Կեղտոտ գործարք՝ ՍԴ-ն ստամբուլյան կոնվենցիայի դիմաց

Սահմանադրական դատարանի շուրջ նոր զարգացումներ են ընթանում: Նիկոլ Փաշինյանի ու իր թիմի մոտ երկրորդ շնչառությունն է բացվել: ՍԴ-ի մասին ով չի ալարում իր հեղինակավոր կարծիքն հայտնում, կոչ անում ՍԴ նախագահին հրաժարական տալ: ՍԴ-ի դեմ Վահե Գրիգորյանի սկսած արշավից ու Վենետիկի հանձնաժողովի կոշտ զեկույցից հետո սպասվում էր, որ Նիկոլ Փաշինյանի ու թիմի ախորժակը կզսպվի, որոշակի ժամանակ լռություն կպահպանեն: Քանզի Վենետիկը փաստել է, որ ՍԴ դատավոր եւ անդամ տարանջատումը մտացածին է։ Հանձնաժողովը լիազորել է նաեւ հանձնաժողովի նախագահ Զ. Բուքիքիոյին՝ հետեւել այս հարցի շուրջ զարգացումներին եւ ըստ անհրաժեշտության՝ մինչեւ հոկտեմբեր հանդես գալ հրապարակային հայտարարությամբ: Բուքիքոյի հայտարարությանը չսպասելով նշված զեկույցից մի քանի օր անց հարցազրույց տվեց Նիկոլ Փաշինյանը: Նա ավելի կոշտ գնահատականներ հնչեցրեց ՍԴ-ի եւ Հրայր Թովմասյանի մասին, քան դա արել էին լեւոնտերպետրոսյանական տխրահռչակ կադրերը՝ Վահե Գիգորյանն ու Գագիկ Ջհանգիրյանը: Փաշինյանն ասաց.«Մենք չունենք այս Սահմանադրական դատարանը, որովհետև նոր Սահմանադրությունը ուժի մեջ մտնելուց 40 օր առաջ ՍԴ երկարամյա նախագահ Գագիկ Հարությունյանը հրաժարական տվեց, ինչպես հետագայում պիտի պարզվեր՝ ներիշխանական մանիպուլյացիայի արդյունքում. տեղի ունեցավ մեծ առևտուր, որտեղ մի քանի առանցքային դեմքեր ստանում էին իրենց հասանելիքը՝ Սերժ Սարգսյանը՝ վարչապետի, Գագիկ Հարությունյանը՝ ԲԴԽ նախագահի պաշտոնը»: Նա ասաց, որ 2019 թվականի Հաայստանը պետք է ունենա 2019 թվականին համապատասխան ՍԴ: Թե ինչ քայլեր պիտի տարվեն այդ ուղղությամբ, Փաշիյանն ասաց.
«Կարծում եմ, որ առաջիկայում գուցե ՍԴ հետ պիտի խոսի ԱԺ-ն, կամ չգիտեմ փորձագիտական հանրությունը, բայց ՍԴ-ն այս սեփականաշնորհված «բուդկայի» կարգավիճակից պետք է դուրս գա»:

Տրամաբանությունը հուշում էր, որ առնվազն մինչեւ սեպտեմբեր իշխանությունը կլռի՝ սպասելով Բուքիքիոյի հայտարարությանը, որը կստեղծեր ամբողջական պատկեր հանձնաժողովի շուրջ: Բայց տեղի ունեցավ հակառակը. զեկույցից մի քանի օր հետո Փաշինյանն ու իր պատգամավորները նոր շնչով սկսեցին ՍԴ-ի դեմ պայքարը:

Իշխանության վարքագիծը քաղաքական շրջանակներում բացատրում են հետեւյալով՝ Նիկոլ Փաշինյանին հաջողվել է փոխզիջման գնալ ՍԴ-ի շուրջ, ինքը կուզուրպացնի ՍԴ-ն, իսկ Վենետիկի հանձնաժողովը աչք կփակի դրա վրա, քանի որ Փաշինյանը դրա դիմաց կվավերացնի ստամբուլյան կոնվենցիան : Իհարկե, դժվար է հավատալ, որ միջազգային հեղինակավոր այս կառույցը կգնա նման գործարքի, բայց հաշվի առնելով , որ նույն կառույցը երբեմն ողջունում էր նաեւ ՀՀԿ-ի նախաձեռնությունները, ապա ամեն ինչ սպասելի է:

Անի Սահակյան