Հանուն Աննա Հակոբյանի հարցազրույցի Չեխիա-Ֆրանսիա խաղի ուղիղ եթերը չեղարկվել է

Քաղաքացիներից մեկը ֆեյսբուքյան էջի գրառմամաբ իր դժգոհությունն է հայտնել Հանրային հեռուսատընկերության եթերացանկով սահմանված ժամային խախտման վերաբերյալ: Նա մասնավորապես գրել է.

«Սպասում էինք Չեխիա-Ֆրանսիա խաղին: ՈՒԵՖԱ-ի 19 տարեկանների եզրափակիչն ա` Երևանում: Հ1-ը պիտի ցույց տար` եթերացանկում էլ կա: Տեղը երկու ժամ ա` մինչև 22:20 Նիկոլի կնիկն էր խոսում: Պետրոսն էլ, խասյաթի համաձայն, ինչքան կարում, տեղավորվում էր Աննայի փափուկ տեղում: Զանգեցի ստադիոն` ընկերներիս, ասում են` Հ1-ի տեսախցիկներն ու անձնակազմն բոլորը այնտեղ են, նկարում են, տեսախցիկների վրա էլ վառվում է` ուղիղ եթեր»,- գրել է նա:

Այս կապակցությամբ Politik.am-ը փորձեց մեկնաբանություն ստանալ Հանրային հեռուսատընկերության ծրագրերի բաժնից, որի աշխատակիցը մեզ վստաահեցրեց, որ Չեխիա-Ֆրանսիա խաղը ցուցադրել են 22:00-ին, ինչպես որ նախատեսված էր եթերացանակով. «Թեև խաղը սկսել է 21:00-ին, բայց այն հեռարձակել ենք մեկ ժամ անց»,- ասաց նա:

Ասվածը փաստում են նաև Հ1-ի պաշտոնական էջում առկա տվյալները. 21:00-ին նախատեսված է «Լուրեր 60 րոպե. գլխավոր թողարկումը», մեկ ժամ անց՝ 22:00-ին «ՈՒԵՖԱ Ս-19 Եվրոպայի առաջնության եզրափակիչ փուլ.Չեխիա-Ֆրանսիա» խաղը:

Սակայն խնդիրը նրանումն է, որ ուղիղ 21:00-ին հեռարձակված լուրերի թողարկումը, որի մի մասը կազմում է Պետրոս Ղազարյանի և Աննա Հակոբյանի զրույցը, տևել է 1 ժամ 20 րոպե: Հետևաբար թողարկումը ավարտվել է 22:20-ին, իսկ ֆուտբոլային խաղը եթեր գնացել 20 րոպե ուշացումով: Թողարկման տեսանյութը տեղադրված է նաև Հ1-ի Ֆեյսբուքյան էջում:

Ֆուտբոլի հեռարձակման ժամի խախտման վերաբերյալ քիչ առաջ հայտարարություն տարածեց նաև «Մեդիա Պաշտպանը».«Ֆուտբոլային խաղի ուղիղ հեռարձակման իրավունքի համար ծախսվել են հանրային ֆինանսներ, խաղի հեռարձակմանը սպասում էին ֆուտբոլասերները, որոնք իրենց խաբված զգացին։ Մյուս կողմից, Աննա Հակոբյանի հարցազրույցում խիստ հրատապ հարց չքննարկվեց, որի համար ակնհայտ նպատակահարմար լիներ խախտել Հ1 –ի հեռարձակման ցանցը։ Իրավիճակն ավելի շատ նման էր իշխանությունների կողմից հանրային ռեսուրսները կամայականորեն օգտագործելուն։

Կոչ ենք անում Հանրային հեռուստաընկերության պատասխանատուներին հեռու մնալ քաղաքական կոռուպցիայի նման դրսեւորումներից, հանրային միջոցներով աշխատող հեռուստաալիքի առաջնահերթություն պետք է ընտրել հանրային շահը և կանխատեսելիությունը»,- նշվում է հայտարարության մեջ:

politik.am