Ի՞նչ է մտածում մերոնց ծրագրերի մասին Պուտինը

Աշխատանքային այցով Միացյալ Նահանգներում գտնվող Ազգային ժողովի նախագահ Արարատ Միրզոյանը Atlantic Council կենտրոնում իր ելույթի ընթացքում հայտարարել է, թե Հայաստանը չի կարող հրաժարվել պատժամիջոցների տակ հայտնված Իրանից գազ գնելուց։

«Ամերիկյան գործընկերներին տեղեկացրեցի, որ մեր տնտեսությունը վնասներ է կրում Իրանի դեմ պատժամիջոցներից, և որ մենք չենք կարող հրաժարվել Իրանից գազ գնելուց», - ֆեյսբուքյան իր էջում գրել է Հայաստանի Ազգային ժողովի նախագահը։
Հիշեցնենք, որ անցյալ շաբաթ Հայաստանի փոխվարչապետ Մհեր Գրիգորյանը հայտարարել էր, թե Երևանը Թեհրանի հետ բանակցություններ է վարում սպառման համար գազ ձեռք բերելու նպատակով:

Իսկ ավելի վաղ՝ փոխվարչապետ Մհեր Գրիգորյանի հետ հանդիպումից հետո է Իրանի էներգետիկայի նախարար Ռեզա Արդաքանյանը իրանական «Մեհր» լրատվական գործակալության հետ զրույցում հայտարարեց. «Իրանական գազի արտահանումը Հայաստան կարող է աճել, ներկայում բազմակողմանի բանակցություններ են ընթանում «սվոպ» տարբերակով՝ ապրանքների դիմաց գազի առաքում սկսելու համար»:

Միացյալ Նահանգների նախագահ Դոնալդ Թրամփը, անցյալ տարի Վաշինգտոնը դուրս բերելով Իրանի և վեց գերտերությունների միջև կնքված միջուկային համաձայնագրից, վերականգնել է այդ երկրի նկատմամբ տնտեսական պատժամիջոցները, նաև սպառնալով պատժել այն երկրներին, որոնք կշարունակեն Իրանի հետ տնտեսական կապեր ունենալ:
Հիմա այս իրավիճակում Հայաստանն ու Իրանը փաստորեն բանակցությունների նոր թեմա ունեն: Ավելին՝ ՀՀ Ազգային ժողովի նախագահի մակարդակով ոչ ավել, ոչ պակաս Միացյալ Նահանգներում հայտարարվել է, որ Հայաստանը չի կարող հրաժարվել պատժամիջոցների տակ հայտնված Իրանից գազ գնելուց։

Սա նշանակում է, որ իրանական գազի շուրջ բանակցությունների առումով՝ պաշտոնական Երեւանը կոնկրետ հույսեր է տածում:

Միացյալ Նահանգներում պաշտոնական Երեւանի կողմից նման արձանագրումը միանգամայն հասկանալի է: Իսկ ի՞նչ կարծիքի ունեն այս հարցով Ռուսաստանում...
Սա ՀՀ իշխանությունները հաշվե՞լ են...

Մետաքսյա Շալունց