Ալիեւն ու նրա ռեժիմը սպառնալիք են. Ռոշբլուան

Ադրբեջանի զինված ուժերն անընդունելի դաժանություն գործեցին Լեռնային Ղարաբաղի քաղաքացիական բնակչության՝ կանանց, երեխաների եւ տարեցների նկատմամբ: Այս մասին ապրիլի 19-ին Եվրախորհրդի Խորհրդարանական վեհաժողովի (ԵԽԽՎ) գարնանային նստաշրջանի աշխատանքային երկրորդ օրվա ընթացքում հայտարարել է ֆրանսիացի պատգամավոր, Եվրոպական ժողովրդական կուսակցության անդամ Ֆրանսուա Ռոշբլուանը: Նրա խոսքով, որոշակի ժամանակահատվածում աշխարհը հետեւում էր Լեռնային Ղարաբաղում շփման գծում բախումներին: «Բազմաթիվ ողբերգական միջադեպեր հաճախ ընդհատվում էին նախագահ Ալիեւի խոսքերով, խոսքեր, որոնք արտահայտում էին 1994 թվականից գործող հրադադարը խախտելու նրա ցանկության մասին: Ի վերջո նա արեց դա: Ադրբեջանի զինված ուժերը հարձակումը սկսեցին Լեռնային Ղարաբաղի հյուսիսից: Նրանց համար բավարար չէին իրենց դիմակայող զինծառայողների շրջանում զոհերն ու վիրավորները, նրանք նաեւ անընդունելի դաժանություն գործեցին քաղաքացիական բնակչության՝ կանանց, երեխաների եւ տարեցների նկատմամբ»,- նշել է Ֆրանսուա Ռոշբլուանը: Ֆրանսիացի պատգամավորի խոսքով, նրանցից շատերի մարմիններն այլանդակվեցին: «Դրանում է կայանում այն, ինչն Ալիեւը համարձակվում է «վերանվաճում» կոչել: Ի՞նչ կարելի է ակնկալել այդպիսի առաջորդից: Պարոն Ալիեւն ու նրա ռեժիմն այնքան են վախենում ճշմարտությունից, որ ամեն օր հնարավոր բոլոր միջոցներով խախտում են ազատ արտահայտվելու իրավունքը: Նրանք սպառնալիք են աշխարհի այդ հատվածի անվտանգության համար»,- ընդգծել է նա: