Հեղափոխությունը քո ստարտափը չէ. չես հավատում` Սասուն Միքայելյանին հարցրու

Վարչապետ Նիկոլ Փաշինյանը հայտարարել է, որ անցյալ տարի Հայաստանում տեղի ունեցած հեղափոխությունը քաղաքական ստարտափ էր.

«Ի սկզբանե կային փոքրաթիվ մարդիկ, ովքեր ունեին գաղափար, այն ներկայացրեցին հանրությանը, կարողացան համոզել հանրությանն այդ գաղափարի հաղթելու հեռանկարի մեջ, և ամբողջ հայությունը կարողացավ իր ներդրումն ունենալ այդ գաղափարի իրագործման գործում, ու այսօր Հայաստանում հաստատված է ժողովրդի իշխանություն: Ստարտափի գաղափարը յուրաքանչյուր քաղաքացի պետք է կարողանա տեղայնացնել իր շրջապատում: Հայաստանում շատերը բողոքում են, որ չկա փող: Մեր կառավարությունը մարդկանց փորձում է ամեն օր համոզել, որ կարևորը փողը չէ, այլ գաղափարը, և եթե յուրաքանչյուրն ունենա գաղափար, որը կարող է հաղթել, այդ փողը կհայտնվի»,- նշել է վարչապետը` ավելացնելով, որ Նոր Հայաստանի էությունը սա է:
Վարչապետի խոսքով` գործադիրի նպատակն է, որ ստարտափը Հայաստանում լինի իշխող մտածողություն, մենթալիտետ, որտեղ յուրաքանչյուր մարդ առաջինը պետք է հավատա իր ուժերին և դրա արդյունքում բոլորին կստիպի հավատալ իր ուժերին, տաղանդին, մտքին և հզորությանը: Նրա համոզմամբ` Նոր Հայաստանն, ըստ էության, մի ստարտափ է, որի ընթացքը կանգնեցնել չի լինի. «Երբ ծովի դար էր, մենք ծով չունեինք, երբ նավթի դար էր, մենք նավթ չունեինք, երբ բախտի դար էր, մենք բախտ չունեինք, 21-րդ դարն առաջին հերթին մտքի դար է, ստարտափի դար է, և մենք ունենք միտք, ու մեր միտքը միանշանակ հաղթելու է, մեր միտքն արդեն հաղթել է, որովհետև Նոր Հայաստանն առաջին հերթին մտքի հաղթանակ է: Ողջունում եմ բոլորիդ` որպես մտքի առաջամարտիկների: Մեր նպատակն է` յուրաքանչյուր քաղաքացու ոգեշնչել, որ նա դառնա մտքի ակտիվիստ և Հայաստանի Հանրապետությունը դարձնի մտքի գերտերություն»,- նշել է Նիկոլ Փաշինյանը և բացատրել, որ ստարտափն այն է, երբ որևէ մեկն ունի լավ գաղափար, բայց չունի ֆինանսական միջոցներ, գրասենյակ, և նրան հաջողվում է պոտենցիալ ներդրողներին համոզել այդ գաղափարի հաղթելու հնարավորության մեջ, և պոտենցիալ ներդրողներն աջակցում են դրա իրագործմանը` հավատալով ստարտափի հաղթանակին, և տնտեսական հեղափոխության հիմքում էլ հենց ստարտափի գաղափարը պետք է դրվի:
Մինչ ստարտափի գաղափարին անդրադառնալը, արձանագրենք մի պարզ իրողություն` ով է ասել, որ 21-րդ դարը նավթի և ծովի դար չէ: Բնավ չթերագնահատելով մտքի կարևորությունը` Փաշինյանին առաջարկում ենք ուշադիր դիտարկել նավթ ու ծով ունեցող պետությունների տնտեսական ցուցանիշները և այն համեմատել իր երևակայած ամենավառ ստարտափի առաջ բերած տնտեսական էֆեկտի հետ: Մարդկային ամենակարող միտքը դեռ չի հասել այն մակարդակին, որ մեքենաները շարժվեն առանց նավթի կամ գազի, իսկ ծովը եղել և մնում է ամենահզոր ճանապարհը դեպի այլ մայրցամաքներ, ամենահզոր բնական ռեսուրսներից մեկը:
Հիմա Փաշինյանի ասած քաղաքական ստարտափի մասին. հեղափոխության գաղափարը  իրենն էր, բայց անհրաժեշտ միջավայրը ամեն դեպքում ապահովել են նախկին իշխանությունները` ի դեմս Սերժ Սարգսյանի, ով քաղաքական հեռատեսություն չունեցավ` իշխանությունը փոխանցել յուրային ժառանգորդի, փոխարենը որոշել էր հավերժացնել սեփական իշխանությունը: Ի դեպ, հեղափոխությունից Նիկոլ Փաշինյանի թիմակից, պատգամավոր Սասուն Միքայելյանը շատ անկեղծորեն ԱԺ ամբիոնից խոստովանեց, որ ժողովրդին Նիկոլ Փաշինյանը չի հանել փողոց` այլ նախկին իշխանությունը. «Ժողովուրդը զզվում են ձեզանից և դուրս են եկել մարտնչելու»:
Այնպես որ` հեղափոխությունը Փաշինյանի ստարտափը չէ, դա առնվազն 50/50 ստարտափ է, պետք է ազնիվ լինել և այս մասին ասել: Ի դեպ, Սևանում այս ելույթը լսելուց հետո Սասուն Միքայելյանը ձայն է խնդրել և զայրացած ասել. «Հրազդանում Հրազդանմաշի նման գործարան կա, որը քանդվում է, ստարտափը էնտեղ բերեք: Հերիք ելավ, բոլ եղավ»:

Հայկ Դավթյան