Ապտակ ԱՄՆ-ից Հայաստանի իշխանությանը

«Հայաստանի և ԱՄՆ-ի միջև ամենաբարձ մակարդակով հանդիպումը եղել և մնում է մեր օրակարգում», - այսօր Ուրուգվայի արտգործնախարարի հետ համատեղ ասուլիսի ժամանակ, «Ազատության» հարցին ի պատասխան, ասել է Հայաստանի արտգործնախարար Զոհրաբ Մնացականյանը։

«Վստահ եմ, որ այդ պահը կգա, բայց նույնիսկ ներկայիս դինամիկային, եթե մենք գնահատական տանք, տեսնենք, թե ինչ հանդիպումներ են եղել, ինչ մակարդակներով և ինչ հաճախականությամբ, այդ առումով որևէ դեֆիցիտ քաղաքական երկխոսության բարձր մակարդակով մենք Միացյալ Նահանգների հետ չենք ունեցել այս տարվա ընթացքում։ Սա նույնպես շարունակական է լինելու, շարունակական ծրագրերը մեր առջև են, մենք բազմաթիվ օրակարգային հարցեր ունենք, որոշ հարցեր խնդրահարույց են, որոշ հարցեր վերաբերում են հաջորդ քայլերին, բայց սա շատ նորմալ է այն առումով, որ սա երկու գործընկերների միջև հարաբերություններ են, օրակարգային հարցերը մշտապես քննարկման առարկա են։ Մենք երբևէ չենք ունեցել որևէ խնդիր մեր հարցերն ամենաբարձր մակարդակով քննարկելու, և սա շարունակական գործընթաց է»,- ասաց Մնացականյանը։

Այս հայտարարությունն այնքան զավեշտալի չէր լինի, եթե դրանից մի քանի ժամ անց սենսացիոն տեղեկություն չտարածվեր։ Պարզվում է ԱՄՆ-ը պատժամիջոցներ է սահմանել հայաստանյան երկու ընկերությունների՝ «Մարկել» ՓԲԸ-ի և Երևանի կապի միջոցների գիտահետազոտական ինստիտուտի (ԵրԿՄԳՀԻ) նկատմամբ: Միացյալ Նահանգների առևտրի նախարարության պաշտոնական հաղորդագրությունը նշում է, որ վերջինները ներառվել են այն ընկերությունների ցանկում, որոնք, ըստ արժանահավատ տվյալների, վտանգ են ներկայացնում Միացյալ Նահանգների ազգային անվտանգության համար կամ զբաղվում են գործունեությամբ, որը կարող է հակասել ԱՄՆ շահերին կամ արտաքին քաղաքականությանը:

«ԵրԿՄԳՀԻ-ն ապրանքներ է ստացել, որոնք ներառված են ամերիկյան «Առևտրային վերահսկողության ցուցակում», և վերստին դրանք արտահանել՝ առանց անհրաժեշտ արտոնագրերի: Ընդ որում, այս ընկերության գործադիր տնօրենը ղեկավարում է նաև սև ցուցակում ներառված հայաստանյան մյուս ընկերությունը՝ «Մարկել»-ը», - ըստ «Ազատության» ՝ ասված է հաղորդագրությունում: Ամերիկյան պաշտոնական հաղորդագրությունը պնդում է, որ «վերջինս բիզնեսով է զբաղվում իրանական կազմակերպության հետ, որն ամերիկյան պատժամիջոցների տակ է գտնվում»:
Հայաստանյան ընկերություններից բացի, պատժամիջոցների ցանկում են ներառվել ռուսաստանյան Կալուգայի գիտահետազոտական ռադիոտեխնիկական ինստիտուտը, ինչպես նաև 14 այլ ընկերություններ Վրաստանից, Բելգիայից, Միացյալ Թագավորությունից, Կանադայից, Չինաստանից ու Հոնկոնգից:

Ըստ հաղորդագրության՝ այս ընկերություններին այլևս արգելվում է Միացյալ Նահանգներից ապրանքներ ստանալ․ սահմանափակումն ուժի մեջ է մտնում այսօրվանից՝ օգոստոսի 14-ից:

Հայկական դիվանագիտությունն, ինչպես նկատում ենք, նոր «բարձունքներ» է նվաճում։ Հայաստանը հայտնվեց ամերիկյան ուղղակի պատժամիջոցների ներքո՝ Հայաստանի իշխանությունների բարձր մակարդակի պաշտոնյաների՝ Միացյալ Նահանգներ կատարած այցերից հետո։

Մեկ տեղեկություն ստացվեց, որ ԱՄՆ-ն գրեթե դադարեցնում է Արցախին տրամադրվող ֆինանսական մարդասիրական օգնությունն, այժմ էլ Հայաստանի 2 ընկերություններ հայտnվում են ԱՄՆ պատժամիջոցների տակ։
Ինչպես երևում է` սա դեռ միայն սկիզբն է։

Թամար Բագրատունի