Նիկոլ Փաշինյանն անարգանքի սյունին է գամել քաղհասարակության անդամներին

Վարչապետ Նիկոլ Փաշինյանը հանդիպում է ունեցել քաղաքացիական հասարակության ներկայացուցիչների հետ, որոնք ներկայացնում էին մի քանի տասնյակ հասարակական կազմակերպություններ:

Հանդիպումն անցկացվել է «Մարդու իրավունքների խթանում և պաշտպանություն» ծրագրի շրջանակում: Վարչապետի աշխատակազմի տեղեկատվության եւ հասարակայնության հետ կապերի վարչության փոխանցմամբ` հանադիպման ընթացքում Նիկոլ Փաշինյանը խոսել է ժողովրդավարության և մարդու իրավունքների մասին` մասնավորապես նշելով.
«Երբեմն կարող ենք արձանագրել, որ ժողովրդավարությունն ունի նաև այսպիսի հատկություն, որ դրա պայմաններում նրանք, ովքեր դրանից առաջ էլ լռեցնում էին ուրիշներին, հիմա նույնպես երբեմն ավելի շատ հնարավորություններ են ունենում լռեցնել ուրիշներին: Սա թերևս ամենակարևոր դիլեման է, որ գոյություն ունի ժողովրդավարական երկրներում կամ, համենայն դեպս, Հայաստանի նման ժողովրդավարական երկրներում, որոնք դեռևս հիմնական հասկացություններ ճշտելու և ճշգրտելու անհրաժեշտություն ունեն: Մասնավորապես ոչ միշտ, բայց երբեմն որոշ դրվագներում կարող է պարզվել, որ պարզաբանման կարիք ունի, թե ինչ է նշանակում մարդու իրավունք, երբեմն կարող է անհրաժեշտ լինել պարզաբանել, թե ո՞վ է մարդը, ով կարող է օգտվել իրավունքից, երբեմն կարող է անհրաժեշտություն լինել պարզաբանել, թե արդյոք ոմանք ավելի կամ պակաս մարդ են և այսպես շարունակ»:
Իրավապաշտպան Վահան Իշխանյանը Փաշինյանի այս տողերը ֆաշիստական է որակել: Եվ իսկապես, ներողություն, այսինքն` ի՞նչ է նշանակում` պարզաբանել, թե ով է մարդը, ով կարող է օգտվել իրավունքից: Փաստորեն ՀՀ հպարտ քաղաքացիները, այսօր արդեն պետք է հստակեցնեն` իրենք մարդ են, ունեն իրավունք, թե ոչ: Եվ այս մասին ասում է ոչ ավել-ոչ պակաս` հպարտ քաղաքացիների սրտի վարչապետը: Նա, ով մեկուկես տարի առաջ քաղաքացիների իրավունքների և անսահման իշխանության մասին կոկորդ պատռելով, վերցրեց իշխանությունը: Հայ ժողովուրդը անարյուն հեղափոխություն արեց, իշխանություն վերցրեց` առանց զենքի, բացառապես ժողովրդական ընդվզման ճանապարհով, բայց արի ու տես, որ հեղափոխության առաջնորդն անգամ այսքանից հետո համոզմունք ունի, թե Հայաստանը դեռ պետք է ճշգրտի, թե ինչ է ժողովրդավարությունն ու մարդու իրավունքները, կամ ով է մեզնից ավելի կամ պակաս մարդ: Հետաքրքիր է` Նիկոլ Փաշինյանի մտքի գոհարները ուշադիր լսող քաղհասարակության ներկայացուցիչներն այս պահին իրենց ո՞վ էին զգում` մա՞րդ, թե՞ պակաս մարդ: Ըստ էության Նիկոլ Փաշինյանի մոտ արդեն արթնացել է աստվածության կամ կիսաստվածության սինդրոմը. եթե ինքը մարդկանց բաժանում է պակաս և ոչ պակաս մարդկանց, կնշանակի` ինքը առնվազն Աստված է կամ էլ գոնե կիսաստված, որովհետև մարդիկ իրենց նմաններին պակաս կամ ավել չեն դասում: Խորհրդանշական է, որ նա այս մասին խոսել է քաղհասարակության ներկայացուցիչների մոտ` անարգանքի սյունին գամելով նրանց բոլորին:

Հայկ  Դավթյան