Միհրան Պողոսյանի դեպքում էլ կգործի հայտնի սցենարը

Ազգային ժողովի նախագահ Գալուստ Սահակյանը  շարունակում է մեզ բոլորիս զարմացնել: Ի պաշտոնե հանրապետության երկրորդ դեմքը հիվանդությունից հետո էլ չի կորցրել դրայվը ու այդպիսի հայտարարություններ է արել: Նա տարակուսել է՝ ինչո՞ւ պիտի Միհրան Պողոսյանը՝ ԴԱՀԿ նախկին պետը պատասխանատվության ենթարկվի: Գալուստ Սահակյանը չի կարծում, որ Միհրան Պողոսյանի հրաժարականը կարող է իրավական հետևանքներ ունենալ,  այլ բան է, ըստ նրա՝ եթե մարդը հանցանք է կատարում, դրա համար պետք է պատասխան տա: «Մարդը պաշտոնից հրաժարվել է, ինչի՞ դրա համար պետք է պատասխան տա, ո՞ւմ պետք է պատասխան տա»,- մի քիչ էլ վրդովվել է դեռ նոր-նոր ապաքինված Գալուստ Սահակյանը:  Այս հայտարարությունը սառը ցնցուղ է  Միհրան Պողոսյանի հրաժարականով ոգեւորված որոշ խմբերի համար, որը մատնում է իշխանությունների մտադրությունը: Երեկվանից Միհրան Պողոսյանի հրաժարականը փորձ է արվում ներկայացնել իբրեւ իշխանության կողմից ձեռնարկած  լուրջ բարեփոխման մեկնարկ, հակաօլիգարխիկ պայքար ու, մանավանդ, իրականության վերաարժեվորում չորսօրյա պատերազմից հետո: Եղան նույնիսկ վերլուծություններ, թե Պողոսյանի հրաժարականին կհետեւեն նորերը: ԴԱՀԿ նախկին պետի հրաժարականի շարժառիթը պանամական օֆշորներում հայտնվելու փաստն է, որի առիթով անձամբ Պողոսյանը մի սրտաճմլիկ բացատրություն էր ներկայացրել մոտավորապես այն հիմնավորումով, թե ինքն այնքան հայրենասեր է, որ չի հանդուրժի իր եւ Ադրբեջանի նախագահի անունները նույն հարթությունում տեսնել, Ալիեւի անունը նույնպես հիշատակվում է այդ փաստաղթերում:Հենց այս ծով <հայրենասիրության> պատճառով էլ Միհրան Պողոսյանը հարկադրաբար հեռացել է իշխանական երկնակամարից՝ միեւնույն ժամանակ վերադարձի տեղ թողնելով, նա հրաժարականի գրության մեջ խոստացել է անդրադառնալ օֆշորային պատմությանը: Իրականում, ինչպես մենք արդեն ներկայացրել ենք, այս հրաժարականը բացառապես արտաքին աշխարհին ուղղված քայլ է, որով Սերժ Սարգսյանը կփորձի եւս մեկ հարթակում ընդգծել Հայաստանի ու Ադրբեջանի տարբերությունները: Այսկերպ քաղաքակիրթ աշխարհում կբարձրանա Հայաստանի ժողովրդավարական պատկերը՝ ի հեճուկս մեր հարեւանի, որտեղ ըստ մամուլի տեղեկությունների հասարակ ժողովրդին թույլ չեն տալիս հոլովվել Ալիեւի ընտրանքի հետ կապված օֆշորային սկանդալը: Իսկ երբ ջրերը պարզվեն Միհրան Պողոսյանը, ով համարվում է Սերժ Սարգսյանի սիրելիներից մեկը, կգտնի իր տեղը հիերարխիայում: Եւ ահա, այս հեռանկարի մասին գրեթե բաց տեքստով հայտարարում է իշխանության երկրորդ անձը: Լրագրողների դիտարկմանը, որ պետք է պատասխան տա օֆշորային սկանդալի համար, Գալուստ Սահակյանը  վստահ պատասխանել է, որ այդ ամենը ընդամենը մամուլով շրջանառվող լուրեր են:  Գալուստ Սահակյանը ասել է, որ  եթե պարզվի, որ նա անմեղ է, ուրեմն կարող է և այլ պաշտոնի անցնել:Փաստորեն, ինչպես միշտ, հիմա էլ գործ ունենք իշխանական այրերի կեղծ պատիրիոտիզմի դրսեւորումների,թե իբր միայն Ալիեւի հետ նույն հարթությունում չհոլովվելու համար լքում է կարեւորագույն պոստը, հարց է առաջանում, եթե Միհրան Պողոսյանը որեւէ առնչություն չուներ այդ սկանդալին, ինչու է հրաժարականի դիմում գրում՝ ըստ էության ընդունելով իր մեղքը: Այսպիսով՝ աներկբա է դառնում, որ Միհրան Պողոսյանի դեպքում էլ գործելու է հայտնի սցենարը, ինչպես շատերի, օրինակ Սուրիկ Խաչատրյանի, ով հազար ու մի սկանդալների միջով անցնելուց հետո այսօր կրկին բարձր պաշտոն է զբաղեցնում: Բնական է, որ եթե այս պարզ իրողությունը Գալուստ Սահակյանի կողմից իշխանահաճո փաթեթավորում է ստանում, ապա  հայկական բանակում 80-ականների զենքի  պատճառներ էլ կգտնվեն.«Մի՛ մտածեք, որ 80-ականների զենքը փչացած է եւ չի աշխատում: Երբ բյուջեն ենք հաստատում, փոքր քանակ է գնում դեպի զենքը, այսինքն՝ մենք այդքան մեծ բյուջեներ չունենք: Ինչը որ ունենք, հստակ պահպանվում է»,- փիլիսոփայել է ԱԺ նախագահը , իսկ հայ պաշտոնյաների հարստության ու բանակի աղքատության զուգահեռների վերաբերյալ նկատել, որ հարուստ լինելը կապ չունի զենքի ձեռք բերման հետ.«Մարդիկ երեւի իրենց բիզնեսն ունեն ու կարողանում են հարստանալ, ու չեմ կարծում, որ դա ամենավտանգավոր բանն է, որ մարդը հարստանում է, ու նրան պետք է պատժել: Եթե չարաշահումների մասին եք ասում, դրա համար կա համապատասխան բաժին, այլ ոչ թե՝ Գալուստ Սահակյանը»:Խոսքը հարստանալու ձևերի մասին է, և որ ինչպես  Միհրան Պողոսյանն, այնպես էլ իշխանության ներսում շատ շատերը  հազիվ թե հալալ քրտինքով են վաստակել իրենց միլիոնները, իսկ սա ԱԺ նախագահը  հաստատ հասկանալ չի ցանկանա: Անի Սահակյան