Ո ՞վ է Նիկոլ Փաշինյանի՝ Երևանի քաղաքապետի պահուստային թեկնածուն

Մամուլում հաճախակի են դարձել տեղեկատվական արտահոսքերն այն մասին, որ Երևանի քաղաքապետ Հայկ Մարությանը պատրաստվում է հրաժարական տալ:

Նշվում է, որ նման քայլի դիմելու փորձեր նա արդեն արել է: Պատճառն աղբահանության կատարյալ տապալումն է: Գարշահոտ տարածող աղբակույտերի դեմ քաղաքային իշխանությունը կատարելապես անզոր է: Վարչապետ Նիկոլ Փաշինյանն իր սրտի քաղաքապետին աջակցելու համար դեռևս ապրիլին նույնիսկ ՀՀ պետական բյուջեից գումար հատկացրեց 15 աղբատար մեքենայի ձեռքբերման համար: Բայց իրավիճակը համառորեն չի բարելավվում, հակառակը՝ օր օրի վրա էլ ավելի է վատթարանում: Հեղափոխական քաղաքապետն ակնհայտորեն պարտվում է աղբի հակահեղափոխությանը, և նրա երևանյան կարգին սերիալը կարող է ունենալ անփառունակ և հոտավետ ավարտ:
«Հայաստան» համահայկական հիմնադրամի նախկին տնօրեն Արա Վարդանյանը, ֆեյսբուքյան իր էջում անդրադառնալով Հայկ Մարությանի հավանական հրաժարականի հարցին, նկատել էր, որ Կարգին Հայկոյի հրաժարականի դեպքում արտահերթ ընտրություններ չեն լինի, որովհետև նման քայլի գնալու դեպքում իշխանությունը Երևանում պարտություն կկրի ԲՀԿ-ից: Իսկ դա իշխանության իրենց պլանների մեջ չի մտնում»։
«Հաշվի առնելով այն հանգամանքը, որ նման զարգացում պլանավորված չէր, իշխանությունները չեն բերել ավագանու մեջ գեթ մեկ այլ պոտենցիալ քաղաքապետի թեկնածու, իսկ քաղաքապետ կարող է լինել միայն ավագանու գործող անդամը։
Կարծում եմ, որ միակ լուծումը որին կհանգեն իշխանությունները, դա ներկայիս կենտրոնի թաղապետ՝ Վիկտոր Մնացականյանին Երևանի քաղաքապետի պաշտոնակատար նշանակելն է։
Նա կշարունակի մնալ պաշտոնակատար մինչ մյուս հերթական ընտրությունները։ Ասեմ ավելին՝ օրենքի տեսանկյունից սա անհնարին է։ Բայց դե ինչ օրենք, ինչ բան»,- գրել էր Արա Վարդանյանը:
Զուտ իրավական տեսանկյունից՝ քաղաքապետի հրաժարականը չի կարող հանգեցնել Երևանի ավագանու նոր ընտրությունների: Քաղաքապետի հրաժարականի դեպքում ավագանին իր կազմից ընտրում է նոր քաղաքապետի: Ի դեպ, Երևանի առաջին ավագանու գործունեության ընթացքում նման նախադեպ երկու անգամ եղել է: Երևանի առաջին ընտրովի քաղաքապետ Գագիկ Բեգլարյանի հրաժարականից հետո Երևանի այն ժամանակվա ավագանին քաղաքապետ ընտրեց Կարեն Կարապետյանին, ով այն ժամանակ զբաղեցնում էր Հայռուսգազարդի տնօրենի պաշտոնը, իսկ հետագայում ճակատագրի բերումով դարձավ ՀՀԿ-ական վերջին վարչապետը: Կարեն Կարապետյանը, սակայն, Երևանի քաղաքապետի պաշտոնում երկար չաշխատեց: Ընդամենը 11 ամիս անց նա հրաժարական ներկայացրեց, ինչից հետո ավագանին, որտեղ բացարձակ մեծամասնություն ուներ ՀՀԿ խմբակցությունը, քաղաքապետ ընտրեց Տարոն Մարգարյանին:
Ընդհանրապես, ռեալ քաղաքական մեծամասնության ձգտող ուժերը, Երևանի ավագանու խմբակցության կազմում, որպես կանոն, քաղաքապետի մի քանի պահուստային թեկնածու են ունենում՝ հաշվի առնելով, որ օրենքով Երևանի քաղաքապետ կարող է ընտրվել միայն Երևանի ավագանու անդամը: Այն ժամանակ ՀՀԿ-ն, փաստորեն, նույն ավագանու կազմից առնվազն երեք քաղաքապետ ընտրեց. Գագիկ Բեգլարյան, Կարեն Կարապետյան, ապա նաև Տարոն Մարգարյան, թեպետ ցանկում կային այլ թեկնածուներ ևս: Հաջորդաբար ևս ստվերային թեկնածուներ մշտապես եղել են: Հեղափոխական իշխանությունն ի սկզբաե ավագանու բավականին հզոր կազմ էր ներկայացրել:

Հայկ Մարությանի՝ քաղաքապետ ընտրվելուց հետո ավագանու կազմի քիչ թե շատ փորձառու բոլոր գործիչները՝ Ալեն Սիմոնյան, Զարուհի Բաթոյան և այլն, լքեցին ավագանին, քանի որ ստացան պատգամավորի մանդատ: Հայկ Մարությանի հրաժարականի դեպքում Նիկոլ Փաշինյանը թերևս ստիպված կլինի կա՛մ քաղաքի ղեկը վստահել որևէ անփորձ և անկարող յուրայինի, կա՛մ էլ գուցե կգնա ոչ ստանդարտ քայլի: Օրինակ՝ նա կարող է քաղաքապետի թեկնածուի պորտֆելն առաջարկել ավագանու ԲՀԿ թեկնածուին՝ կազմելով քաղաքային կոալիցիա: Գագիկ Ծառուկյանի տնտեսական ռեսուրսները կարող են փրկել երևանցիներին աղբի հակահեղափոխությունից:

Հայկ  Դավթյան