Նիկոլ Փաշինյանի ՕԳԳ-ի մասին

Մեր երկրի ամենակարևոր խնդիրներից մեկը ռացիոնալությունն ու ՕԳԳ-ի բարձրացումն է: «Իմ քայլը հանուն Կոտայքի մարզի» համաժողովի ժամանակ նման բան է հայտարարել վարչապետ Նիկոլ Փաշինյանը: 

«Ցավոք, շատ դեպքերում մենք կորցնում ենք ռացիոնալությունը՝ սկսած պետական կառավարման համակարգից, վերջացրած մյուս ոլորտներով: Մեր խնդիրն է, որ ներդրված և ծախսված ամեն դրամի դիմաց ստացվի հնարավորինս շատ արդյունք՝ սկսած պետական կառավարման համակարգից, վերջացրած կրթությունով, տեխնոլոգիաներով, գյուղատնտեսությամբ, ամեն ինչում: Հենց այդ ռացիոնալությունն է մեր տնտեսության մրցակցությունը բարձրացնելու միակ ուղին ու գրավականը: Մեր հավաքական աշխատանքի ամենակարևոր ուղղությունը պետք է լինի իրականության հետ ուղիղ կապ ունեցող, իրականությունից բխող լավ լուրերի ստեղծումը և այդ լուրերից բխող լավատեսությամբ հնարավորինս շատ մարդկանց վարակելը»,- նշել է նա:

Ըստ վարչապետի՝ պետք է զարգացնել նաև արդյունաբերական գյուղատնտեսությունը: Գյուղատնտեսության օգտակար գործողության գործակիցը /ՕԳԳ/ պետք է էապես ավելանա, և սա կառավարության համար ռազմավարական նշանակություն ունի: Ինչ է նշանակում ՕԳԳ-ի բարձրացում: Նիկոլ Փաշինյանի պատկերավոր բացատրմամբ, օրինակ, եթե մեկ հեկտար հողի մշակմամբ պայմանական զբաղվում են 10 մարդ, պետք է այնպես անել, որ դրանով զբաղվի և նույն արդյունքն ստանա, օրինակ, 2 մարդ: Այնուհետև Փաշինյանը կոչ է արել` աշխատել, հարստանալ, հարստացնել ոչ թե իրենց, այլ երկրին:
Հետաքրքիր տրամաբանություն է` եթե 10-ի փոխարեն 2 մարդ սկսի նույն արդյունքն ստանալ, անշուշտ այդ երկու մարդու համար ՕԳԳ-ն կբարձրանա, իսկ ինչ են անելու մնացած 8-ը:

Արդյունաբերական երրորդ հեղափոխության փուլում գտնվող աշխարհում կառավարությունների գերխնդիրը ռոբոտացման գործընթացում մարդու դերակատարման ֆունկցիոնալ կարևորության ապահովումն է: Աշխարհի շատ երկրների կառավարությունները զբաղված են հենց այս խնդրի լուծմամբ և այդ մասին ծրագրեր են մշակում, քանի որ տեխնոլոգիական առաջընթացն ուղեկցվում է մարդկային ներուժի անխնա կրճատմամբ, դրանով պայմանավորված` ամբողջ աշխարհում անխնա ավելանում է գործազուկների թիվը: Ճապոնիայում, օրինակ, վաղուց արեդն նորություն չեն ռոբոտ-վաճառողները, մաքրուհիները, վարորդները: Այս տեսանկյունից Նիկոլ Փաշինյանի պատկերացրած ՕՕԳ-ի բարձրացումը բացառիկ կամ դարակազմիկ չէ, հակառակը` անխուսափելի պրոցես է, որն այսպես թե այնպես տեղի է ունենում ինչպես ողջ աշխարհում, այնպես էլ Հայաստանում: Պարզապես Փաշինյանը պետք է իմանա, որ կառավարության և իր խնդիրը կամ իր բառերով ասած ՕԳԳ-ի արդյունավետությունը որոշվում է ոչ թե վերոնշյալ 2 մարդուն գովաբանելով, այլ աշխատաշուկայից դուրս մղվող 8 մարդու սոցիալական խնդիրները լուծելով:

Իսկ ընդհանուր առմամբ Նիկոլ Փաշինյանի տնտեսական պատկերացումները ինչպես կային թույլ ու մակերեսային, այնպես էլ մնացել են: Կոտայքում նա խոսել է տուրիզմի և արդյունաբերական գյուղատնտեսության կարևորությունից: Մի դեպքում խոսքը Ծաղկաձորի, Հանքավանի, Աղավնաձորի և Արզնու հանգստյան գոտիների մասին է, մյուս դեպքում ջերմոցային տնտեսությունների, որոնք հաջողությամբ զարգացել էին դեռ նախկին իշխանությունների օրոք: Իսկ որն էր Փաշինյանի քայլը` հանուն Կոտայքի մարզի զարգացման` այդպես էլ մնաց չբացահայտված:

Հայկ Դավթյան