Փաշինյանը հոգնել է անակնկալներից, ամեն ինչ նույն սցենարով

ՊԵԿ նախկին ղեկավար, ֆինանսների նախկին նախարար Գագիկ Խաչատրյանի շոուի վերածված ձերբակալությունը կասկածի տակ դրվեց եւ լրատվամիջոցների եւ հանրության ոչ զոմբիացած շրջանակների կողմից։
Ինչո՞ւ հենց հիմա հիշեցին Գագիկ Խաչատրյանին, երբ թավշյա հեղափոխությունից հետո ավելի քան մեկուկես տարի է անցել, իսկ Գագիկ Խաչատրյանը ծպտյալ պաշտոնյա չէր: Այս հարցին ԱԱԾ ղեկավար Արթուր Վանեցյանը տալիս է բավական նորմալ պատասխան, հայտնելով, թե այս ընթացքում նյութեր էինք նախապատրաստում, ստացված տեղեկություններն էինք ուսումնասիրում:
Բայց նույնիսկ այս պատասխանից հետո կրկին հարց է հնչում՝ ինչո՞ւ Նիկոլ Փաշինյանը երբեւէ չի խոսել այդ մասին ու դա չի ներկայացրել իբրեւ «դարի հանցագործություն» ինչպես արեց Արամ Հարությունյանի դեպքում։ Մի խոսքով՝ ինչու-ների ողջ շարան եւ զրո պատասխան։ Իսկ պատասխանն առավել քան ակնհայտ է։ Նիկոլ Փաշինյանի վարկանիշի շեշտակի անկումը մի կողմից, Ամուլսարի շուրջ ծավալվող իրադարձություններից բարձրացած աղմուկը մյուս կողմից, Փաշինյանին փրկօղակ է հարկավոր՝ հանրության ուշադրությունը շեղելու, իր հեղինակությունը նախկինների նկատմամբ «վրեժխնդրությամբ» բարձրացնելու, որոշ շրջանակների արյան ծարավը հագեցնելու համար։ Այս գործընթացին են լծվել եւ իրավապահները, որոնք ապահովում են շոուի հիմնական մասը, բռնում-բաց թողնում «փրկօղակներին, եւ Նիկոլ Փաշինյանի պատգամավորները, որոնք «մասովկայի» հարցն են լուծում ու տարածում են այդ աշխարհացունց ինֆոներն ու փառք ու պատիվ տալիս իրենց քաղաքական հորը, եւ իշխանական քարոզչամեքենաները։ Եւ, ահա, դեռ չմարսած Գագիկ Խաչատրյանի ձերբակալության լուրը, նրանք մի նոր չափաբաժին են փորձում ներարկել հանրությանը։Առավոտից Հովիկ Աբրահամյանի իբր հետ վերադարձրած հողերի մասին վերնագրեր են տարածվում՝ «Հովիկ Աբրահամյանի ձեռք բերած հողակտորները կվերադարձվեն Դիլիջան համայնքին», բայց նայում ես բուն նյութը , վերնագրի տրամագծորեն հակառակ բովանդակությունը, որ վաղեմության ժամկետը անցել է ու հողերը չեն վերադարձվել: «Նախկին վարչապետ Հովիկ Աբրահամյանը տարածքային կառավարման նախարարի պաշտոնը զբաղեցնելու ժամանակ` 2007 թ.- ին, իր վարորդի միջոցով ձեռք է բերել Դիլիջան համայնքին պատկանած 5.7 և 1.5 հա մակերեսով հողակտորներ: ԱԺ նախագահի պաշտոնը զբաղեցնելու ժամանակ Աբրահամյանն իր թիկնազորի ղեկավարի միջոցով դարձել է 4 առանձին` ընդhանուր 2913 քմ մակերեսով հողակտորի փաստացի սեփականատեր:ՀՀ հատուկ քննչական ծառայությունը նախկինում հաղորդել է, որ նախկին վարչապետ Հովիկ Աբրահամյանի վերաբերյալ քրեական գործի նախաքննության ընթացքում բացահայտվել են Դիլիջան համայնքի ղեկավարի և աճուրդային հանձնաժողովների անդամների կողմից առանց աճուրդներ կազմակերպելու, կեղծ փաստաթղթեր կազմելու միջոցով նույն համայնքների սեփականությունը հանդիսացող 15 հողատարածքներ սեփականության իրավունքով Հովիկ Աբրահամյանի ազգականներին և նրա մերձավոր անձանց վաճառելու դեպքեր:
Ըստ ՀՔԾ հայտարարության` քանի որ վերը նշված որոշ դեպքերում անցել են քրեական պատասխանատվության ենթարկելու` օրենքով նախատեսված ժամկետները, իսկ որոշ դեպքերում կիրառելի է եղել համաներման մասին օրենքը, ուստի ՀՔԾ քննիչի կողմից որոշում է կայացվել նրանց նկատմամբ քրեական հետապնդում չիրականացնել: Որոշումների օրինակներն ուղարկվել են Տարածքային կառավարման և ենթակառուցվածքների նախարարություն` վարչական ակտերն առոչինչ ճանաչելու և նշված գույքային միավորները Դիլիջան համայնքին վերադարձնելու գործընթաց նախաձեռնելու համար»:
Իշխանության սցենարն այնքան կանխատեսելի է բոլորն են կանխատեսում, որ մոտ ապագայում «զոհասեղանին» կհայտնվեն մյուսները, դիցուք՝ Գագիկ Բեգլարյան, Սերժ Սարգսյան, Թոխմախի Մհեր եւ այլք։ Չի բացառվում, որ այս մարդկանց հետ անգամ փոխհամաձայնության գան, որ իշխանության համար դժվարին փուլերում ինքնակամ համաձայնեն դառնալ փրկօղակ, իրենց ոտքով գնան մեկուսարաններ, հետո էլ գումարը մուծեն ու ամբողջ կյանքում ազատ ու երջանիկ ապրեն։
Մեր՝ ոչ զոմբի հանրության անունից կոչ ենք անում մեր սիրելի վարչապետին դադարեցնել ձերբակալության էժանագին շոուները, շոուն այլեւս չի աշխատում,հատկապես երկրորդ նախագահ Ռոբերտ Քոչարյանի կալանավորումից հետո այլեւս ոչ մեկին չեք զարմացնի ձեր ձերբակալություններով։ Փողն էլ կարող եք «տակից» վերցնել։ Մեկ էլ տեսար ձեր շոուներից հոգնեն իրենք դերասանները եւ անհարմար բան ստացվի։ Մենք գրել էին, որ Նիկոլ Փաշինյանի՝ նախկորդներին ուղղված սպառնալիքներից մեկի ժամանակ համապատասխան շրջանակներն արտահայտվել են, որ Արթուր Վանեցյանի միջոցով վերցվող բոլոր «փայերի» ցուցակն ունեն ու կարող են մի օր հրապարակել, մանավանդ որ հայտնի չէ այդ գումարը ուր է գնում՝ պետբյուջե, թե ընտանեկան գրպան։ Այնպես որ ձեր խաղն այժմ կանխատեսելի է, նոր բան մտածեք՝ անակնկալներով լի։

Անի Սահակյան