Հստակեցում ԱՄՆ-ից. երբ Հայաստանի հարևանի դեմ պատժամիջոցները կչեղարկեն
«Վաշինգտոնը պատրաստ է բանակցել Իրանի ղեկավարության հետ, սակայն Թեհրանի դեմ սահմանված պատժամիջոցների հարցը պետք է քննարկվի բացառապես այդ բանակցությունների արդյունքների հիման վրա», - Կիև կատարած այցի շրջանակներում «Ազատության» ուկրաինական ծառայությանը տված հարցազրույցում հայտարարել է Սպիտակ տան Ազգային անվտանգության գծով խորհրդական Ջոն Բոլթոնը:
«Թրամփը բանակցությունների նպատակով պատրաստ է հանդիպել ցանկացած մարդու հետ: Նա իր բնույթով բանակցող է և գործարքներ կնքող: Բայց բանակցությունների մեջ ներգրավվելը դիրքորոշման փոփոխություն չի նշանակում: Թրամփը չի պատրաստվում կրկնել նախագահ Օբամայի թույլ տված սխալները: Այն գաղափարը, թե պետք է Իրանին տնտեսական որոշակի առավելություններ պարգևել, որպեսզի նա զերծ մնա այնպիսի քայլերից, որոնց ի սկզբանե չպետք է դիմեր, սխալ է: Եթե մենք կարողանանք Իրանի հետ համապարփակ համաձայնագիր կնքել, այդ դեպքում իհարկե պատժամիջոցները կվերացվեն: Երբ Իրանի վարչակազմը պատրաստ լինի բանակցություններին, այդ ժամանակ էլ կլինի հանդիպումը», - նշել է Բոլթոնը` անդրադառնալով վերջին օրերին Իրանի և Միացյալ Նահանգների ղեկավարների միջև հնարավոր հանդիպման մասին խոսակցություններին: Բնական է սակայն, որ նախագահ Թրամփի ազգային անվտանգության գծով խորհրդականի Կիևում անցկացրած բանակցությունների հիմնական թեմաները Ուկրաինայի արևելքում ստեղծված կացությունը և Ռուսաստանի հետ հարաբերություններն են եղել:
Բոլթոնի համոզմամբ, Ուկրաինայի նոր իշխանությունները այս հարցում պետք է զերծ մնան կտրուկ քայլերից․ - «Կարծում եմ, որ Ուկրաինայում գործող նոր կառավարության տեսանկյունից ճիշտ կլինի, որ նախագահ Զելենսկին շատ զգուշորեն առնչվի Ռուսաստանի հետ հարաբերությունների ռազմավարությանը: Որևէ ուղղությամբ շտապողականություն ցուցաբերելու ոչ մի պատճառ չկա: Չեմ կարծում նաև, որ եվրոպացիները այս հարցում որևէ պատրաստի լուծում ունեն: Ամեն դեպքում, Ուկրաինայի կառավարության համար խելամիտ կլինի այս հարցի շուրջ ավելի տևական քննարկում կազմակերպելը», հաղորդում է «Ազատությունը»:
Այցի շրջանակներում Բոլթոնը նաև փորձել է փարատել Կիևում առկա այն մտավախությունները, թե Թրամփի վարչակազմը կարող է դիմել Մոսկվայի հետ հարաբերությունների միակողմանի կարգավորման` ի հաշիվ Ուկրաինայի: «Եթե դուք դիտարկեք մեր կողմից ձեռնարկված քայլերը, ապա ամեն ինչ շատ հստակ ուրվագծվում է: Մենք Ռուսաստանի դեմ զգալիորեն ավելի շատ պատժամիջոցներ ենք սահմանել, քան եվրոպացիները», - նշել է Ջոն Բոլթոնը:
Նրա համոզմամբ, Արևելյան Ուկրաինայի և Ղրիմի հարցերը հարկավոր է շատ ավելի լայն կոնտեքստում դիտարկել․ - «Դոնբասի և Ղրիմի հարցերը, ավելի գլոբալ մեկ այլ խնդիր` Եվրոպայում Ռուսաստանի դերակատարությունը, նաև այն հարցը, թե արդյոք 1945 թվականից հետո ձևավորված Եվրոպայում ուժի կիրառումը թույլատրելի է թե ոչ, այս ամենը ուղղակիորեն Միացյալ Նահանգների շահերի տիրույթում է: Սա ոչ թե զուտ եվրոպական, այլ համաշխարհային կարևորության խնդիր է»:
Ամերիկացի պաշտոնյան ուկրաինացի լրագրողների հետ զրույցում չի շրջանցել նաև Դոնալդ Թրամփի վերջին հայտարարությունները, թե լավ կլիներ, որ Ռուսաստանը կրկին մաս կազմեր «Մեծ յոթնյակ» ձևաչափին: «Կա մի պայման` ռուսներն իրենք պետք է ցանկանան վերադառնալ Մեծ Յոթնյակ: Սակայն առայժմ նման նշույլներ չկան: Նրանք մեզ երբեք չեն դիմել նման խնդրանքով: Գուցե վախենում են, որ կարող են մերժման բախվել և չեն ցանկանում մի ակումբի անդամակցության համար դիմել, որի մուտքն իրենց համար փակ է: Սրանք են առկա բոլոր գործոնները, բայց ես վստահ եմ, որ այս խնդրի շուրջ բանավեճը շարունակվելու է», - «Ազատության» ուկրաինական ծառայության հետ զրույցում նշում էր Սպիտակ տան Ազգային անվտանգության գծով խորհրդականը:
Այսպես, Իրանի վերաբերյալ Թրամփի հայտարարություններից հետո՝ պաշտոնական Վաշինգտոնը պարզաբանում մտցրեց՝ հասկացնել տալով, որ Թրամփի հայտարարություններն այն մասին, որ ԱՄՆ-ն Իրանում իշխանափոխություն չի ցանկանում՝ դեռ ոչինչ չի նշանակում․ Իրանը պետք է քայլ անի՝ միջուկային թեմայով՝ ԱՄՆ-ի պահանջին համահունչ:
Մետաքսյա Շալունց
Հետևեք մեզ Viber-ում
