայց ամեն դեպքում այստեղ մի շատ կարևոր խնդիր կա, որի հետ Փաշինյանը այսպես թե այնպես հաշվի է նստելու:
Համակարգի, հատկապես ուժային համակարգերի փոփոխությունը միայն առաջին դեմքով չի կարող պայմանավորվել: Համակարգն ունի իր կանոնները, համակարգը ամեն դեպքում աշխատում է օրենքներով, և այդ ընդունված շրջանակներից համակարգի պրոֆեսիոնալները չեն կարող շեղվել: Ամենաբարձր հրահանգն անգամ հնարավոր է ի կատար ածել, եթե օրենքը այլ բան է նախատեսում: Եթե հիշում եք, Արթուր Վանեցյանի և Սասուն Խաչատրյանի հայտնի գաղտնալսման մեջ Վանեցյանը անընդհատ ասում էր, որ Խաչատուրովին չեն կալանավորել, որովհետև նա ՀԱՊԿ-ի նախագահն է: Այսինքն` սա հենց այդ դեպքն էր, որ կար հրահանգ, որը ենթակա չէր կատարման: Նման խնդիրները բազմաիթվ են, և համակարգի մարդիկ, եթե անգամ նրանք այսօր յուրային են ընկալվում, միևնույնն է, օրենքի հետ համատեղելիության հարցեր Փաշինյանի առաջ դնելու են:

Հայկ Դավթյան