Ալիևի կողմից սահմանին սադրանքները չի կարելի բացառել
Ինչպես և կանխատեսել էինք դեռ երեկ՝ պաշտոնական Բաքուն խստորեն դատապարտեց Փաշինյանի հայտարարությունը Ստեփանակերտում, երբ նա հայտարարեց՝ «Արցախը Հայաստան է և վերջ»: Ադրբեջանի նախագահի աշխատակազմի արտաքին կապերի բաժնի պետ Հիքմեթ Հաջիևն՝ այսպես է հակադարձել. «Լեռնային Ղարաբաղը՝ դա Ադրբեջան է: Դա մեր պատմական և անբաժանելի հողն է»:
Նրա խոսքով՝ նման «սադրիչ» կոչերով Հայաստանի ղեկավարությունը տարածաշրջանը դնում է լուրջ ճգնաժամի եզրին: «Թող ոչ մեկը չկասկածի, որ Ադրբեջանը կվերականգնի իր տարածքային ամբողջականությունը: Հետևանքների պատասխանատվությունը ընկնում է հայկական կողմի վրա», - ասել է Ադրբեջանի նախագահի աշխատակազմի բարձրաստիճան պաշտոնյան:
Այսպես, պաշտոնական Բաքուն Փաշինյանի հայտարարությունը որակել է որպես ագրեսիվ, այն համարելով հակասող ԼՂ հարցի կարգավորման վերաբերյալ ձգվող բանակցությունների ոգուն ու տրամաբանությանը, ինչպես նաև Հայաստանի ու Ադրբեջանի ղեկավարների վերջին հանդիպման ընթացքում արված քննարկումներին։ «Այն նաև հանդիսանում է լուրջ հարված բանակցային գործընթացին։ Այն հակասում է Հայաստանի կողմից արված հայտարարություններին՝ խնդիրը բացառապես խաղաղ ճանապարհով լուծելու վերաբերյալ։ Ստեփանակերտում Փաշինյանի ելույթը ցույց տվեց նրա իրական դեմքը»,- ասված է հայտարարության մեջ։
Ադրբեջանի ԱԳՆ-ն մեկ անգամ ևս ի լուր աշխարհի հայտարարում է, իրենք երբեք չեն հաշտվի տարածքների «օկուպացիայի» հետ, կշարունակեն ջանքերը դրանց վերադարձնելու ուղղությամբ։
Ստեփանակերտում՝ Հայաստանի և Արցախի ղեկավարությունների իրար կողքի կանգնելը, «Միացում» և «Արցախը Հայաստան» է կարգախոսները միայն թեթև առիթ էին, որպեսզի պաշտոնական Բաքուն «օրինականացնի» իր հետագա իրական ագրեսիվ պահվածքը:
Ադրբեջանի ԱԳՆ-ն խեղաթյուրված է մեկնաբանում Նիկոլ Փաշինյանի հայտարարությունը, Sputnik Արմենիայի հետ զրույցում ասել է Արցախի նախագահի աշխատակազմի ղեկավարի տեղակալ, նախագահի աշխատակազմի տեղեկատվության գլխավոր վարչության պետ Դավիթ Բաբայանը։
«Այն միացման գաղափարը, որի վրա շեշտը դրել էր վարչապետն իր ելույթում չի կարող նշանակել արցախյան պետականության ապամոնտաժում։ Դա մեր իղձերի, մեր գաղափարների, հուզական ազգային արժեքների ներքո տեղավորվող գաղափար է։ Դա չի նշանակում, որ արցախյան պետականությունը ապամոնտաժվում է, և սա քննադատելով Ադրբեջանը ասում է` տեսնում եք` խախտվում են բոլոր բանակցային ձևաչափերը։ Ադրբեջանը, պարզապես, ինչպես միշտ, այլ տեսակետից է նայում այդ գործընթացին և խեղաթյուրում Փաշինյանի խոսքերը»,- ասաց Բաբայանը։
Անդրադառնալով ադրբեջանական կողմի «ագրեսիվ ելույթ» արտահայտությանը` Արցախի նախագահի խոսնակը նշեց, որ Ադրբեջանը չի կարող խոսել ագրեսիայի մասին, քանի որ դա այն պետությունն է, որը մարդասպանին հերոսացրեց։ «Ադրբեջանը երևի մոռացել է իր ելույթները, որ թեյ է խմելու Շուշիում, մոռացել է, որ Սաֆարովին հերոսացրեց։ Դա ագրեսիա չէ՞ր, ֆաշիզմ չէ՞ր, իսկ այն, որ նշվում է` Արցախը բացառիկ արժեք է, ագրեսիա՞ է»,- նշեց Բաբայանը։ Ինչ վերաբերում է Ադրբեջանի`«օկուպացված տարածքները» վերադարձնելու չդադարող հայտարարություններին, նա կոչ արեց հնարավորինս շուտ հաշտվել այդ տարածքները կորցնելու մտքի հետ, քանի որ «նացիզմն ու ֆաշիզմը» ապագա չունեն։
Թե երբ կկազմակերպվի Փաշինյան-Ալիև հանդիպումը, ինչ պայմաններում, դեռևս հայտնի չէ: Սակայն պարզ է մի բան՝ մեկ տարի առաջ այն հույսերը, որ պաշտոնական Բաքուն կապեց Փաշինյանի հետ, այժմ լրջորեն կասկածի տակ դնելով՝ Ալիևը փորձելու է գտնել տարբերակներ հայկական կողմի վրա մեղքը գցելով՝ անցնել սադրիչ գործողությունների:
Մոտ ապագայում Ալիևի կողմից սահմանին սադրանքները չի կարելի բացառել:
Թամար Բագրատունի
Հետևեք մեզ Viber-ում
