Աննախադեպ քայլ.30 մլն-ական դրամ փոխհատուցում` Մարտի 1-ի զոհերի հարազատներին

Կառավարությունը նախատեսում է 2008 թվականի Մարտի 1-ի իրադարձությունների ժամանակ զոհվածների հարազատներին և տուժածներին դրամական փոխհատուցում տալ: Համապատասխան նախագիծն ընդգրկված է հունիսի 18-ի կառավարության նիտի օրակարգում:
Աջակցությունը տրամադրվելու է միանվագ դրամական օգնության ձևով՝ հետևյալ չափերով՝
1) ստացած վնասվածքի պատճառով զոհված (մահացած) անձի` Հայաստանի Հանրապետության քրեական դատավարության օրենսգրքով նախատեսված կարգով իրավահաջորդի կարգավիճակ ունեցող անձին՝ 30.000.000 ՀՀ դրամ,
2) առողջությանը ծանր վնաս հասցված անձին՝ 15.000.000ՀՀ դրամ,
3) առողջությանը միջին ծանրության վնաս հասցված անձին՝ 5.000.000ՀՀ դրամ:
Սահմանված է հատուկ կարգ և փաստաթղթերի հատուկ ցանկ, որոնք պետք է ներկայացնել արդարադատության նախարարություն` դրամական փոխհատուցումը ստանալու համար:
Աջակցության տրամադրման համար ներկայացվող դիմումին կցվում են՝
1)դիմումատուի անձը հաստատող փաստաթղթի պատճենը (ներկայացուցչի կողմից դիմում ներկայացվելու դեպքում՝ ներկայացվում է լիազորողի անձը հաստատող փաստաթղթի բնօրինակը և ներկայացուցչի անձը հաստատող փաստաթղթի պատճենը, ինչպես նաև ներկայացուցչի կարգավիճակը հավաստող փաստաթուղթը),
2) իրավահաջորդի կողմից դիմում ներկայացվելու դեպքում՝ նաև Հայաստանի Հանրապետության քրեական դատավարության օրենսգրքով նախատեսված կարգով իրավահաջորդի կարգավիճակը հաստատող փաստաթուղթը, ինչպես նաև իրավասու մարմնի կողմից տրված փաստաթուղթ, որով հավաստվում է զոհված (մահացած) անձի մահվան պատճառական կապը՝ 2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ ստացած վնասվածքի հետ(առկայության դեպքում),իսկ
3) առողջությանը ծանր կամ միջին ծանրության վնաս հասցված լինելու հանգամանքով պայմանավորված աջակցություն ստանալու նպատակով դիմում ներկայացվելու դեպքում՝ նաև առողջությանը հասցված վնասի բնույթը և ծանրության աստիճանը հաստատող դատաբժշկական փորձագետի եզրակացությունը, ինչպես նաև իրավասու մարմնի կողմից տրված փաստաթուղթ, որով հավաստվում է առողջությանը պատճառված վնասի պատճառական կապը՝ 2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ ստացած վնասվածքի հետ(առկայության դեպքում),
4)դիմումատուի ցանկությամբ՝ այլ փաստաթղթեր:
Դրամական հատուցումը տրվելու է պետական բյուջեի միջոցների հաշվին:

Հայկ Դավթյան