Հեղափոխության մակաբույծները

Հեղափոխության արժեքների մակաբուծացումը անասելի արագ ընթացք է ստանում:

Դրանում համոզվելու համար հետազոտություններ և մասնագիտական ուսումնասիրություններ ամենևին էլ պետք չեն: Պետք է ընդամենը հիշել՝ ինչն էին քննադատում հեղափոխականները մինչև հեղափոխությունը և ինչ են անում նրանք այսօր: Օրերս պարզվեց, որ Վարդավառի օրը Բաղրամյան պողոտայում գորգ լվանալու համար պետական միջոցներից 5մլն դրամ է ծախսվել։ Մի կողմ թողնենք այդ միջոցառման գեղարվեստական արժեքն ու գեղագիտությունը: Համարենք, որ դա ճաշակի հարց է, իսկ ճաշակին ընկեր չկա: Արդյոք գորգալվությունը կապ ուներ Վարդավառի տոնի հետ: Ըստ Մայր Աթոռի տված պաշտոնական պարզաբանման՝ ո՛չ, չունի: Դա ծեսի հետ չի առնչվում:
ԱԺ բակում գորգեր փռելու և լվանալու միջոցառումը կապ ուներ իմքայլական պատգամավոր Հռիփսիմե Գրիգորյանի կրեատիվ գաղափարի հետ: Ինչ խորհուրդ ուներ այն, ով էր տեսել Երկրի օրենսդիր մարմնի բակը վերածել խալի-խալիչա փռելու վայրի, հայտնի չէ: Բայց, որ անհայտ ու անկապ գաղափարի համար պետությունը շռայլորեն ծախսում է 5 մլն դրամ /ի դեպ, այդ գումարով կարելի էր միանգամայն նոր գորգեր գնել-խմբ./ դա արդեն հետաքրքիքր է, նույնիսկ շատ, որովհետև, օրինակ, հուլիսի 5-ին՝ ՀՀ սահմանադրության օրը, փաստացի չնշվեց: Երկրի ղեկավարը անգամ հանրապետությունում չէր: Պետությունը գրոշ չծախսեց՝ սահմանադրությունը արժևորելու, օրվա խորհուրդը կարևորելու համար:
Անցյալ տարի համազգային քննարկման է թեմա էր դարձել սեպտեմբերի 21-ի՝ Անկախության օրվա տոնակատարության և Երևանի 2800-ամյակի միջոցառումների համար նախատեսված ծախսերը: Որպես մեծագույն ձեռքբերում՝ թմբկահարվեց տոնական բյուջեի կրճատումը, սակայն դրանից ընդամենը 3 ամիս անց Երևանի քաղաքապետարանը 85 մլն դրամ վճարեց Նոր տարվա տոնածառի համար: Սա աննախադեպ թիվ էր, Երևանի նախկինում ունեցած բոլոր տոնածառերի պատմության մեջ: Ի դեպ, ընդամենը օրերս Երևանի ավագանին 91 մլն դրամով կրճատեց մանկապարտեզներին հատկացված գումարը և այդ միջոցները հատկացրեց աղբամանների և աղբատարների ձեռքբերմանը՝ հաշվի առնելով, որ աղբահանության վիճակը կատաստրոֆիկ վատ է: Եթե Հայկ Մարությանը աղբամանների թվի մասին վիճակագրությունը կազմած լիներ ավելի վաղ, թերևս կարելի էր մանկապարտեզների փողերը կրճատելու փոխարեն՝ մի քիչ ավելի համեստ տոնածառ դնել հրապարակում:
Սրանցից բացի՝ ապրիլի 23-ին Քաղաքացու օրը նշելու համար կառավարությունը պահուստային ֆոնդից 124 մլն դրամ հատկացրեց, որպեսզի այդ օրը փողոցներում իշխանավորները խորոված ու քյաբաբ վայելեն:
Հեղափոխության օրերին Նիկոլ Փաշինյանն իր բոլոր ելույթներն ավարտում էր հայտնի կոչով՝ «Եվ ուրեմն կեցցե այն Հայաստանը, որն արդեն եկել է»: Ասել կուզի՝ կեցցե այն Հայաստանը, որ սահմանադրության օրը չի նշում, բայց գորգալվության համար 5 մլն դրամ է ծախսում, որ Անկախության տոնին գումար է խնայում, որ Քաղաքացու օրը խորոված ուտի….

Հայկ Դավթյան