Ադրբեջանի դեսպանի կինը փորձել է կաշառել

Լատվիայում տհաճ պատմություն է տեղի ունեցել Ադրբեջանի դեսպան Էլման Զեյնալովի կնոջ` Նազիրա Զեյնալովայի հետ: Նրա արարքն այն աստիճան է ցնցել օրինապահ լատվիացիներին, որ այժմ գործը քննում է երկրի Հակակոռուպցիոն բյուրոն: Ըստ haqqin.az-ի, դիվանագիտական շրջանակից կնոջը, պարզվում է, վարորդական իրավունք է անհրաժեշտ եղել եւ նա, հետեւելով Ադրբեջանի համար ավանդական ուղուն, փորձել է դա ստանալ առանց հատուկ դասընթաց անցնելու եւ ֆորմալ այլ ուղիների, այլ` որոշակի գումարի դիմաց: Դիմելով տեղի Ճանապարհային երթեւեկության անվտանգության տնօրինությանը (CSDD), նա առանց ավելորդ բացատրությունների, իրավունքի դիմաց 500 եվրո է առաջարկել: haqqin.az-ի թղթակիցներին հաջողվել է հեռախոսով խոսել CSDD-ի քննիչներ Իվասի եւ Ուլդասի հետ: Լատվիացի երկու ճանապարհային ոստիկանական տեսուչն էլ, որոնք մինչեւ հիմա զարմացած են դեսպանի կնոջ նման անբռնազբոս պահվածքից, հաստատել են իրենց կաշառք հանձնելու փորձը: «Մենք անմիջապես զանգեցինք Հակակոռուպցիոն բյուրո, եւ Ադրբեջանի քաղաքացուհին ձերբակալվեց: Շուտով կնոջը բաց թողեցին, այնուամենայնիվ նրա գործն այժմ քննվում է տվյալ բյուրոյում: Այդ գործի մասին տեղեկացված է նաեւ Լատվիայի ԱԳՆ-ն: Ցավոք սրտի, ես չեմ կարող տալ կնոջ անունը», - ասել է տեսուչ Իվաս Կառլիսը: Սակայն խմբագրության աղբյուրներից հայտնի է դարձել, որ Լատվիայում ադրբեջանի դեսպանի կնոջը կոչում են Նազիրա Զեյնալովա: Էլման Զեյնալովը 1993-ից դիվանագիտական ծառայության մեջ է: Նա աշխատել է Ուկրաինայի դեսպանատանը եւ Արտաքին գործերի նախարարության կենտրոնական աշխատակազմում: 2005-ից Բուլղարիայում Ադրբեջանի դեսպանն է եղել, հետո դարձել է Լատվիայում դեսպան: Ադրբեջանի ԱԳՆ-ն հրաժարվել է մեկնաբանել այդ միջադեպը: