Թուրքական «նուրբ» ակնարկ Պուտինին

Թուրքիայի նախագահ Ռեջեփ Էրդողանը խոստացել է երբեք չճանաչել Ղրիմի միավորումը Ռուսաստանի հետ։

Ըստ «Անադոլու» գործակալության, Ուկրաինայի նախագահ Վլադիմիր Զելենսկու հետ համատեղ ասուլիսի ժամանակ Էրդողանը երեկ ասել է․ - «Թուրքիան երբեք չի ճանաչի Ղրիմի ապօրինի միավորումը Ռուսաստանի հետ և շարունակելու է աջակցել Ուկրաինայի անկախությանն ու տարածքային ամբողջականությանը»։

Ասուլիսին Էրդողանը նաև ընդգծել է, որ Ղրիմի թաթարները թուրքերի եղբայրներն են և միավորում են Ուկրաինան Թուրքիայի հետ։ Թուրքիայի նախագահը հույս է հայտնել, որ հակամարտությունը Դոնբասում հնարավորինս շուտ կկարգավորվի և կկարգավորվի միջազգային իրավունքի նորմերի համաձայն։

Հիշեցնենք՝ երեկ ռուսամետ անջատականների գնդակոծությունների հետևանքով ուկրաինացի 4 զինծառայող է զոհվել: Միջադեպից հետո Ուկրաինայի նախագահը զանգահարել է Ռուսաստանի նախագահ Վլադիմիր Պուտինին և հորդորել ներազդել Ուկրաինայի արևելքը վերահսկող անջատողականների վրա՝ ռազմական գործողությունները դադարեցնելու համար։

Օգոստոս 6-ին Ուկրաինայի պաշտպանության նախարարությունը հաղորդեց, որ նույն օրը «թշնամու հարձակման հետևանքով չորս հերոսներ կորցրել են իրենց կյանքը»: Ըստ հաղորդագրության՝ երկրի արևելքում Դոնեցկի շրջանում ռուսամետ անջատականները կրակ են բացել Ուկրաինայի բանակի դիրքերի վրա` օգտագործելով ականանետեր ու գնդացիրներ: Ուկրաինայի արևելքում 2014-ի ապրիլից բռնկված հակամարտության հետևանքով ավելի քան 13 հազար մարդ է զոհվել:

Էրդողանի հետ բանակցություններին Զելենսկին Անկարային հրավիրել է մասնակցելու Դոնբասի ենթակառուցվածքի վերականգնմանը։ Նա նաև թուրքական բիզնեսին առաջարկել է գործունեություն ծավալել Ուկրաինայում՝ հավելելով, թե անձամբ է հանդես գալիս որպես երաշխավոր և կանի հնարավորը, որ թուրք գործարարների համար Ուկրաինայում հարմարավետ պայմաններ ստեղծվեն։

Նկատենք, որ Թուրքիայի նախագահը նախկինում էլ հայտարարել էր, թե չի ճանաչում Ղրիմը Ռուսաստանի կազմում, սակայն Ուկրաինայի նախկին նախագահ Պետրո Պորոշենկոյի առաջարկը՝ միանալ Ուկրաինայի արևելքում ստեղծվելիք խաղաղապահ առաքելության ձևավորմանը, չի ընդունել։

Սակայն դա ամենևին էլ չի խանգարում, որպեսզի Ռուսաստան-Թուրքիա հարաբերություններում այլ ոլորտներում խնդիրներ առաջանան։ Ավելին, այդ հարաբերություններն ավելի ու ավելի կուռ են դառնում, ընդլայնվելով։

Մետաքսյա Շալունց