Արտահերթ քայլերի դիմելու Քոչարյանի սցենարը
Կարծում եմ` «կոնսենսուս մինուս մեկ»-ը, որպես գաղափար, արդեն ձևավորվել է քաղաքական դաշտում: Այս մասին հայտարարել է ՀՀ երկրորդ նախագահ Ռոբերտ Քոչարյանը՝ «Գոլոս Արմենիի» թերթի հետ հարցազրույցում:
Քոչարյանն առաջ է քաշել նոր ընդդիմության ձևաչափը, որը հիմնված է լինելու ընդդիմադիր քաղաքական կոալիցիայի գաղափարի վրա:
«Ընդդիմության դաշտում համախմբման համար բարեբեր հող կա: Սակայն չեմ կարծում, որ համախմբման միասնական կենտրոնը կստեղծվի միանգամից:
Այդ գործընթացներում ես կարևոր օղակ կլինեմ, սակայն ամենևին ոչ` միակը: Երկրին հարկավոր է առողջ ուժերի լայն համախմբում: Այդ գործընթացն անպայման կհանգեցնի նաև խորհրդարանական ընդդիմության արմատականացմանը, այլապես` այն կկորցնի իր ընտրազանգվածը: Աշնանն ընդդիմության դաշտում համախմբման և գործընկերության ձևավորման գործընթացը կավարտվի, և քաղաքական պայքարը կստանա համակարգված ու մասշտաբային բնույթ»,- ասել է երկրորդ նախագահը:
Իսկ իշխանության հարցը, Ռոբերտ Քոչարյանի կարծիքով, կորոշվի փողոցում` արտահերթ խորհրդարանական ընտրությունների միջոցով:
«Կառավարման այս որակով ներկայիս իշխանությունը երկար չի դիմանա և վերընտրվելու հեռանկարներ չունի: Ընտրողը լիուլի կուշտ կլինի պոպուլիստներից և ավելի պահանջկոտ կլինի ընտրություն կատարելիս: Սովորաբար, ձախողված պոպուլիստներին փոխարինելու են գալիս փորձառու, կրթված և հավասարակշիռ պրագմատիկները, այդպիսին է քաղաքական գործընթացների տրամաբանությունը: Թարմ օրինակ` Հունաստանի արտահերթ խորհրդարանական ընտրությունների արդյունքները»,- ասել է Քոչարյանը:
Այսինքն` քաղաքական ուժերի համախմբում գումարած Ազգային ժողովից առնվազն ԲՀԿ-ի քաղաքական դիրքրոշման արմատականացում. Քոչարյանն այս ֆորմատով պատրաստ է ստանձնել ընդդիմադիր գործընթացներն անգամ բանտից համակարգելու համարձակությունը:
Խորհրդարանական ուժերի արմատական ակնկալինքների շրջանակում, հնարավոր է թերևս, որ Քոչարյանն առաջ է քաշում արտահերթ քայլերի դիմելու սցենար: Խորհրդարանը, համաձայն ներկա սահմանադրության, պետք է կազմված լինի առնվազն երեք քաղաքական ուժերից: Հետևաբար, եթե այժմյան խորհրդարանի երեք ֆրակցիաներից որևէ մեկը վայր դնի մանդատները, կառաջանա ճգնաժամ, և միակ ելքը կդառնա խորհրդարանական արտահերթ ընտրությունների գնալը: Իսկ նոր ընտրությունների ժամանակ հեղափոխականներն այլևս «թրենդի» մեջ չեն լինի, նրանց փոխարինելու կգան պրագմատիկները:
Քոչարյանի քաղաքական օրակարգը, ի տարբերություն իշխանության օրակարգի, հագեցած է` իրական խնդիրներով և գաղափարներով: Ընդդիմության առաջին կարևոր խնդիրը արտահերթ ընտրությունների պահանջարկ ձևավորելն է: Այս նպատակը, ի տարբերություն իշխանության, որը հենվում է բացառապես հանրային թշնամու կերպարի ձևավորման գաղափարի վրա, ավելի բարձր է, գաղափարական և նպատակային:
Հայկ Դավթյան