Դավիթ Սանասարյանը թող ականջին օղ անի՝ ներողություն խնդրելուց առաջ

Պետական վերահսկողական ծառայության ղեկավար Դավիթ Սանասարյանը, ում լիազորություններն արդեն մի քանի ամիս է, ինչ սառեցված են, ՖԲ–ում կոչ է արել վերադարձնել թալանածը, ներողություն խնդրել և ինքնակամ խոստովանել գործած հանցանքների մասին:
«Մարդասպանը կարող է խոսել մարդասպանության վատ լինելու մասին, ջեբկիրը՝ ջեբկիրության, բռնաբարողը՝ մարդու իրավունքների, բայց այս ամենի համար մարդկության պատմության մեջ ձևավորել է գործուն զղջալու, մեղքը ընդունելու, պատիժը կրելու ինստիտուտները։
Մ՛ի մոռացեք ինչ եք արել, մի՛ մոռացեք, ոնց եք խեղել, վրեժ լուծել, արտագաղթը խրախուսել, երկիրը թալանել, մարդկանց հանիրավի մեղադրել ու ազատազրկել, արտաքին հարաբերություններում՝ այլոց առաջ կորացել, մի մոռացեք, որ խրախճանքների ժամանակ խմել եք հդե պոստում հայրենիքի, պետության, բանակի կենացը, բայց հաջորդ հնարավորության դեպքում պետության, իր քաղաքացիների ու զինվորների կյանքն եք վտանգել, նրա ունեցածն եք յուրացրել։
Ազատ եք, խոսեք ինչից ուզում եք, բայց նախևառաջ հրապարակային ասեք ներողություն, թալանածը վերադարձրեք, ինքնակամ խոստովանեք ձեր գործած հանցանքները ու դրանից հետո կարող ենք ձևավորել ազգային համերաշխություն։ Փոխարենը դուրս եք եկել ռևանշի. հավանաբար թույլ ենք գտնվել ձեր նկատմամբ, հակառակ դեպքում մեզ դասեր տալու առիթ չէիք ունենա։
Սխալն ուղղելու ճամփան միշտ կա, կարևորը հայրենիքի ու նրա ժողովրդի նկատմամբ սերն անսպառ է..»,- գրել է Սանասարյանը:
Գրառման մեջ կոնկրետ անուններ չկան, բայց պարզ է, որ ասելիքի հասցեատերը նախկին իշխանություններն են: Հավանաբար Դավիթ Սանասարյանին հունից հանում են ԶԼՄ-ներում շրջանառվող այն տեղեկությունները, թե իր դեմ կոռուպցիայի մեղադրանքով հարուցված քրեական գործի նյութերում բազմաթիվ հետաքրքիր մանրամասներ կան: Նշվում է, որ Դավիթ Սանասարյանի գիտությամբ և մասնակցությամբ բազմաթիվ կոռուպցիոն գործարքներ են կատարվել ՊՎԾ-ում՝ սկսած մանր չափի կաշառք պահանջելուց և վերցնելուց վերջացրած խոշոր գումարներով: Տեղեկություններ կան, որ այդ փաստերին ծանոթանալուց հետո անգամ Դավիթ Սանասարյանի սորոսական ընկերներից ոմանք դադարել են աջակցել նրան, անգամ շփվել նրա հետ:
Հիշեցնենք, որ նշված քրեական գործում Դավիթ Սանասարյանը ներգրավված է որպես մեղադրյալ: Նրան 2019 թվականի ապրիլի 18-ին մեղադրանք է առաջադրվել Պաշտոնական լիազորությունները չարաշահելու համար: Ազգային անվտանգության ծառայության կայքէջի հաղորդմամբ՝ բավարար ապացույցներ են ձեռք բերվել, որոնք առերևույթ վկայում են այն մասին, որ վերջինս, հանդիսանալով ՊՎԾ ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով` իր աշխատակիցների կողմից փաստացի կառավարվող ընկերության ձեռնարկատիրական գործունեությանը նպաստելու նպատակով իր պաշտոնեական դիրքն առերևույթ օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:
Սանասարյանի նկատմամբ որպես խափանման միջոց է կիրառվել չհեռանալու մասին ստորագրությունը:
ԱԱԾ-ի միջնորդությամբ Դավիթ Սանասարյանի պաշտոնավարությունը ՊՎԾ ղեկավարի պոստում ժամանակավոր դադարեցվել է: Այս պաշտոնական տեղեկատվությունը հրապարկվել է ոչ թե նախորդ «հանցավոր» իշխանությունների ժամանակ, այլ Սանասարյանի սրտի վարչապետ Նիկոլ Փաշինյանի պաշտոնավարման օրոք: Այսքանից հետո, երբ Դավիթ Սանասարյանը հանդես է գալիս իբրև երդվյալ հեղափոխական և բարոյախրատական հորդորներ է հղում անհասցե մարդկանց, անկեղծ ցանկություն է առաջանում ասելու՝ «Դավիթ դու սո՛ւս, ձայնդ կտրի՛»:
Դավիթ Սանասարյանի մեղքը դեռ ապացուցված չէ, դեռևս չկա օրինական ուժի մեջ մտած դատարանի որոշում: Բայց արդյո՞ք այն բոլոր մարդիկ, ում ենթադրաբար ուղղված է Սանասարյանի կենացանման ֆբ գրառումը, դատարանի կողմից մեղավոր ճանաչված անձինք են: Վստահաբար ոչ, հակառակ պարագայում Սանասարյանը չէր զլանա անուններ նշել: Եթե Դավիթ Սանասարյանին թվում է, որ ինքը, օգտվելով անմեղության կանխավարկածի իրավունքից, կարող է հասարակությանը դասեր տալ, ապա թող ականջին օղ անի և երբեք չմոռանա՝ անմեղության կանխավարկածի իրավունք ունեն բոլորը: Ընդ որում, եթե Դավիթ Սանասարյանի կենսագրության մեջ ամենախոշոր սխրանքը հեղափոխության օրերին Սերժ Սարգսյանի լուսանկարը պատուհանից դուրս շպրտելն է եղել, ապա տարբեր գործերով որպես մեղադրյալ ներգրավված անձանց մեջ կան մարդիկ, ովքեր կյանք ու արյուն են տվել արցախյան պատերազմի համար, ունեն լրջագույն ավանդ պետության կառուցման գործում: Հետևաբար, եթե խոսքը ներողություն խնդրելու մասին է, առաջին ներողությունը Սանասարյանը կարող է անձամբ խնդրել:

Հայկ Դավթյան