Նոր գրոհ. թիրախում դատավորներն են

ՀՀ գլխավոր դատախազի պաշտոնակատարի կողմից Բարձրագույն դատական խորհուրդ է ներկայացվել միջնորդություն՝ երեք դրվագով Հայաստանի Հանրապետության քրեական օրենսգրքի 314 հոդվածի 1-ին մասի (պաշտոնեական կեղծիք) հատկանիշներով քննվող քրեական գործով դատավոր Դավիթ Գրիգորյանի նկատմամբ քրեական հետապնդում հարուցելու համաձայնություն տալու մասին:

Բարձրագույն դատական խորհուրդը, 2019 թվականի հուլիսի 26-ին քննելով միջնորդությունը, լսելով ինչպես ՀՀ գլխավոր դատախազի տեղակալ Ա․ Հարությունյանին, այնպես էլ դատավոր Դ․ Գրիգորյանին, որոշել է ներկայացված միջնորդությունը երկու դրվագներով բավարարել, իսկ մեկով՝ մերժել։ Որոշումը հրապարակվել է 2019թ. հուլիսի 27-ին։ Ելնելով վերոգրյալից՝ օրենքի ուժով կասեցվել են նաև դատավոր Դավիթ Գրիգորյանի լիազորությունները։

Դավիթ Գրիգորյանը ՀՀ երկրորդ նախագահ Ռոբերտ Քոչարյանին ազատ արձակած դատավորն է։ Մայիսին Երևանի ընդհանուր իրավասության դատարանի դատավոր Գրիգորյանը ազատ արձակեց Արցախի Հանրապետության նախագահների երաշխավորության հիմքով, այնուհետև կասեցրեց գործի քննությունը և գործն ուղարկեց Սահմանադրական դատարան։
Ավելի վաղ հայտնի դարձավ, որ Դավիթ Գրիգորյանի աշխատասենյակում խուզարկություն է իրականացվել` քննվող գործի շրջանակներում, թե որ գործի, ՀՔԾ-ից չէին հայտնում:

Մեր տեղեկություններով Նիկոլ Փաշինյանի անձնական հրահանգով դատավորների նկատմամբ նոր դիվերսիա է սանձազերծվել: Վեթթինգի ձախողումից հետո Նիկոլ Փաշինյանը տեղը չի գտնում, ամեն ինչ անում է դատական իշխանությանը ճնշելու ուղղությամբ ի հեճուկս իր հավաստիացումների, թե ազդեցություն չունի դատավորների վրա: Մասնավորապես վերջին օրերին ԱԱԾ-ի դիմակավորված աշխատակիցները ներխուժում են դատավորների ազգականների տներն ու բերման ենթարկում, կանչում հարցաքննության, քննում հազար տարվա դեպքեր, որպեսզի դուրս գան դատավորների վրա,քրեական գործերի հիմքեր գտնեն: Թիրախում են հատկապես Սահմանադրական դատարանի դատավորները: Ինչպես հայտնի է Փաշինյանը հանուն Վահե Գրիգորյանի ցանկանում է ուզուրպացնել ՍԴ-ն եւ առաջին քայլը սկսել է հենց այդտեղից: Այս ամենից հետո խոսել դատական բարեփոխումների, դատական համակարգը նորոգելու մասին, առնվազն արկածախնդրություն է:

Անի Սահակյան