«Կարկանդակներ» Բաքվից՝ հայ ժողովրդին

Ադրբեջանի բանակը հուլիսի 17-ի գիշերը Նախիջևանի հատվածում կրակոցներ է արձակել հայ դիրքապահների ուղղությամբ՝ խախտելով հրադադարի ռեժիմը: «Արմենպրես»-ի հետ զրույցում այս մասին ասել է պաշտպանության նախարարի մամուլի խոսնակ Արծրուն Հովհաննիսյանը: «Փամփուշտներից մեկն ընկել է Ելփին գյուղի տներից մեկի կտուրը: Հայկական կողմը պատասխան կրակ է բացել հակառակորդի ուղղությամբ»,- ասաց Հովհաննիսյանը: 

Այս ֆոնին, Ադրբեջանի արտգործնախարար Էլմար Մամեդյարովը նախօրեին Բաքվում ընդունել է Ադրբեջանի, Վրաստանի և Թուրքիայի խորհրդարանների արտաքին հարաբերությունների հանձնաժողովների ղեկավարներին և քննարկել ղարաբաղյան հակամարտությունը:

Ադրբեջանական աղբյուրների փոխանցմամբ Սամեդ Սեիդովի, Սոֆիո Կացարավայի, Վոլկան Բոզքըրի հետ զրույցում Մամեդյարովը համոզմունք է հայտնել, թե «ղարաբաղյան հակամարտության կարգավորման դեպքում հայ ժողովուրդը կարող է օգուտ քաղել տարածաշրջանում իրականացվող խոշոր նախագծերից»:

Ըստ ադրբեջանական կողմի պաշտոնական հաղորդագրության թուրք և վրաց խորհրդարանականները կարևորել են տարածաշրջանում հակամարտությունների կարգավորման կարևորությունը՝ միջազգային իրավունքի սկզբունքների, մասնավորապես՝ «միջազգային ճանաչված սահմանների և պետությունների տարածքային ամբողջականության» շրջանակներում:

Ադրբեջանը, կարծես, պաշտոնապես փորձում է Հայաստանի հարևանների միջոցով նպաստել Արցախի հարցի՝ ադրբեջանամետ լուծման պահանջի տարածմանը: Մյուս կողմից նրանք Հայաստանի հասարակությանը «կարկանդակ» են կարծես ցույց տալիս՝ տարածաշրջանային ծրագրերից հայ ժողովուրդը չի կարողանում օգտվել:

Այսօր էլ Ադրբեջանի պետական սահմանապահ ծառայությունը (ՊՍԾ) տեղեկություն է տարածել, թե հուլիսի 18-ին գիշերը ժամը 00։20–ին Ղազախի ուղղությամբ հայկական կողմի գնդակից վիրավորվել է ՊՍԾ զինծառայող Ջեյհուն Բայրամովը։

Ըստ ադրբեջանական աղբյուրի՝ վիրավորին ցուցաբերվել է բժշկական օգնություն, այժմ նրա կյանքին վտանգ չի սպառնում։ Ադրբեջանական կողմը պնդում է, որ հայերը Տավուշի մարզի Զորական* գյուղից գիշերը խոշոր տրամաչափի զինատեսակներից կրակել են ադրբեջանական դիրքերի ուղղությամբ։ Դեպքի վայր է մեկնել ՊՍԾ պետ Էլչին Գուլիևը։

Ընդհանուր առմամբ՝ իրավիճակը սահմաններում, փաստացի մնում է կիսալարված: Ադրբեջանական կողմը հայկական կողմին մեղադրելու «նուրբ» քաղաքականություն է տանում, իսկ դա նշանակում է, որ ամեն պահի կարող է բռնկվել ավելի լարված փուլ շփման գծում:

Մետաքսյա Շալունց