Սամվել Ալեքսանյանը 4,3 մլրդ դրամ քիչ է վճարել պետությանը, իսկ Նիկոլ Փաշինյանը գոհ է

 Պետական եկամուտների կոմիտեն հրապարակել է 2019 թվականի առաջին կիսամյակի 1000 խոշոր հարկ վճարողների ցուցակը: 

Համաձայն հրապարակված տվյալների` Հայաստանի խոշոր հարկատուների ցուցակը շարունակում է գլխավորել «Զանգեզուրի պղնձամոլիբդենային կոմբինատ»-ը, որն այս տարվա հունվար-հունիսին պետական բյուջե է վճարել 29 մլրդ 504.8 մլն դրամ: Նախորդ տարվա համեմատ կոմբինատի վճարած հարկերն ավելացել են 5 մլրդ դրամով: Համեմատության համար նշենք, որ նախորդ տարվա առաջին կիսամյակում այս ընկերությունը վճարել էր 24 մլրդ 642 մլն 595 հազար դրամ:
Երկրորդ տեղում Վարդանյանների ընտանիքին պատկանող «Գրանդ Տոբակո» ընկերությունն է, որն ընդհանուր առմամբ պետբյուջե է վճարել շուրջ 28.2 մլրդ դրամ հարկ՝ ապահովելով դիրքային բարելավում խոշորների ցուցակում: 2018-ի առաջին կիսամյակում «Գրանդ Տոբակոն» երրորդն էր և վճարել էր 16 մլրդ 699 մլն 240 հազար դրամի հարկ: Այսինքն՝ այս տարի ընկերության վճարած հարկերն ավելացել են ավելի քան 11 մլրդ դրամով:
Երրորդ խոշոր հարկատուն «Գազպրոմ Արմենիա» ընկերությունն է՝ վճարած 22.7 մլրդ  դրամ հարկերով: Գազամատակարար ընկերությունը զիջել է դիրքերը՝ երկրորդ հորիզոնականից իջնելով երրորդ տեղ, թեպետ հարկային վճարումները նախորդ տարվա համեմատ աճել են. 2018-ի առաջին կիսամյակի համեմատ «Գազպրոմ Արմենիա» ընկերությունն ավել է վճարել մոտ 2 մլրդ դրամ (2018-ի առաջին կիսամյակի վճարումները կազմել են 20 մլրդ 736 մլն 294 հազար դրամ):
Չորրորդ տեղում «Ինտերնեյշնլ Մասիս տաբակ»-ն է՝ պետական բյուջե վճարած 9.4 մլրդ դրամ հարկերով։ Սա Վարդանյանների ընտանիքին պատկանող երկրորդ ընկերությունն է խոշորների առաջին տասնյակում: Ընդ որում, այս ընկերության հարկերը գրեթե 80 տոկոսով ավելացել են՝ «Ինտերնեյշնլ Մասիս Տոբակ» ընկերությունը 2018-ի առաջին կիսամյակում վճարել էր 5 մլրդ 839 մլն 481 հազար դրամի հարկ: Այս տարի ընկերությունը 3,5 մլրդ դրամով ավելացրել է հարկերը:

Առաջին հնգյակը եզրափակում է «ԳեոՊրոՄայնինգ» ընկերությունը՝ պետբյուջե վճարելով 9.1 մլրդ դրամ։ Նախորդ տարվա համեմատ «Գոեպրոմայնինգ գոլդը» ավել է վճարել մոտ 270 մլն դրամ (2018-ի առաջին կիսամյակում վճարել էր 8 մլրդ 871 մլն 429 հազար դրամ):
2019 թվականի առաջին կիսամյակում իրենց հարկային պարտավորությունների կատարման արդյունքում Հայաստանի խոշոր հարկատուների առաջին տասնյակում են հայտնվել նաև «Հայաստանի էլեկտրական ցանցեր» ընկերությունը, որը վճարել է 7.7 մլրդ դրամ, նախորդ տարվա նույն ժամանակահատվածի 6 մլրդ 518 մլն 982 հազար դրամի փոխարեն: Ռուսաստանաբնակ Սամվել Կարապետյանին պատկանող ընկերության հարկերն ավելացել են շուրջ 1,2 մլրդ դրամով:

Հաջորդաբար գալիս է Բարսեղ Բեգլարյանին պատկանող «Ֆլեշ» ընկերությունը, որը վճարել է 7.6 մլրդ դրամի հարկ: Նախորդ տարվա առաջին կիսամյակում «Ֆլեշը» խոշորների առաջին տասնյակում ներկայացված չէր:
Ութերորդ հորիզոնականում «Ակվիլոն Թրեյդ» ընկերությունն է՝ 6.5 մլրդ դրամ հարկերով, որը նույնպես 2018-ի առաջին կիսամյակում խոշորների տասնյակում ներկայացված չէր: Այնուհետև հաջորդում է «Ֆիլիպ Մորիս Արմենիա»-ն ՝ 5.1 մլրդ դրամ հարկերով, որը նախորդ տարվա նույն ժամանակահատվածի վճարումից պակաս է 3 մլրդ դրամով՝ 2018-ի առաջին կիսամյակում այս ընկերությունը 8 մլրդ 155 մլն 871 հազար դրամ էր վճարել: Տասնյակը եզրափակում է «Արմենիա» միջազգային օդանավակայաններ» ընկերությունը՝ 5 մլրդ 159.4 մլն դրամ վճարումով: Այս ընկերությունը նախորդ տարվա համեմատությամբ հարկային աճ է ունեցել՝ 2018-ի առաջին կիսամյակում. նա առաջին տասնյակում չէր հայտնվել:
Առաջին տասնյակից դուրս է մղվել հայտնի գործարար Սամվել Ալեքսանյանին պատկանող «Ալեքս Հոլդինգը», որն անցյալ տարվա հունվար-հունիս ամիսներին պետությանը վճարել էր 7 մլրդ 678 մլն 258 հազար դրամ հարկ և գտնվում էր յոթերորդ հորիզոնականում: Այս տարի «Ալեքս էնդ Հոլդինգն» (ըստ ամենայնի, նույն ընկերությունն է, ուղղակի անվան մեջ ավելացել է «էնդ» մասնիկը) ընդամենը 21-րդն է՝ վճարած 3 մլրդ 335 մլն դրամի հարկերով: Սամվել Ալեքսանյանի ընկերությունը, առաջին կիսամյակի տվյալներով, պետությանը քիչ է վճարել 4 մլրդ 343 մլն դրամ: Հատկանշական է, որ խոշորների ցուցակի 49-րդ հորիզոնականում ևս կա «Ալեքս հոլդինգ» անունով ընկերություն, որը պետությանը վճարել է 1,7 մլրդ դրամ հարկ: Եթե անգամ ընդունենք, որ այս երկու ընկերությունը միասին այժմ ապահովում են նախկին «Ալեքս հոլդինգ»-ի շրջանառությունը, ապա միևնույնն է՝ հարկային վճարումները դարձյալ անհամեմատ քիչ են: 

Ընդգծենք, որ եթե նման անկում արձանագրվեր նախորդ իշխանությունների ժամանակ, ապա ընդդիմադիր Նիկոլ Փաշինյանը ԱԺ-ում հանդես կգար ջախջախիչ ճառով: Իսկ այժմ նա խորհրդավոր կերպով լռում է, ավելին՝ գոհ է:

Հայկ  Դավթյան