Նիկոլ Փաշինյանն ամեն ինչ վերցնում է իր ձեռքը, նա իր «կոստյումն» է ձեւում

«Մարդու իրավունքների եվրոպական դատարանում Հայաստանի Հանրապետության ներկայացուցչի մասին» և կից ներկայացված օրենքի նախագծերի փաթեթի քննարկումը Ազգային ժողովում թեժ կրքեր բորբոքեց։ Նախագծով առաջարկվում է վարչապետի աշխատակազմում ստեղծել ՄԻԵԴ-ում լիազոր ներկայացուցչի վարչական պաշտոն և նրան աջակցող գրասենյակ։ Մինչ այդ ՄԻԵԴ-ում Հայաստանի ներկայացուցչին ներկայացնում էր արդարադատության նախարարությունը, բայց նոր իշխանությանը, ըստ երեւույթին՝ Նիկոլ Փաշինյանին դուր է եկել «սուպերվարչապետական» կոստյումը՝ կարված Սերժ Սարգսյանի հագով, հիմա նո որոշել է այն ավելի կատարելագործել եւ իր ձեռքում վերցնել նաեւ այս լիազորությունը։ Նախագծի նախնական տարբերակով պաշտոնի չափորոշիչներ ին սահմանել հետեւյալները՝Հայաստանի ներկայացուցիչ է նշանակվում վարչապետի կողմից՝ 25 տարին լրացած, բարձրագույն իրավաբանական կրթություն ունեցող, ինչպես նաև մարդու իրավունքների վերաբերյալ Հայաստանի Հանրապետության օրենսդրությանը, միջազգային ակտերին, հայերենին և անգլերենին կամ ֆրանսերենին տիրապետող անձը: Սակայն ԲՀԿ-ն պետաիրավական հանձնաժողովում քննարկման ժամանակ առարկել էր ստաժի հարցը՝ առաջարկելով, որ ՄԻԵԴ-ում Հայաստանի ներկայացուցիչը լինի 30 տարին լրացած անձ և պարտադիր ունենա ստաժ: Առաջարկն ընդունվել է
Հիմնական զեկուցող, արդարադատության փոխնախարար Արտակ Ասատրյանը ներկայացրեց օրենքի անհրաժեշտությունը և ասաց, որ այս պահին բավարար հստակությամբ ամրագրված չեն լիազոր ներկայացուցչի և նախարարության համապատասխան ստորաբաժանման հետ կապված շփումները, և խնդիրներ են առաջանում։
Ըստ նրա՝ եղածը աղքատիկ կարգավորումներ են պարունակում ու դրանով է բացատրվում այն վարչապետի աշխատակազմ տանելու փաստը։ «Ահա այս անհրաժեշտությունից ելնելով՝ առաջարկում ենք վարչապետի աշխատակազմում ստեղծել համապատասխան վարչական պաշտոն լիազոր ներկայացուցչի մասով և վերջինիս աջակցող գրասենյակ օրենքով նախատեսված լիազորությունների իրականացմանը օժանդակելու համար»,-ասաց նա։ ԲՀԿ-ն կողմ էր նախագծին, քանի որ ընդունվել էին իր առաջարկները։ Այդ մասին պատգամավոր Արման Աբովյանը հայտարարեց իր ելույթում․«ՀՀ ներկայացուցիչը պարտադիր պիտի ունենա նվազագույն ստաժ: Պետք է հասկանա՝ ուր է գնում, որովհետև 25 տարեկան նոր ավարտած ուսանողին էլ կարելի է նշանակել: Անպայման պետք են կանոններ, և դրանց շրջանակում գործել: Տրամաբանական է, որ 25 տարեկան երիտասարդը ֆիզիկապես էլ ստաժ չի կարող ունենալ և պիտի նվազագույնը ավարտի բուհ: 30-ը մենք սահմանել ենք նվազագույն շեմը, և կարծում եմ, որ դա ճիշտ որոշում էր»
Փոխարենը ԼՀԿ-ն իսկական «բոլոլա» սարքեց, Էդմոն Մարուքյանը հայտարարեց, որ այս օրենքի ընդունումը լավ օրինակ է՝ ցույց տալու, որ ոչինչ չի փոխվել։ Պատգամավորը հեգնեց. «Առաջակում եմ ԴԱՀԿ-ն հանել Արդարադատության նախարարության կազմից և մտցնել վարչապետի աշխատակազմ, մեկ է, ԴԱՀԿ պետին նշանակում է վարչապետը, առաջարկում եմ ՔԿՀ-ն հանել ԱՆ-ից և մտցնել վարչապետի աշխատակազմ, մեկ է, արդարադատության նախարարը չի նշանակում ՔՀԿ պետին։ Առաջարկում եմ սահմանադրական փոփոխություն անել և Գլխավոր դատախազությունը լուծարել և մտցնել պետական շահերի պաշտպանություն վարչապետի աշխատակազմի մեջ, առաջարկում եմ լուծարել բոլոր նախարարությունները, բաժիններ լինեն վարչապետի աշխատակազմում, դատարանները, լինի խորհրդարան ու վարչապետ, կամ էլ ցրենք խորհրդարանը, ու մենակ վարչապետ լինի»,-ասաց նա։
Նա նկատեց նաև, որ ժամանակին խոսում էին ինստիտուցիոնալ փոփոխություններից. «Էս ո՞ւր ենք գնում, բա դուք էիք ասում ինստիտուցիոնալ, բա ի՞նչ եղավ, ո՞ւր է»։ Թե Նիկոլ Փաշինյանի ինչին է պետք գնալ նման քայլերի, հատկապես, որ ցանկացած հարց ինքն է որոշում, առանց իր «դաբրոյի» նախարարներն անգամ արձակուրդ չեն գնում, կարելի է ենթադրել։ Նա ցույց է տալիս, որ ՄԻԵԴ-ում իր իշխանության դեմ ներկայացրած ցանկացած հայց իր անմիջական վերահսկողության տակ է լինելու։

Անի Սահակյան