Известия-ի բացահայտումը ԼՂ հակամարտության ռուսական կարգավորման պլանի մասին
ՌԴ-ն և անձամբ ՌԴ նախագահ Վլադիմիր Պուտինը ակտիվորեն կնպաստեն ԼՂ հակամարտության շուրջ բանակցություններում փոխզիջում գտնելուն, որոնք պետք է կայանան մոտ օրերս, Известия-ին հայտնել է դիվանագիտական շրջանակներում աղբյուրը: Պուտինը, ըստ աղբյուրի, մասնավորապես, պատրաստ է անձամբ երկու կողմերի քաղաքական գործիչների հետ քննարկել փոխզիջումների անհրաժեշտությունը: Ընդ որում՝ երբ խոսքը գնում է շփման գծում լարվածության նվազեցման մասին, ոչ մի կողմ պատրաստ չէ դիմել զիջումների: «Հենց խոսքը գնում է ռազմական գործողությունների դադարեցման մասին, երկու կողմն էլ պատրաստ է նստել բանակցային սեղանի շուրջ: Սակայն միանգամից հիշվում են փոխադարձ հավակնությունները, ու տարածքային հարցերը դառնում են անլուծելի: Սպասվում են ծանր բանակցություններ, ու առանց Ռուսաստանի օգնության չի հաջողվի հարցը լուծել»,- հայտնել է «Իզվեստիային» աղբյուրը: Նշվում է, որ Պուտինը պատրաստ է անձամբ համոզել երկու կողմի քաղաքական գործիչներին փոխզիջման անհրաժեշտության մեջ: Աղբյուրի խոսքերով՝ հակամարտության կարգավորման ռուսական պլանը հետևյալն է՝ վերադարձնել Ադրբեջանին տարածքի մի մասը, խաղաղապահներ մտցնել հակամարտության գոտի, վերադարձնել փախստականներին և լեգիտիմացնել Ղարաբաղը (այսինքն՝ ապահովել սահմանների բաց լինելը և վերականգնել տնտեսական կապերը), այնուհետև, երբ կրքերը հանդարտվեն, հանրաքվե անցկացնել: Սակայն կողմերից ոչ մեկը չի ցանկանում համաձայնել այդ պլանին, եթե հանրաքվեի արդյունքն իր օգտին չլինի: