Լո՞ւրջ եք ասում

Փոխվարչապետ Տիգրան Ավինյանը նոր մոլորակ է բացահայտել, Ամուլսարի շահագործումը կասեցնելու կողմնակիցներին նա հետեւյալով է սպառնացել․«Վտանգ կա, որ կվերածվենք մի պետության, որտեղից ներդրողները փախչում են»։ Ավինյանը երկար-բարակ բացատրել է, թե բնապահպանական հարցերից զատ կան ներդրողներ, ովքեր իրականացրել են մոտ 400 մլն. դոլարի ներդրում մեր երկրում՝ մեր օրենքների պահանջներին համապատասխան։

«Կան ընկերությունում աշխատանքի անցած քաղաքացիներ, ովքեր կանգնած են աշխատանքից ազատվելու վտանգի առջև։ Նշեմ, որ հանքի շահագործման արդյունքում բացվելու է 750 աշխատատեղ։ Իսկ եթե զբաղվածության մուլտիպլիկատիվ էֆեկտը հաշվի առնենք, ստեղծված աշխատատեղերի թիվը հասնելու է մինչև 4500-ի։
Մինչև հանքի բացումը ակնկալում ենք լրացուցիչ 130 մլն դոլարի ներդրում: Պետական բյուջեի տարեկան լրացուցիչ մուտքերը կկազմեն 45-50 մլն ԱՄՆ դոլար։ ՀՆԱ-ի աճը կանխատեսվում է մոտ 1․4 տոկոսի սահմաններում (որից 1 տոկոսն ուղղակի ազդեցությունն է)։ Թողարկումը, որը գրեթե ամբողջությամբ արտահանվելու է, կազմելու է մոտ 250 մլն ԱՄՆ դոլար։ Արդյունքում, արտահանման վրա ազդեցությունը գնահատվում է մոտ 10%-ի շրջանակներում» ասել է նա։ Այստեղ տեղին է հիշել դասականին՝ «Իյա,իրո՞ք»։ Եթե այդպես է, կարո՞ղ է ձեր 20-30 պատգամավորները դաուն են ու դեբիլոիդ, կամ ձեր տրամաբանությամբ՝ հակապետական, որոնք առաջինը նետվեցին հանքի շահագործումը թույլատրելու որոշման դեմ, ովքեր հակադրվեցին Նիկոլ Փաշինյանի բացառապես քաղաքական որոշմանը՝ հայտարարելով, որ Ամուլսարը հանք չի դառնա։

Պարոն Ավինյան, ձեր հեքիաթներից անցյալում էլ էին պատմում, բայց ձեզ իշխանության բերեցին հենց այն բանի համար, որ դուք չէիք հավատում այդ հեքիաթներին, շարժվում էիք գետի հոսանքին հակառակ ուղղությամբ։ Ձեր թիմում շատերն են բնապահպանական պայքարի շնորհիվ հասել իշխանության,ստանձնել այս երկրի կառավարումը։
Գոնե մենք չենք մոռացել Նիկոլ Փաշինյանի ղժղժոցը, Լենա Նազարյանի մելամաղձոտ ճառերը։ Հիմա ինչ պատահեց, որ մոռացաք այդ ամենի մասին, սկսեցիք մտածել ոչ թե մարդկանց, նրանց առողջության, այլ ներդրումների, փողի մասին։ Դուք ինչով եք տարբերվում նախորդներից։
․Հ․Գ-Իմ Քայլը ըստ մամուլի տեղեկությունների՝ տրոհման շեմին է, մոտ 30 պատգամավոր դեմ է Փաշինյանի որոշմանը՝ շարունակել հանքի շահագործումը։

Անի Սահակյան