Մարտունիում բունտ է հասունանում. կլինեն կտրուկ քայլեր

Գեղարքունիքի մարզի Մարտունու տարածաշրջանի Գեղհովիտ համայնքում բունտ է հասունանում: Պատճառը խմելու ջրի խնդիրն է, որը գնալով ավելի է խորանում:

Գյուղացիները կա'մ մեծ մասամբ ջուր չեն ստանում ջրի սակավության պատճառով, կա'մ էլ եթե ստանում են, ապա կեղտոտ ու հողոտ ջուր: Այս մասին Hayeli.am-ին պատմեցին «Քաղաքացիական ակտիվիստենրի հակակոռուպցիոն խումբ» հասարակական կազմակերպության ներկայացուցիչները` նշելով, որ գյուղի բնակիչները խնդրով ահազանգել են պատկան մարմիններին, դիմել են նաև իրենց:
Մենք ևս կապվեցինք զայրացած գեղհովիտցիների հետ, ովքեր պատմեցին, որ ծորակներից կա'մ ջուր չի գալիս, կա'մ էլ որդի, բլոջի ու հողի խառնուրդով է ջուր գալիս: Նրանց խոսքով` խնդիրն առաջացել է մոտ մեկ տարի առաջ: Գյուղի բարձրադիր հատվածում է գտնվում ջրամբարը, որտեղ հավաքվում է սարերի աղբյուրների ջուրը, այնտեղից էլ սնվում է գյուղի ջրի համակարգը: Խնդիրն այն է, որ ջրամբարը շատ հին է, նորոգման կարիք ունի, խողովակները ծակվել են, և ջրամբարի մեջ սկսել է ներթափանցել նաև գետի ջուրը, որը խմելու համար պիտանի չէ:

Գյուղացիների պատմելով, երբ անցյալ տարի խնդիրն ի հայտ եկավ, իրենց ասվել էր, թե գյուղն ընդգրկված է ինչ-որ ծրագրում, որի շրջանակում նախատեսվում է խմելու ջրի համակարգը նորոգել: Բայց ծրագիրն այդպես էլ չի իրագործվել, ավելին` այս տարի այդ մասին այլևս խոսք չկա: Օրեր առաջ գյուղացիները բողոքի ակցիա էին կազմակերպել և փակել գյուղի ճանապարհը. «Գիշերն ընդամենը երկու ժամով են ջուրը տվել, ամբողջ օրը ջուր չենք ունենում»,- բողոքում են նրանք: Համայնքապետ Վարդան Պողոսյանը, լուծում առաջարկելու փոխարեն, ասել է, որ կարող են բողոքել` որտեղ ուզում են, որովհետև մեղավորը գյուղացիներն իրենք են` որոշները շատ են ջուր են օգտագործում, մնացածին չի հասնում:
Գյուղացիներն այժմ բորբոքված են և մտածում են կտրուկ քայլերի դիմելու մասին` քննարկում են միջպետական ճանապարհը փակելու, Գեղարքունիքի մարզպետի և տեղացի պատգամավորների ուշադրությունը խնդրի վրա սևեռելու մասին: Պատրաստվում են դույելրի մեջ լցնել իրենց տան ծորակներից հոսող աղտոտ ջուրը և առաջարկել, որ մարզպետն ու պատգամավորները համտեսեն այն: Մեր հարցին, թե որն է իրենց պատկերացրած լուծումը, գեղհովիտցիները պատասխանեցին, որ լուծումը ջրի համակարգի նորոգումն ու մաքրման կայանի տեղադրումն է. «Վերջիվերջո, մենք իրավունք ունենք մաքուր ջուր ունենալ և պատրաստ ենք պայքարել այդ խնդրի լուծման համար»,- նշեցին նրանք: