Ո՞րն է Լեւոն Հայրապետյանի նկատմամբ դատավճռի իրական նպատակը

Ռուսաստանի Դաշնության Զամոսկվորեչյան դատարանը օրեր առաջ հրապարակեց հայտնի գործարար եւ բարերար Լեւոն Հայրապետյանի նկատմամբ դատավճիռը՝ մեղադրելով նրան ՌԴ Քրեական օրենսգրքի 159 հոդվածի 4-րդ կետով եւ դատապարտելով 4 տարվա ազատազրկման: Հիշեցնենք, որ Հայրապետյանը «Բաշնեֆտ» ընկերության սեփականաշնորհման հետ կապված մութ պատմությունների մեջ էր, երկար ժամանակ տնային կալանքի տակ գտնվեց, վերջում  մեղադրվեց խարդախության մեջ: Ըստ դատավճռի՝ Հայրապետյանը Բաշկիրիայի նախկին սենատոր Իզմեստևի մորից 800 հազար դոլար էր վերցրել, որպեսզի նրա համար մեղմ վճիռ «դասավորի», այնինչ Իզմեստևին դատապարտեցին ցմահ ազատազրկման, իսկ 800 հազարը  Հայրապետյանը, ըստ դատավճռի, յուրացրել է: Այն, որ Ռուսաստանը կոռումպացված երկիր է ու Լեւոն Հայրապետյանը ոչ առաջին, եւ ոչ էլ վերջինն է ճանաչված մեծահարուստներից, որը ներգրավված է լինելու խարդախության գործում, դրանում կարող է ոչ ոք չկասկածել, սակայն որպես կանոն ինչպես Հայաստանում, Ռուսաստանում նույնպես քրեորեն հետապնդվում են միայն քաղաքական դրդապատճառներով: Օրինակ Միխայիլ Խոդորկովսկին, որին 10 տարի անազատության մեջ պահեցին: Ինչ խոսք, Հայրապետյանը ակնհայտ խնդիրներ ունի օրենքի հետ, բայց մեծ ցանկության դեպքում Հայաստանի ռազմավարական դաշնակից Ռուսաստանի իրավապահ համակարգը ասենք կարող էր հաշվի առել վերջինիս տարիքը, առողջական լրջագույն խնդիրները և մշտական խնամքի կարիք ունեցող տարեց մարդուն չբանտարկել  գերբեռնված մի բանտախցում, որտեղ բացակայում են կեցության տարրական պայմանները:  Հայրապետյանի քրեական գործն, անշուշտ, ունի իր քաղաքական պատճառը: Ծնունդով ղարաբաղցի Լևոն Հայրապետյանը Հայաստանում, մասնավորապես՝ Լեռնային Ղարաբաղում, հայտնի է՝ որպես բազմաթիվ խոշոր բարեգործական, ընկերային, տնտեսական նախագծերի հեղինակ, և իր հայրենի երկրամասի զարգացմանը նպաստող շատ ծրագրեր դեռ ուներ: Տարբեր տվյալներով և հաշվարկներով՝ Ղարաբաղում Գանձասարի և իր հարազատ Վանք գյուղի վրա Հայրապետյանը ծախսել է մոտ 70 միլիոն ամերիկյան դոլար, նա Արցախում նպատակ ուներ տարածաշրջանում եզակի ռազմական ուսումնական կենտրոն կառուցել: Ի դեպ, հետաքրքիր զուգատիպությամբ նրա նկատմամբ դատավճիռը կայացվեց այն օրերին, երբ Լեւոն Հայրապետյանն ապրիլյան պատերազմական օրերին հայտարարեց, որ Արցախի իր հյուրանոցն անվճար կտրամադրի սահմանային համայնքների տարհանված բնակիչներին: Պատահական չէ նաեւ, որ Արցախի խորհրդարանի խմբակցությունները ի պաշտպանություն Հայրապետյանի հայտարարությամբ են քիչ առաջ հանդես եկել, Ռուսաստանին հիշեցնելով նաեւ, որ նրա գործունեության մեջ կարեւոր տեղ է զբաղեցրել նաեւ հայ-ռուսական բարեկամական կապերի ամրապնդումը: <<Հաշվի առնելով Լեւոն Հայրապետյանի օրեցօր վատթարացող առողջական վիճակը՝ ԼՂՀ ԱԺ պատգամավորական խմբակցությունները Ռուսաստանի Դաշնության իրավապահ մարմիններին հորդորում են մարդասիրական վերաբերմունքից ելնելով գործող օրենսդրության շրջանակներում վերանայել կալանքի պայմանները, օբյեկտիվ վերաքննությամբ էապես մեղմել սահմանված պատիժը եւ  ազատ արձակել նրան>> կոչ են արել Արցախի պատգամավորները: Օրերս էլ ի պաշտպանություն նրա ռուսաստանյան իշխանություններին կոչ հղեց հանրահայտ շանսոնիե Շառլ Ազնավուրը: Ըստ ամենայնի՝ Ռուսաստանի իրավապահ համակարգը Հայրապետյանին այս պահին, երբ Ռուսաստանը տարածաշրջանում ակտիվ վերադասավորումների գործընթացի մեջ է, կալանքի տակ  վերցրեց նախեւառաջ մեկ անգամ եւս ընդգծելու  իր ազդեցությունը Հայաստանի վրա եւ հասկացնելու, թե ուր կարող է հասցնել մեր անհնազանդությունը: Անի Սահակյան