Սերժ Սարգսյանն ու Սեյրան Սարոյանը կփրկե՞ն Նիկոլ Փաշինյանին

Ամուսլարի թեման անսպասելիորեն պայթեց՝ անակնկալի բերելով այս իշխանություններին։ Հանրային դժգոհությունն այնքան մեծ էր, որ Նիկոլ Փաշինյանն անմիջապես նետվեց փրկօղակներ գտնելու, Ամուլսարի թեմայից շեղելու։ Առաջին հայացքից դժվար էր պատկերացնել՝ ինչ պետք էր գտնել, որը կստվերեր Ամուլսարի բարձրացրած աղմուկը, բայց կարծես թե գտնվեց։ Առաջինը ձեռք մեկնեց գեներալ Սեյրան Սարոյանը։

Նախկին իշխանությունների ամենակոռումպացված մարդկանցից մեկը, որը հեղափոխությունից հետո շուրջ մեկ տարի ջրի տակն էր անցել, հանկարծ հայտնվեց ու շեդեւր ասուլիս տվեց իր ասամբնյակի բակում։ Բոլոլա սարքելու համար մտածված էին բոլոր ատրիբուտները՝ սկսած նրա անձնական գազանանոցի պատկերից, վերջացրած հողաթափերից, եւ մի ամբողջ օր հանրությունը քննարկում ու ղժժում էր գեներալի արտահայտած մտքերի վրա։ Նա հասցրեց ոտքի վրա մեռցնել իր քավոր Սուրիկ Խաչատրյանին, աղիողորմ ձայնով գուժեց, թե նա կոմայի մեջ է ու դուրս չի գալիս, հետո պարզվեց, որ դա սուտ է, նա զբաղվեց նաեւ Ռուսաստանում ապաստանած իր նախկին գործընկերների պաշտպանությունը, ուշացած աջակցություն հայտնեց իր երբեմնի ընկեր Մանվել Գրիգորյանին, ում ուրացել ու դավաճանել էր դեռ ամիսներ առաջ։ Գեներալն այնքան տարվել աղմուկ բարձրացնելու պատվերի կատարմամբ, որ ակամայից «քաշեց» նաեւ Նիկոլ Փաշինյանին։Պատմեց, որ Նիկոլ Փաշինայնի հետ խոսել է Մանվել Գրիգորյանի մասին. «Խոսել եմ, որպեսզի հանկարծ էդ մարդը չմեռնի բերդի մեջ, ըլնենք խայտառակ ամբողջ աշխարհում»։ Հարցին, թե այսինքն՝ միջնորդել է վարչապետին, որ Մանվել Գրիգորյանի խափանման միջոցը փոխվի՞, Սեյրան Սարոյանը պատասխանեց. «Ասենք՝ Մանվելը գնաց իրանց տուն, բերդում չեղավ, ո՞ւր պտի փախնի Մանվելը: Փաշինյանն ասաց՝ գեներալ ջան, կա քննություն, կան մարդիկ, կա բժշկություն, եթե կտենանք, որ եթե իրոք վատ ա, հիվանդ ա, կփորձենք էդ հարցին ուրիշ լուծում տանք», ասաց նա մատնելով, որ հարցին լուծում տվողը ոչ թե դատարանն է, այլ Նիկոլ Փաշինյանը:

Մյուս «խլացուցիչի» էֆեկտ հանդիսացող թեման Սերժ Սարգսյանի հնարավոր ձերբակալության մասին հայտարարությունն էր, որն իր հայտնի հարցազրույցում արեց նրա փեսա Միքայել Մինասյանը։ Շուրջ երկու օր քաղաքական դաշտը իշխանականից ընդդիմադիր, հասարակական սեկտորը՝ քաղաքագետներից սկսած շարքային քաղաքացիներով վերջացած քննարկում էին երրորդ նախագահի մոտալուտ կալանավորման հարցը։ Իսկ ՀՀԿ-ականները այնպիսի համախմբվածությամբ մոտեցան հարցին, որ համացանցում գլխապտույտ էին առաջացրել։ «Կիկոսի մահը» հեքիաթի մոտիվներով ՀՀԿ-ականները լած ու կոծ, կական ու շիվան դրեցին, մի մասն էլ հիշեցրեցին իրենց առաջնորդի արիության մասին եւ որ Սերժ Սարգսյանը ոչնչից չի վախենում, եկեք, բռնեք․․․

Երկու թեմաներն էլ սառեցին, բայց Ամուլսարը շարունակում է եռռալ։

Անի Սահակյան