Քաոս իշխանության ներսում, ինչ վճիռ է լինելու Քոչարյանի գործով

Ազգային Ժողովի նախագահ Արարատ Միրզոյանը սեպտեմբերի 16-ին խորհրդարանում արտահերթ ելույթով անդրադարձել է Սահմանադրական դատարանի խնդրին։Անդրադառնալով ՍԴ ինքնավարությանն ու քաղաքական ազդեցության գործոնին՝ Արարատ Միրզոյանն ասել է, որ 2018 թվականի ապրիլին ուժի մեջ մտած սահմանադրական կարգավորումներով ՍԴ դատավորներին ՍԴ նախագահ ընտրելու իրավունք է վերապահվել: Մինչդեռ, ըստ նրա, այդ կարգավորումների՝ ուժի մեջ մտնելուց օրեր առաջ՝ 2018 թվականի մարտի 23-ին, ՍԴ անդամ, իսկ մինչ այդ պաշտոնում ընտրվելը, ՀՀԿ անդամ, ԱԺ քաղաքական մեծամասնության ՀՀԿ խմբակցության անդամ, քաղաքական գործիչ Հրայր Թովմասյանի՝ ՍԴ նախագահ նշանակվելու փաստը, ինչպես նաև այդ փաստի բերումով այս պաշտոնում Հրայր Թովմասյանի՝ մինչև 2035 թվականը նախատեսվող պաշտոնավարումը ըստ էթության ՍԴ դատավորներին դատարանի նախագահ ընտրելու հնարավորությունից զրկել է: Սա հանրության կողմից մեկնաբանվել է որպես իշխող քաղաքական կուսակցության կողմից կամայականություն՝ ուղղված իր ներկայացուցչին ՍԴ նախագահի պաշտոնում նշանակելուն, ինչպես նաև ոտնձգություն ՍԴ ինքնավավարության դեմ:
«Ես կարծում եմ, որ ՀՀ ԱԺ-ն՝ որպես ՀՀ ժողովրդի օրինական և լեգիտիմ ներկայացուցիչ և առանջային մանդատով օժտված միակ քաղաքական ինստիտուտ, սահմանադրությամբ իրեն վերապահված լիազորությունների շրջանակներում իր դիրքորոշումը պիտի արտահայտի վերը նկարագրած խնդիրների և իրավիճակի կապակցությամբ»։ Սակայն, ելույթում, միանշանակ ուշագրավ հատվածը
Ռոբերտ Քոչարյանի խափանման միջոցի վերաբերյալ ՍԴ հայտնի որոշման առիթով էր, ԱԺ նախագահն այն համարել է ոչ լեգիտիմ: Նախ հետաքրքիր է՝ ինչու է ԱԺ խոսնակը հիմա անդրադառնում ՍԴ-ի շուրջ ստեղծված իրավիճակին, երբ ՍԴ իրենց «սրտի» դատավոր Վահե Գրիգորյանն ամիսներ առաջ է ԱԺ-ին հայտնի նամակը հասցեագրել , որպեսզի լուծումներ առաջարկեն։

Արարատ Միրզոյանի ելույթից պարզ է դառնում, որ կառույցը լուծումներ չունի ու ինչպես մի քանի օր առաջ Միրզոյանը զարմանում էր այն լրագրողների վրա, որոնք հետաքրքրվում էին՝ ինչպես է լուծվելու ՍԴ-ի հարցը։ Միրզոյանն ասում էր, որ չեն կարող ՍԴ դատավորներին բռնի կերպով հանել, ասում էր որ իրավական ճանապարհներ պետք է մտածել։ Այսօրվա ելույթում նա կրկին բաց է թողնում այդ ճանապարհների հարցը, փոխարենը ակնհայտ է, որ իշխանությունն իրեն ապահովագրում է Ռոբերտ Քոչարյանի գործով հնարավոր զարգացումներից առաջ։

Մամուլում տեղեկություններ կան, որ վաղը՝ սեպտեմբերի 17-ին Քոչարյանին ազատ կարձակեն։ Իրավական հիմնազրկությունը մի կողմից, Պուտինի ճնշումը մյուս կողմից, իշխանությունն այլեւս իզորու չէ դիմադրել։ ՍԴ-ն որոշումը կայացրել եւ հրապարակել է մի քանի օր առաջ, այդ կապակցությամբ հնչել են բազմաթիվ գնահատականներ ու մեկնաբանություններ: Այդ ընթացքում թե ԱԺ նախագահը, թե խորհրդարանական մեծամասնությունն խուսափել են կարծիք հայտնել։

Եվ հանկարծ, սեպտեմբերի 16-ին ԱԺ նախագահ Միրզոյանը կասկածի տակ է դնում որոշման լեգիտիմությունը:

Դատարանի որոշման հրապարակման նախօրեին ՍԴ հասցեին ԱԺ նախագահի կոշտ ելույթը եւ ՍԴ որոշումը ոչ լեգիտիմ հայտարարելը միայն մեկ մեկնաբանություն ունի՝ այդ ամենը վերագրել ՍԴ-ին ։

Անի Սահակյան