Երևանի “Քանաքեռ-Զեյթուն” բժշկական կենտրոնի աշխատակիցներին աշխատավարձերը չեն վճարում. դիմում են նախարարին

Երևանի “Քանաքեռ-Զեյթուն” բժշկական կենտրոնի աշխատակիցներն այսօր ահազանգել են hayeli.am` տեղեկացնելով, որ արդեն 3-4 ամիս է աշխատավարձ չեն ստացել: Ինչպես պատմեցին, հիվանդանոցում մի քանի բաժիններ միացվել են, որի հետևանքով աշխատողներից ոմանք կորցրել են իրենց աշխատանքը, բացի այդ լավագույն մասնագետները նույնպես հեռանում են:

Բուժքույրերից մեկը հայտնեց, որ մի քանի անգամ դիմել է աշխատավարձի ուշացման համար, պատճառաբանել են, որ հիվանդանոցը գտնվում է ֆինանսական ծանր վիճակում, և չեն կարող վճարել գումարները: Վերջինս պատմեց նաև, որ միշտ մեկ ամսվա կտրվածքով ուշացրել են իրենց գումարները, իսկ Նոր տարվա օրերին էլ, ըստ իրեն, դիտավորյալ փակել են հիվանդանոցը, որպեսզի որպես տոնական աշխատանքային օր հավելյալ գումար չվճարեն աշխատակիցներին:

Մեզ ահազանգած աշխատակիցները նշեցին, որ հիվանդանոցի տնօրեն Հայկ Պետրոսյանն էլ արդեն մի քանի ամիս է հրաժարական է տվել, և, որ իրենք չգիտեն` ինչպես ստանան իրենց աշխատավարձերը` միաժամանակ մտավախություն հայտնելով, որ գուցե նոր տնօրենը հրաժարվի նախորդ ամիսների գումարները վճարել:
Նրանք դիմում են նաև Առողջապահության նախարար Արսեն Թորոսյանին, որպեսզի վերջինս ուշադրություն դարձնի իրենց հիվանդանոցում տեղի ունեցող իրավիճակին:

Նշենք, որ “Երևանի “Քանաքեռ-Զեյթուն” բժշկական կենտրոնը հավատարմագրային կառավարման է հանձնվել “Մեդիքալ Ինվեստ” ՍՊԸ- ին։ Վերջինս պատկանում է նախկին քաղաքապետ, Կադաստրի պետական կոմիտեի նախագահ Երվանդ Զախարյանի դստերը։ Գայանե Զախարյանն, ի դեպ, բժշկուհի է աշխատում հենց այդ նույն “Քանաքեռ-Զեյթուն” բժշկական կենտրոնում”։