Ծննդյան տոներ առաջնագծում. լուսանկարներ

Երջանկությունը` ոչ թե բարեկեցիկ և ճոխ կյանքն է, այլ ջերմ, ընկերական, հասկացված փոխհարաբերություններով լի, ստեղծագործ և հանրօգուտ առօրյան: Ահա այս սկզբունքով են առաջնորդվում Արցախյան ազատամարտի մասնակից գնդապետներ, Ջերմուկի Համոն և Մասիսի Սայադն ու նրանց միասնական ջանքերով հիմնադրած «Հայդուկ» կամավորոկանների ջոկատի մարտիկներն ու աջակիցները: Այս սկզբունքից ելնելով է նաև, որ «Հայդուկին» միացած հայորդիները հենց հայդուկականների հետ են նշում իրենց ծննդյան տոներն ու հիշարժան օրերը: Առաջնագծում իրականացվող ռազմավարական նշանակության միջոցառումների շրջանակներում, «Հայդուկը» մեկ օրում նշեց իր կազմին միացածներից երեք անձի տարեդարձ` «Արփա-Սևան»-ի Կեչուտի ջրամբարի պետ, ջերմուկցի Արմեն Հովսեփյանի 51 ամյակը, երևանցի Ալեքսանդր Սուքիասյանի 41 ամյակը և գորիսցի վարորդ Համլետ Հակոբյանի ծննդյան 63 ամյակը: Վաղ առավոտից «Հայդուկ»-ի տեղակայման վայրից առաջնագիծ ուղևորվածների խումբը, մեկ մարդու նման միացավ լայնածավալ ինժիներական աշխատանքներին: Կեսօրից հետո, ջոկատի անդամները հավասարի պես նստեցին ճաշի: Հոբելյարներին ուղղված իրենց շնորհավորական խոսքում, հրամանատարները նշեցին, որ պատերազմի դաշտում, օդ ու ջրի նման անհրաժեշտ ընկերասիրության, համախմբվածության և փոխօգնության հիմքերը խաղաղ պայմաններում դրվում են միայն նմանատիպ միջոցառումների շրջանակներում: Այն որ «Հայդուկ»-ի անդամներն իրենց ծննդյան տոներն են նշում հայդուկականների հետ, լավագույն ցուցանիշներից մեկն է նրա, որ թիմային աշխատանքները դրված են ճիշտ ուղու վրա և արդեն տալիս են իրենց պտուղները. «խրամատ ենք քանդում` էլի պիտի քանդենք այնպես, որ առաջինը լինենք և ապացուցենք ամեն ինչում, որ մենք եղել ենք, կանք ու մնալու ենք»: Հայկ Կիսեբլյան