Խոշոր ավտովթար Լոռու մարզում. բախվել են Москвич-ն ու Ford-ը. վերջինս էլ բախվել է հաստաբուն ծառին

Այսօր, հուլիսի 24-ին, խոշոր ավտովթար է տեղի ունեցել Լոռու մարզում: Ժամը 10:30-ի սահմաններում Վանաձոր-Սպիտակ ավտոճանապարհին, Վանաձոր քաղաքի վերջնամասում բախվել են Москвич մակնիշի 34 VL 637 համարանիշի և Ford Transit մակնիշի 22 ԼԼ 457 համարանիշի ավտոմեքենաները: Ինչպես հայտնում է ֆոտոլրագրող Գագիկ Շամշյանը, բախման հետևանքով Ford Transit-ը կորցրել է կառավարումն ու բախվել հաստաբուն ծառին: Վթարի հետևանքով երկու մեքենաների վարորդները տեղափոխվել են Վանաձորի բժշկական կենտրոն: Ford-ի վարորդին ավտոմեքենայից դուրս են բերել քաղաքացիներն ու վթարի վայրի հարևանությամբ ծառայություն իրականացնող Ոստիկանության Վանաձորի Տարոնի բաժնի ծառայողներն ու Ճանապարհային ոստիկանության 2-րդ սպայական գումարտակի 5-րդ վաշտի 1-ին դասակի ծառայողները, ովքեր նշված հատվածում ծառայություն իրականացնելիս են եղել: Օպերատիվորեն դեպքի վայր են ժամանել Լոռու մարզային փրկարարական վարչության Վանաձորի հրշեջ-փրկարարները, վարչության պետ, գնդապետ Սերոբ Գաբրիելյանի գլխավորությամբ: Դեպքի վայր են ժամանել Ճանապարհային ոստիկանության 2-րդ սպայական գումարտակի 5-րդ վաշտի 1-ին դասակի ծառայողները՝ դասակի հրամանատար Գարիկ Մարտիրոսյանի գլխավորությամբ: Փաստի առթիվ ՃՈ հետաքննիչ Արմեն Պետրոսյանի կողմից նյութեր են նախապատրաստվում: Ոստիկանությունը պարզում է վարորդների ինքնությունը: