Ներիշխանական գզվռտոց․Սորոսի հերթական պարտությունը

Աշխատանքի և սոցիալական ծառայության նախարար Զարուհի Բաթոյանի հրամանով աշխատանքից ազատվել է ՀՀ աշխատանքի եւ սոցիալական հարցերի նախարարության ենթակայությամբ գործող Սոցիալական ապահովության ծառայության պետի տեղակալ Արսեն Օհանյանը։ Այս ազատումն ուշագրավ է՝ հաշվի առնելով Արսեն Օհանյանի <<սորոսական>> ծագումնաբանությունը: Տեւական շրջան է լրատվամիջոցներն անդրադառնում են աշխատանքի եւ սոցիալական հարցերի նախարարությունում տիրող իրավիճակին:
Օրերս դեռեւս պաշտոնյա Արսեն Օհանյանը Ֆեյսբուքով հայտարարեց, թե պետական համակարգում ներքին լարվածություն կա:
Մասնավորապես, լարվածություն կար ծառայության պետ Սուրեն Ղամբարյանի և նրա տեղակալ Արսեն Օհանյանի, ինչպես նաև ծառայության գլխավոր քարտուղար Վանիկ Բաբաջանյանի հարաբերություններում։ Վերջիններս սոցիալական ցանցերում պարբերաբար գրառումներ էին անում, որ Սուրեն Ղամբարյանը ծառայությունում անառողջ մթնոլորտ է ստեղծում։ Սուրեն Ղամբարյանը, սակայն, հրաժարվում էր մեկնաբանել իրավիճակը։ Կառույցում առկա խնդիրներին տեղյակ էր նաև Աշխատանքի և սոցիալական հարցերի նախարար Զարուհի Բաթոյանը։ Նա կառավարության անցած նիստին խոստովանեց, որ խնդիրը լուծում կստանա կողմերից մեկի աշխատանքից ազատմամբ։ Այդպես էլ եղավ: Սոցապծառայության պետ Սուրեն Ղամբարյանն «Իմ քայլը» խմբակցության պատգամավոր Հայկ Սարգսյանի ընկերն է։
Իսկ Արսեն Օհանյանը հայտնի սորոսական է, Քաղաքացու որոշում կուսակցության անդամ, Զարուհի Բաթոյանի մտերիմը: Սեպտեմբերի 4-ին սոցապնախարարության սոցապծառայության պետի տեղակալ էր նշանակվել, սակայն 2014 թվականից հետախուզվում է Ռուսաստանի Դաշնության Քրեական օրենսգրքի 158 հոդվածի առաջին մասի հատկանիշներով, այն է՝ գողության հոդվածով։ 2015-ին ՀՀ իրավապահ մարմինները նրան ձերբակալեցին, սակայն նրա նկատմամբ որպես խափանման միջոց ընտրվեց ստորագրությամբ հանրապետությունից չբացակայելը: Նշանակման առաջին իսկ օրերից մամուլը գրում էր, որ սույն պաշտոնյան կոմպետենտ չէ, չի տիրապետում համակարգը, պարզապես հեղափոխության օրերին աննախադեպ ակտիվ է եղել: Ինչեւէ, Օհանյանի պաշտոնանկությունը ուշագրավ է այն առումով, քանի որ որոշումն այդ, թե ումից ազատվել, անկասկած, կայացել է Նիկոլ Փաշինյանի կաբինետում: Այն ավելի հետաքրքրական է դառնում, երբ դիտարկում ենք պաշտոնանկության ժամանակը: Ըստ էության ամսից ավել խմորումներ են ընթանում, որոնք դուրս են եկել նախարարության տիրույթից, բայց Օհանյանից ազատվելու որոշումը կայացվում է ներկայումս: Միթե այն պայմանավորված է Արեւմուտքի գնահատականներով, որոնք հնչեցին իշխանությունների՝ դատաիրավական բարեփոխումների վերաբերյալ, թե Նիկոլ Փաշինյանը իր ոճին հավատարիմ մեկ Սորոսին է հաճոյանում, մեկ Ռուսաստանին, արդյունքում նա չի կարողանում վստահելի գործընկեր գտնել:

Անի Սահակյան