Գեղհովիտցիները փակել են Սելիմի ճանապարհը. ո՞վ է գողանում նրանց ջուրը, հասնելու են մինչև Փաշինյան

Hayeli.am-ը նախկինում արդեն անդրադարձել է Գեղարքունիքի մարզի Մարտունու տարածաշրջանի Գեղհովիտ համայնքի խմելու ջրի խնդրին:

Գյուղի բնակյիչներն արդեն 2 ամիս ահազանգում են, որ իրենք խմելու ջուր չունեն. Իրենց տան ծորակներից կա'մ ջուր չի գալիս, կա'մ էլ որդի, բլոջի ու հողի խառնուրդով է ջուր գալիս` առվի ջուր, որը խմելու ենթակա չէ: Օրեր առաջ նրանք փակել էին գյուղի ճանապարհը և բողոքի ակցիա իրականացրել գյուղապետարանի մոտ: Այն ժամանակ գյուղացիները մեզ ասել էին, որ եթե խնդիրը լուծում չստանա, դիմելու են կտրուկ քայլերի` փակելու են միջպետական ճանապարհը: Օգոստոսի 2-ին գեղհովիտցի կանայք փակել են իրենց գյուղով անցնող Իրան-Հայաստան Սելիմի միջպետական ճանապարհը և պահանջել, որ մարզպետն ու այլ պատասխանատուները գան գյուղ, տեղում խնդրին ծանոթանան, հարցին լուծում տան:

I

Ճանապարհով անցնողները տևական ժամանակ փորձել են համոզել բնակիչներին` բացել ճանապարհը, սակայն ապարդյուն, նրանք մնացել են անդրդվելի: Ի վերջո, Գեղհովիտ է ժամանել ոստիկանության Մարտունու բաժնի պետի պաշտոնակատար Գարիկ Գերասիմյանը և բնակիչներին համոզել` բացել ճանապարհը` խոստանալով, որ ջրի հարցը ոստիկանությունը պահելու է ուշադրության կենտրոնում: Զայրացած գեղհովիտցիները ոստիկանության ներկայացուցիչի հետ գնացել են մարզկենտրոն Գավառ, հանդիպում ունեցել ոստիկանութան Գեղարքունիքի մարզային վարչության պետ Արամ Ղազարյանի հետ: Վերջինս զանգել է մարզպետ Գնել Սանոսյանին և ներկայացրել խնդիրը` նշելով, որ ջրի խնդրի պատճառով մարդիկ միջպետական ճանապարհ են փակել, հարցը հրատապ լուծում է պահանջում: Ոստիկանության մարզային վարչության պետը նաև խոստացել է երկուշաբթի այցելել գյուղ, տեղում հասկանալ իրավիճակն ու հետամուտ լինել հարցի լուծմանը:

Ոստիկանության մարզային վարչության պետի զանգից հետո գյուղացիները մարզպետարանում կարճատև հանդիպում են ունեցել նաև մարզպետ Գնել Սանոսյանի հետ: Նա ասել է, որ շտապ խորհրդակցություն ունի և ընդամենը մի քանի րոպե կարող է հատկացնել Գեղհովիտի բնակիչներին: Հանդիպման ընթացքում մարզպետն ասել է, որ ջրի հարցի լուծումը բացառապես գյուղապետարանի տիրույթում գտնվող հարց է, և մարզպետարանն այդտեղ անելիք չունի: Մարզպետը նաև հօդս է ցնդեցրել գյուղացիների այն հույսը, թե իրենց գյուղն ընդգրկված է ինչ-որ ծրագրում, որի շրջանակում նախատեսվում է խմելու ջրի համակարգը նորոգել. <<Ձեր գյուղը որևէ ծրագրում ընդգրկված չէ>>,- ասել է մարզպետը:
Մեզ հետ զրույցում գեղհովիտցիները պատմեցին, որ բողոքի ակցիայի ընթացքում գյուղապետ Վարդան Պողոսյանը, ով հերթական անգամ վերընտրվել է մոտ 2 ամիս առաջ, այդպես էլ հարկ չհամարեց գալ մարդկանց մոտ: Ճանապարհը փակողները վստահեցնում են` ընտրությունների ժամանակ իրենք նորմալ ջուր ունեին, խնդիրներն սկսվեցին գյուղապետի ընտրվելուց անմիջապես հետո: Կասկածներ ունեն, որ գյուղապետը գաղտնի գյուղի ջուրը ծախում է ինչ-որ այլ թաղամասի կամ արտադրական օբյեկտների և հողօգտագործողների, արդյունքում իրենք մնում են առանց ջրի: Բացի այդ` գյուղի բարձրադիր հատվածում գտնվող ջրամբարը շատ հին է, նորոգման կարիք ունի, խողովակները ծակվել են, և ջրամբարի մեջ սկսել է ներթափանցել նաև գետի ջուրը, կեղտ ու հող է լցվում, և ջուրը խմելու համար պիտանի չէ:

Կարինե Մանուկյան