Պուտինի ծանր «ռումբը» Փաշինյանի գրպանում
Վլադիմիր Պուտինի այցին Երևան պետք է սպասել, այսօր լրագրողների հետ զրույցում ասել է Հայաստանում Ռուսաստանի դեսպան Սերգեյ Կոպիրկինը։
Հարցին՝ կգա՞ Պուտինը Հայաստան, դեսպանը պատասխանեց. «Դուք այլ ինֆորմացիա ունե՞ք, ես չունեմ»։
Ռուսաստանի դեսպանն, այնուհետև, հիշեցրել է ՀՀ ԱԳ փոխնախարարի խոսքերը՝ ԵԱՏՄ Բարձրագույն խորհրդի անցկացումը Երևանում համատեղ որոշման արդյունք է։ «Ես այլ տեղեկատվության չեմ տիրապետում», -նշել է Կոպրիրկինը։ «Մենք ելնում ենք նրանից, որ հոկտեմբերի 1-ին Երևանում Եվրասիական տնտեսական խորհրդի բարձրագույն նիստ տեղի կունենա», լրագրողների հետ զրույցում ասել է ՀՀ-ում ՌԴ դեսպան Սերգեյ Կոպիրկինը՝ պատասխանելով այն հարցին, թե արդյոք ՌԴ նախագահ Վլադիմիր Պուտինը հոկտեմբերին Երևան կայցելի:
Ռուսաստանի նախագահ Վլադիմիր Պուտինի այցի վերաբերյալ վերջերս տարբեր քննարկումներ ծավալվեցին այն մասին, թե Պուտինը հնարավոր է Հայաստան չգա։ Դա կապվում էր Հայաստանում Ռոբերտ Քոչարյանի անազատության մեջ գտնվելու փաստի հետ։ Ավելին՝ խոսք էր գնում այն մասին, որ անգամ ԵԱՏՄ-ական հավաքը կարող է տեղափոխվել Մոսկվա։
Այժմ, Հայաստանում ՌԴ դեսպանի խոսքերից կարելի է հասկանալ, որ Պուտինի այցը Հայաստան, թեև չի բացառվում, այնուամենայնիվ, ռուսական կողմը շարունակում է ինտրիգը պահել: Դեսպանը որոշակի տեղ է թողել մանևրելու, ինչը վկայում է այն մասին, որ ժամերի ընթացքում կարող է որոշում փոխվել:
Իհարկե, Նիկոլ Փաշինյանը Պուտինի հնարավոր այցը կդարձնի իր իշխանության քաղաքական աջակցության ակցիայի ցուցադրություն։ Սակայն, պետք է հասկանալ, որ եթե Պուտինը գալիս է՝ ապա Հայաստանի իշխանությունները պետք է պատրաստ լինեն լսել կոնկրետ հայ-ռուսական հարաբերությունների առնչությամբ ռուսական կողմի պատկերացումները։
Իսկ հայկական իշխանության օրակարգում ինչ թեմաներ կան՝ գազի գնի, հայ վարորդների իրավունքները՝ Ռուսաստանում, ռուսական զենքի թեմա և այլն։ Ի՞նչ օրակարգ ունի ՀՀ իշխանությունը Պուտինի հետ բանակցություններում...
Ի դեպ, ՀՀ-ում դեսպանն այլ թեմաների էլ է անդրադարձել։ Կոպիրկինը նկատել է, որ Հայաստանի նախկին պատգամավոր Միհրան Պողոսյանի` Ռուսաստանում ապաստան ստանալու մասին տեղեկություն չունի։ «Իսկ ի՞նչ է` Պողոսյանը քաղաքական ապաստա՞ն է ստացել։ Եթե մարդը Ռուսաստանում է գտնվում, դա չի նշանակում, որ նա քաղաքական ապաստան է ստացել։ Ինչ վերաբերում է Պողոսյանին, ապա, իմ տեղեկություններով` խոսքը անհրաժեշտ փաստաթղթերի (արտահանձնման վերաբերյալ) տրամադրման իրավական ընթացակարգի մասին է»,– նշել է Կոպիրկինը։
Հիշեցնենք, որ Ռուսաստանի տարածքում են նաև ՀՀ պաշտպանության նախկին նախարար Միքայել Հարությունյանը, ինչպես նաև մարտի 1-ի գործով քննչական խմբի նախկին ղեկավար Վահագն Հարությունյանը։ Նրանց նկատմամբ Հայաստանում հետախուզում է հայտարարված։
Ռուսաստանի դեսպանը հավելել է, որ Ռուսաստանում նրանց հայկական արդարադատությունից թաքցնելու որևէ միտում չկա և «նոր իշխանություններին որևէ մեսիջ ևս չկա»․ «Ռուսաստանի մեսիջը Հայաստանի իշխանություններին շատ հստակ է. Հայաստանն ու Ռուսաստանը ռազմավարական դաշնակիցներ են, եղբայրական երկրներ, եղբայրական ժողովուրդներ։ Ռուսաստանի դիրքորոշումն այդ հաշվով ոչ մի դեպքում չի փոխվել»։
Նկատելի է, որ դեսպանը ձգտում է հայ-ռուսական հարաբերություններին ավելորդ լարվածություն չհաղորդել՝ դիվանագիտորեն բոլոր սուր հարցերի վրա նրբանկատորեն անցնելով:
Մետաքսյա Շալունց
Հետևեք մեզ Viber-ում
