Փառք ու պատիվ Օսիպյանին՝ հավերի ոտնահարված պատիվը վերականգնելու համար

Վերջապես հայ հանրությունն ըմբոշխնեց ապրիլյան թավշյա հեղափոխության իրական ձեռքբերումը:

Երեկ Բաղրամյանի ոստիկանները բացահայտեցին 21 տարի առաջ տեղի ունեցած 13 հավի գողության փաստը: Հասկանում եք՝ 13 հավի: Իսկ սա նշանակում է, որ Հայաստանում հավերն այլեւս ապահովագչված են, նրանց ոչ ոք չի կարող գողանալ, եթե նույնիսկ գողանա էլ, ապա թող իմանա, որ 21 տարի անց քաջարի ոստիկանները բացահայտելու են դա: Որտեղ էլ որ հավերը լինեն, ավելի ճիշտ մեծ է հավանականությունը, որ չեն լինի, բայց կապ չունի, ոստիկանների կողմից չի ներվի այդ աններելի հանցագործությունը, նրանք ուժեր կլարեն, միջոցներ կվատնեն թեկուզ երեք հավի ոտնահարված պատիվը վերականգնելու համար:

Իսկ դուք լինեիք՝ ինչ կանեիք մեր ոստիկանության փոխարեն, երկրում ամեն ինչ հրաշալի է, գողականներ չկան, սխոդկաներ չկան, ոչ համաներում է եղել, ոչ էլ դրանից հետո հանցագործություններն են շատացել, ոչ էլ գրպանահատներ ակտիվացել: Ոստիկանները, հո պարապ չեն նստելու, մեր հարկատուներիցս աշխատավարձ են ստանում, պիտի մի գործ անեն, թե ոչ: Մարդիկ էլ արել են, եւ ինչպիս՜ն: Բացահայտել են 21 տարվա վաղեմության գողություն, թե ինչպես, այ դա միայն իրենք կարող են ասել: Եկեք ազգովին փառք ու պատիվ մատուցենք մեր ոստիկաններին եւ Վալերի Օսիպյանին, գլուխ խոնարհելով նրանց անուրանալի ու անգնահատելի աշխատանքների եւ այն պարգեւի համար, որ մեր հավերը հավերժ պաշտպանված կլինեն: Հույս հայտնելով, որ քաջարի ոստիկանությունն այսուհետ իր պաշտպանության տակ կառնի նաեւ մեր կովերին, ոչխարներին, շներին ու կատուներին ու կբացահայտի նաեւ նրանց նկատմամբ ոճրագործությունները:

Անի Սահակյան