Ամեն ժամը, որ Քոչարյանը գտնվում է կալանքի տակ, նրա իրավունքի խախտում է. պաշտպանական թիմ (video)

«Եթե լիներ իրավունքի գերակայության մաքուր իմաստի տեսանկյունից իրավիճակը, ապա հենց այսօր պետք է լիներ դատական նիստ: Դատարանը կարող էր հենց իր նախաձեռնությամբ նիստ հրավիրել:  Քրեակատարողական վարչակազմը պարտավոր է անձին ազատ արձակել, եթե նրա կալանքի վերաբերյալ առկա չէ դատարանի համապատասխան որոշում: Սա իմ սուբյեկտիվ կարծիքն է: Համապատասխպան որոշում եզրույթն իմ կարծիքով չի կարող տեղի ունենալ այն աստիճանի օրենսդրական բացի արձանագրում, որը խախտում է 27-րդ հոդվածը: Հետևաբար, նախորդ որոշումները խախտել են 27-րդ հոդվածը: Բայց փաստն այն է, որ սեպտեմբերի 12-ի համար նիստ նշանակված է»,-լրագրողների հետ հանդիպմանը հայտարարեց ՀՀ երկրորդ նախագահ Ռոբերտ Քոչարյանի պաշտպաններից Արամ Վարդևանյանը:

Մինչ այսօր նախատեսված էր, որ սեպտեմբերի 12-ին դատարանը քննելու է խափանման միջոցի հարցը: Սակայն ՍԴ-ի որոշումի հրապարակումից հետո ամեն օրն ու ժամը, որ Քոչարյանը գտնվում է կալանքի տակ, ուղղակիորեն իրավունքի խախտում է, հետևաբար դատարանը չպետք է սպասի ամսի 12-ին և դատական նիստ հրավիրի անհապաղ ու անդրադառնա խափանման միջոցի հարցին,-  հայտարարեց  Հայկ Ալումյանը:

Այս պահին փաստաբաններ Օրբելյանն ու Խուդոյանը միջնորդություն են ներկայացրել Երևան քաղաքի ընդհանուր իրավասության դատարան՝ պահանջելով անհապաղ հրավիրել դատական նիստ և քննարկել խափանման միջոցի, ինչպես նաև քրեական հետապնդումը դադարեցնելու հարցերը,ասաց Ալումյանը: