Այց՝ առանց օրակարգի

Միացյալ Նահանգները ցանկանում է տեսնել հզոր և բարգավաճ Հայաստան, «Ամերիկայի Ձայն»-ին հայտնել է ԱՄՆ-ի փոխպետքարտուղարի Եվրոպայի և Եվրասիայի հարցերով տեղակալ Ջորջ Քենթը՝ հավելելով. «Մենք ցանկանում ենք Հայաստանը տեսնել որպես հաջողակ երկիր՝ բարգավաճող, ժողովրդավար և անվտանգ»:

Հայաստանի անկախացումից ի վեր, Միացյալ Նահանգները նորանկախ Հայաստանի Հանրապետությանն ավելի քան երկու միլիարդ դոլարի օգնություն է տրամադրել՝ գյուղատնտեսական ոլորտի բարեկարգումից մինչև մարդասիրական օգնություն, պատերազմական գոտու ականազերծում, կրթական և շատ այլ ծրագրերի միջոցով։
«Թավշյա հեղափոխությունից» ի վեր, Միացյալ Նահանգները շարունակում է օգնել Հայաստանին այլընտրանքային և մաքուր էլեկտրաէներգիայի միջոցներ զարգացնել, իրականացնել երկրի համար կարևորագույն նշանակություն ունեցող ժողովրդավարական բարեփոխումներ: Ջորջ Քենթի խոսքով, 2018-ի գարնան խաղաղ իշխանափոխությունը Հայաստանի համար զարգացման նոր դռներ է բացել և ԱՄՆ-ը մեծապես շահագրգռված է Հայաստանին օգնել այս գործում։ «Թավշյա հեղափոխությունից մեկ տարի անց, Հայաստանն ունի հաջողակ երկիր դառնալու լուրջ հնարավորություն, մենք ցանկանում ենք տեսնել Հայաստանին որպես կայացած և հաջողակ երկիր, դա մեր իսկ շահերից է բխում»,- նշել է ԱՄՆ-ի փոխպետքարտուղարի տեղակալ Ջորջ Քենթը։

Այս հայտարարությունը պաշտոնական Վաշինգտոնից, թերևս, նպատակ ունի ազդարարելու, որ, թեև Փաշինյանի առաջիկա այցը Միացյալ Նահանգներ չի կրում ներկայացուցչական բնույթ, ծրագրված չեն բարձրագույն իշխանությունների հետ բանակցություններ, այնուամենայնիվ, Հայաստանը շարունակում է ԱՄՆ-ի համար մնալ գործընկեր պետություն: Ավելին՝ Վաշինգտոնը ազդարարում է, որ Հայաստանը ցանկանում է կայացած ու հաջողակ պետություն:

Նկատենք, որ օրերս ՀՀ ԱԳ նախարար Զոհրաբ Մնացականյանը մամուլի ասուլիսում անդրադարձավ հայ-ամերիկյան հարաբերություններին, նշելով, որ այս տարվա ընթացքում Միացյալ Նահանգների հետ ունենք բարձր մակարդակով չափազանց բավարար երկխոսություն. «Ուղղակի, եթե ուշադրություն դարձնեք և՛ վարչապետի և՛ արտգործնախարարի հանդիպումների ծավալի մակարդակին՝ հաշվի առնելով նաև Միացյալ Նահանգների պետական կառուցվածքը, մենք այսօր ԱՄՆ-ի հետ բարձր մակարդակի շփումների դեֆիցիտ չունենք և՛ Սպիտակ տան մակարդակով, և՛ Պետքարտուղարության մակարդակով։ Բարձր մակարդակով մենք ունենք շատ ակտիվ երկխոսություն և չունենք այն ակտիվացնելու որևէ սահմանափակում։ Շատ պարզ Ձեզ բացատրեմ, եթե ես որևէ ուղերձ ունեմ ասելու, ես անմիջապես կարող եմ դա հասցնել ԱՄՆ-ի բարձր մակարդակի իմ գործընկերներին։ Այդ առումով շատ ակտիվ է աշխատում մեր դեսպանատունը, որը շատ ակտիվ ներգրավված է այդ բարձր մակարդակի հարաբերություններում։ Մենք այսօր շփման որևէ դեֆիցիտ և միմյանց հետ ցանկացած հարց քննարկելու որևէ խնդիր չունենք»։

Իսկ ինչ վերաբերում է Փաշինյան-Թրամփ հանդիպմանը՝ Մնացականյանն ասել էր. «...Կլինի, երբ կլինի։ Աշխատում ենք, և սա մեզ համար օրակարգային հարց է, բայց ուղղակի միայն ֆիքսվել, որ չկա, ուրեմն այդպես է. ես այդ մոտեցումը չեմ տեսնում, որովհետև կրկնում եմ, բարձր մակարդակի շփումների պակաս մենք չունենք, և բնականաբար հղում եմ անում ժամանակացույցին, մեր հանդիպումների մակարդակին, որոնք տեղի են ունեցել այս տարվա ընթացքում՝ քանի անգամ, ում հետ, ինչպես»։
Փաշինյանի առաջիկա այցը Միացյալ Նահանգներ, վստահաբար, մեծ բան չի ավելացնելու հայ-ամերիկյան հարաբերություններում: Ավելին՝ այս պահին կարող ենք ասել, որ հայ-ամերիկյան նորացված օրակարգ չկա, ամեն ինչ ընթանում այնպես, ինչպես կարող էր ընթանալ: Ոչ ավել, ոչ պակաս...

Թամար Բագրատունի