Նիկոլ Փաշինյանը շատ լուրջ մտածելու բան ունի

Նախօրեին Իջևանում տեղի ունեցած իրադարձությունները մտահոգվելու շատ լուրջ տեղիք պետք է տան իշխանությանը և առաջին հերթին վարչապետ Նիկոլ Փաշինյանին:

Երբ ճանապարհ փակող ժողովուրդն ու տեղում օրինականություն հաստատող ոստիկանությունը բախվում են` երկու կողմից տուժածներ և վիրավորներ են տեղափոխվում հիվանդանոց, անկախ պատճառներից` կատարվածի պատասխանատուն օրվա իշխանությունն է` այդպես էր նախկինում, այդպես և այսօր, այդպես լինելու է վաղը: Պատճառներն ավելի խորն են, քան Իջևանի անտառներից վառելափայտ տանել-չտանելու հարցը: Եթե իշխանության տված նոր լուծումները չեն ընկալվել քաղաքացիների կողմից, այն քաղաքացիների, որոնք մեկ տարի առաջ հրապարակում կանգնած իշխանության բերեցին հեղափոխականներին, կնշանակի իշխանությունը ինչ-որ բան ինչ-որ տեղ ճիշտ չի արել:

Այս համատեքստում առնվազն տարակուսելի են որոշ իշխանավորների այն մեկնաբանությունները, թե իջևանյան դեպքերը նախկին իշխանությունների կողմից կազմակերպված սադրանք էին: Ճիշտ այն պահին, երբ Իջևանում գազազած բողոքավորները քարերով ջարդում էին ոստիկանների գլուխները, Նիկոլ Փաշինյանը Ազատություն ռադիոկայանի եթերում հայտարարում էր, թե նախկինները բացարձակ հանրային հենարան չունեն, և իշխանության վարկանիշն ամենևին էլ չի նվազել: Տրամաբանության տեսանկյունից անհասկանալի է` ինչպես կարող են հանրային հենարան չունեցող նախկինները նման սադրանք կազմակերպել` այն էլ վարչապետի ծննդավայր Իջևանում: Սա առնվազն նշնակում է, որ Նիկոլ Փաշինյանը շատ լուրջ մտածելու բան ունի:

Կառավարության նիստում Իջևանի թեմայով վարչապետի խոսքից հստակ երևոմ էր, որ նա խնդրի լրջությունը շատ խորությամբ հասկանում է: Պատահական չէ, որ Իջևանի բախման հետևանքները կարգավորելու, թերևս նաև նոր զարգացումների կանխումն ապահովելու գործը հանձնարարվել է Ազգային անվտանգության ծառության պետ Արթուր Վանեցյանին: Եթե տեղի ունեցածը սովորական հանրային ընդվզում լիներ, հազիվ թե դրան ԱԱԾ-ն խառնվեր: Վանեցյանը տեղում իրավիճակին ծանոթանալուց հետո տավուշցիներին ուղերձ հղեց, որ առաջիկայում օրենսդրական փոփոխություն կարվի, կթույլատրվի անտառում ժամանցի գոտիներ ստեղծել ու դրա շնորհիվ գումար վաստակել: Ըստ Վանեցյանի` անտառից դուրս թողնվող փայտն էլ տեղական մարմինների կողմից կկուտակվի անտառից դուրս հատուկ գոտում, որտեղից կբաշխվի բնակչությանը` համաձայն համապատասխան ընթացակարգի:

Ծառահատումների և վառելափայտի, անտառային տուրիզմ զարգացնելու հարցերը Արթուր Վանեցյանի առաջնային գործառույթներից չեն: Դրա համար բազմաթիվ այլ պետական մարմիններ կան: Ոստիկանության և ժողովրդի բախման իրավական գնահատականները տալու համար էլ կա Հատուկ քննչական ծառայություն, որը պետք է զբաղվի հանցավոր արարքների բացահայտմամբ: Սակայն իշխանությունն զգացել է վտանգը և ԱԱԾ-ին ուղարկել է Իջևան: Փաշինյանը շատ լավ հասկացել է, որ սուպերնախարար Սուրեն Պապիկյանի զավեշտալի հայտարարությունը` օրական 10 հազար դրամ աշխատավարձով ավելի քան 200 թափուր աշխատատեղերի մասին, փրկություն չեն: Խնդիրն ավելի լուրջ է, քան վառելափայտը: Իշխանությունը հասկացել է, որ սկսում է գործել բումերանգի կանոնը: Իշխանության ես եկել փողոց փակելով, ուրեմն պատրաստ եղիր, որ քո դեմ նույնպես փողոց են փակելու: Ազատություն ես տվել ՊՊԾ գնդի գրավման մասնակիցներին, ովքեր ծառայողական պարտականությունները կատարող ոստիկանի են սպանել, ուրեմն պատրաստ եղիր` գտնվելու են մարդիկ, ովքեր քարերով ջարդելու են ոստիկանների գլուխները: Իսկ քարով հարվածել ոստիկանին` կնշանակի ջարդել իշխանության և վարչապետի գլուխը:

 Հայկ  Դավթյան