Ադրբեջանում պահանջում են փակել հեռուստաալիքներում խոհանոցային հաղորդումները
Նավթի գների նվազման պատճառով Ադրբեջանում ստեղծված տնտեսական ճգնաժամի պայմաններում մարդիկ չեն կարողանում գնել կենսական անհրաժեշտություն ներկայացնող պարենամթերքներ: Ապառիկի տետրերում ցուցակներն օրեց օր մեծանում են:
Հաղորդումներ են հեռարձակում, ինչը եթեր է տրվում սոված մարդկանց «կշտացնելու» համար: Այդ պատճառով հանրությունը պահանջում է փակել հեռուստաալիքներով խոհանոցային հաղորդումները:
Ադրբեջանի ազգային խոհարարության կենտրոնի ղեկավար Թահիր Ամիրասլանովն այդ առնչությամբ modern.az-ին ասել է, որ եթերում հեռարձակվող խոհանոցային ծրագրերի հաղորդումները պետք է դադարեցվեն, քանի որ «դրանք մարդկանց առողջությանը վնաս հասցնելուց բացի, այլ բանի չեն ծառայում»: «Մաքուր աշխարհ» հասարակական միության ղեկավար Մեհրիբան Զեյնալովան էլ նշել է, որ իր ղեկավարած կազմակերպությունը եւս պահանջում է դադարեցնել հեռուստաալիքներով հեռարձակվող խոհանոցային հաղորդումները: «Շատ ընտանիքներում երեխաները ծնողներին խնդրում են իրենց համար պատրաստել այդ հաղորդումներում առաջարկվող ուտելիքները: Սակայն, ծնողը դա անելու հնարավորություն չունի, երեխայի մոտ իրեն մեղավոր է համարում, եւ աշխատում է ծեծելով նրան լռեցնել: Դա մեր ականատես եղած հարցերից է: Այս ժամանկաշրջանում նման հաղորդումները պետք է դադարեցվեն», -ասել է Մեհրիբան Զեյնալովան: «Թուրան» լրատվական գործակալությունն ավելի վաղ հաղորդել էր, որ մանաթի երկու անգամ արժեզրկման հետեւանքով պարենի գների 50 տոկոսից ավելի չափով բարձրանալու պատճառով եկամուտները նախկին մակարդակի մնացած քաղաքացիներն իրենց ընտանիքները կերակրելու համար սննդամթերք ձեռք բերելու նպատակով սկսել են մեկնել Ռուսաստան` սահմանամերձ Դաղստանի հանրապետություն: Այդ կերպ ստեղծված իրավիճակից փորձում են ելք գտնել հատկապես Ռուսաստանին սահմանակից ադրբեջանական Բելոքանի, Զաքաթալայի, Կախի, Շաքիի, Օղուզի (Վարդաշենի), Գաբալայի (Կուտկաշենի), Գուսարի եւ Խաչմազի շրջանների բնակիչները: Ռուսաստանցի մեծածախ առեւտրականները նշում են, որ Ադրբեջանի քաղաքացիների հոսքը սահմանամերձ շրջանների խանութներ գնալով մեծանում է: «Այսօր ադրբեջանցիների համար սովորական է դարձել խորհրդային շրջանում սնունդ հայթայթելու համար մայրաքաղաքներ «երշիկային էքսպեդիցիաների» նման արտասահման արշավները: Չնայած բոլոր դժվարություններին, որոնք պետք է հաղթահարեն Ռուսաստանի հետ սահմանակից Ադրբեջանի հյուսիսային շրջանների բնակիչները, նրանք երախտապարտ են ճակատագրին, որ բնակվում են սահմանին մոտ եւ կարող են, թեկուզ իրենց մեջքին, տուն քարշ տալ մթերքով արկղեր եւ պարկեր», -հայտնել էր «Թուրան»-ը:
Հետևեք մեզ Viber-ում
