Նիկոլ Փաշինյանը «տանկեր» է հանում ՍԴ-ի վրա

Որ Նիկոլ Փաշինյանի իշխանության «լոկոմոտիվը» ՀՀ երկրորդ նախագահ Ռոբերտ Քոչարյանի հարցն է, ու կմնա վերջինս կալանքի տակ, Փաշինյանը կհամարի որ հաջողել է, երկրում ամեն ինչ ավելի քան լավ է, կհայտնվի ազատության մեջ, ուրեմն Փաշինյանին նոր ջղաձգումներ են սպասվում, համոզվել ենք անցած ամիսներին։ Նա Քոչարյանի գործի «պրիզմայով» է կառուցում պետության արտաքին քաղաքականության գիծը, այս հարցով է որոշում պետության տնտեսական, սոցիալական, բոլոր ռազմավարությունները։ Բայց որ Քոչարյանի հարցը այնքան կսրվեր պետության ղեկավարի մոտ, որ նա հակասահմանադրական գործողությունների կգնար ու կսպառնար սեփական ժողովրդին, գոնե այսքան շուտ չէինք սպասում։

Նիկոլ Փաշինյանը «Ազատության» հետ վերջին հարցազրույցի առանցքում կրկին պահեց ՀՀ երկրորդ նախագահ Ռոբերտ Քոչարյանի թեման։ Ավելին, նա երկրորդ նախագահի վերաբերյալ իր գնահատականնրում տեղ-տեղ դուրս եկավ ափերից եւ սպառնալից հայտարարություններ արեց քաղաքացիների՝ Քոչարյանի աջակիցներին ուղղված։ Հարցին, ինքը համամիտ է հասարակական որոշ շրջանակների հետ, որոնք Քոչարյանին համարում են քաղբանտարկյալ, պատասխանեց․ «Ովքեր ասում են, որ Ռոբերտ Քոչարյանը քաղբանտարկյալ է, ասում են, որ այսօր ես իրավունք ունեմ ՀՀ ԶՈւ-երը, տանկերը մտցնել Երևան քաղաք և ցանկացած ընդդիմադիր դրսևորում տանկերի թրթուրների տակ ճզմել: Եթե ես կամ որևէ մեկը իրավունք չունի այդպիսի բան անելու, ուրեմն Ռոբերտ Քոչարյանը չի կարող քաղբանտարկյալ լինել: Եթե նա քաղբանտարկյալ է, մենք ասում ենք՝ տենց ա Հայաստանում, երբ տեսանք, որ իշխանությունը կորցնում ենք, ի՞նչ խնդիր կա, տանկերը բոլոր տեղերից կվերցնենք կմտցնենք Երևան, դե եկեք վերցրեք իշխանությունը, տեսնենք ոնց եք վերցնում», - ասաց նա:

2008 թվականի մարտյան իրադարձությունների ժամանակ Երևան տանկեր չեն մտել։ Փաշինյանը չի ծառայել բանակում եւ միգուցե ճշտի իր պաշտպանության նախարարից, Հայաստանում միայն Լևոն Տեր-Պետրոսյանի օրոք են տանկեր մտել Երևան։ Երկրորդ՝ ինչ նկատի ունի, երբ ասում է, որ «իշխանություն են վերցնում», ինչպես էր դա արտահայտվում, ընտրություններին գրանցված տոկոսներո՞վ, թե փողոցում անկարգություններ հրահրելով, ոստիկանների,պետական գերատեսչությունների, կառույցների ուղղությամբ հարձակվելու, խանութները ջարդուփշուր անելու, թալանելու ընդդիմադիր լիդերների կոչերով եւ այլն։

Սակայն առավել ուշագրավ է նրա ակնարկը, որ իշխանությունը կորցնելու վտանգի ժամանակ ինքը կարող է տանկեր դուրս բերել մայրաքաղաքի փողոցները։ Չենք ուզում պատկերացնե, թե ինչ կաներ Փաշինյանը Քոչարյանի իրավիճակում․ դեռ չհայտնված՝ Նիկոլ Փաշինյանը գրեթե «տանկեր» է դուրս բերում երկրի Սահմանադրական դատարանի վրա, որը մնացել է այն անառիկ կառույցը, որը գործում է ոչ թե Նիկոլ Փաշինյանի կամքով ու իր ճաշակով ձեւավորված կադրերով, այլ նախկին իշխանության ժամանակ ընտրված դատավորներով։ Եւ հիմա Նիկոլ Փաշինյանը իր սուրբ պարտքն է համարում այն իր սրի տակ վերցնել, քանի որ կասկածներ ու մտասեւեռումներ ունի, որ Քոչարյանի գործով իրեն ոչ հաճո որոշումներ կկայացվեն, այդ պատճառով ամբողջ թիմը մոտիվացրել է ՍԴ-ի դեմ, ողջ էներգիան, ռեսուրսը վատնվում է այնտեղ իշխանափոխություն իրականացնելու, յուրայիններով լցնելու ուղղությամբ։

Ուշագրավ է, որ Վենետիկի կոշտ զեկույցից հետո էլ Փաշինյանը հեռու չի մնում ՍԴ-ից ու պնդում է, որ ՍԴ անդամներն ու նախագահը պետք է հրաժարական տան։ Եթե սա ավտորիտարիզմ չէ, բռնապետություն չէ, բա ի՞նչ է, էլ ինչ պետք է անի պետության ղեկավարը, որ հասկանան նա դիկտատոր է։

Անի Սահակյան