Երևանցիների նյարդերի և աղբի արքան

Երևանի քաղաքապետ Հայկ Մարությանը, խոսելով «Սանիթեքի» հետ չստացված հարաբերությունների մասին, 1in.am-ին տված հարցազրույցում ակնարկեց, թե հնարավոր է` «Սանիթեք»-ը պայմանավորվածություն ունի նախկին իշխանությունների հետ:

Խոսքն ինչ պայմանավորվածության մասին է` նա չնշեց, սակայն ենթադրվում է, որ նկատի ուներ` աղբահանությունը տապալելով երևանացիներին տրամադրել քաղաքային իշխանության դեմ: Քանի որ Հայկ Մարությանն ամեն դեպքում քաղաքական գործիչ չէ, շարունակում է մնալ դերասան, պետք է նկատել, որ այս դեպքում վարպետությունը չբավարարեց և կիքս տվեց` հակասելով ինքն իրեն: Նույն հարցազրույցում նա մի քանի անգամ հայտարարեց, որ «Սանիթեքի» հետ պրոբլեմներն առաջացել էին դեռ նախորդ իշխանության ժամանակ, և որպես ապացույց` ցուցադրեց Երևանի փողոցներում կուտակված աղբի լուսանկարներ, որոնք արվել էին դեռևս նախկին իշխանության օրոք, երբ քաղաքապետը Տարոն Մարգարյանն էր: Հիմա այդ խնդիրները, ըստ Մարությանի, ավելի են խորացել: Թե ինչու և ինչպես` ինքը չգիտի:

Մինչդեռ որպես քաղքապետ` նա պետք է հենց այս հարցից սկսեր` հստակ հասկանար հարցի պատասխանը` ինչու է «Սանիթեք»-ը օրեցօր ավելի վատ աշխատում: Նախկինում արված աղբի լուսանկարները չեն կարող այս հարցի պատասխանը տալ, որովհետև աշխարհում չկա քաղաք, որտեղ օրվա մեջ մի քանի անգամ աղբակույտեր ֆիքսել հնարավոր չէ: Խնդիրը համակարգված և որոշակի հստակ գրաֆիկով աղբը տանելն է, մի բան, որ այժմ Երևանում չի արվում: Երևանում այսօր կան շենքեր, որտեղից աղբը օրերով չի տեղափոխվում, իսկ, օրինակ, Տարոն Մարգարյանի ժամանակ չկար այնպիսի շենք, որտեղից աղբն ամեն օր չտեղափոխվեր: Վատագույն ցուցանիշն այն ժամանակ երկու օրը մեկ տանելն էր, այժմ դա դարձել է լավագույն ցուցանիշ: 

Հայկ Մարությանը կարծում է, որ քաղաքի աղբահանությամբ զբաղվող «Սանիթեք» ընկերությունը պարզապես ի վիճակի չէ կատարել իր պարտականությունները: Անդրադառնալով «Սանիթեք» ընկերության հրավիրած մամուլի ասուլիսի ընթացքում հնչած այն մտքին, թե ընկերության և քաղաքապետարանի միջև ընթացող բանակցությունները դադարել են, նշեց, որ դրանք ընթացել են մինչ այն պահը, երբ ընկերության ղեկավար Նիկոլաս Էլ Թավիլը գտնվել է Երևանում: Ուստի ինքն անհասկանալի է համարում «Սանիթեքի» ղեկավարության հայտարարությունը, թե իրենք պատրաստվում են դիմել արբիտրաժային դատարան:

Հայկ Մարությանի խոսքով՝ Երևանի աղբահանության խնդիրն ինքը ժառանգել է նախորդ իշխանությունից, այն ժամանակ ևս «Սանիթեք»-ն իր տրամադրության տակ եղած շարժակազմով չի կարողացել լուծել մայրաքաղաքի աղբահանության հարցը:
«Իրենք ուղղակի չեն կարող կատարել իրենց աշխատանքը: Այն շարժակազմով, որն իրենք ունեն այս պահին, դա չեն կարող անել: Թե ինչու է այնպես եղել, որ այս շարժակազմն ու աղբամանների վիճակն ու քանակը կա, դա չեմ կարող ասել: Ըստ պայմանագրի՝ մայրաքաղաքում պետք է լինի մետաղյա 16 հազար աղբաման, այս պահին ունենք ընդամենը 90 մետաղյա աղբաման»,- ասաց Մարությանը` վստահեցնելով, որ իրենք պատրաստվում են մաքրել Երևանը՝ «Սանիթեքի» հետ, թե առանց «Սանիթեքի»:

Այս նպատակով որոշել են քաղաքային ավտոպարկ ստեղծել` պետական միջոցներով: Հայկ Մարությանի խոսքով` Երևանի նորմալ սանմաքրման համար 50-55 աղբատար է անհրաժեշտ, իրենք այս պահին 10-12-ն են ձեռք բերել: Հետաքրքիր է, թե ինչպես է ձևավորվել 50-55 թիվը: Մի կողմ թողնենք, որ անգամ այս դեպքում քաղաքապետն ու քաղաքապետարանը դեռ պետք է 5 անգամ ավելացնեն ունեցած ռեսուրսները, որպեսզի Հայկ Մարությանի ասած նորմալ վիճակին հասնենք, ու դեռ հարց է` Երևանի բնակիչների նյարդերն այդքան կդիմանան, թե ոչ:

Նախկինում, օրինակ, միայն Կենտրոն համայնքի մաքրության համար այն ժամանակվա թաղապետարանի ենթակայության տակ աշխատող սանմաքրման ձեռնարկությունում ավելի քան 25-30 մեքենա կար, ընդ որում կենտրոնական որոշ փողոցներից աղբը տեղափոխվում էր 2-3 անգամ օրական: Մոտ 10-15 աղբատար էլ սպասարկում էին Արաբկիրն ու Դավթաշենը, մոտավորապես նույնքան էլ Ավանը: Այսինքն` թվաբանական միջինով` Հայկ Մարությանի ասած 50-55 մեքենաները ամբողջ Երևանի համար բավարար չեն: Բացի այդ` 12 տարով «Սանիթեքի» հետ կնքված պայմանագիրը դեռ ուժի մեջ է, և պետական սանսեկտորի ստեղծմամբ` կարող են լուրջ խնդիրներ ի հայտ գալ միջազգային արբիտրաժում:

Հայկ  Դավթյան

Հ.Գ. Իսկ Երևանում առավոտները բացվում և օրերը մթնում են աղբի բույրով: