Նիկոլ Փաշինյանի անհաղթահարելի բարդույթը

Երրորդ հանրապետության պատմության մեջ թերեւս առաջին անգամ Հայաստանում կարեւորագույն տոներից մեկը՝ Սահմանադրության հռչակման օրը պետական մակարդակով չնշվեց: Հասկանալի պատճառներով իշխանությունների թիրախում հայտնված Սահմանադրական դատարանում ամենամյա միջոցառում չկազմակերպվեց, եւ ՍԴ անդամները գտան այլընտրանք, այցելեցին Գոշավանք: Իսկ բարձագույն պաշտոնյաները՝ ՀՀ վարչապետն ու Սահմանադրության երաշխավոր ՀՀ նախագահը նախընտրեցին շրջագայությունը:
Մամուլի տեղեկություններով՝ Նիկոլ Փաշինյանի Վիետնամ այցը չնախատեսված էր եղել, հապշտապ ու հանպատրաստից, թերեւս Նիկոլ Փաշինյանը անհաղթահարելի կոմպլեքս ունի Սահմանադրության ընդունման օրը տոն դարձնելու, այն նշելու համար: Քանի որ թավշյա հեղափոխությամբ իշխանության տանող ճանապարհը հեռու էր սահմանադրականից, Նիկոլ Փաշինյանն իշխանության հասավ ճնշման եւ տեռորի միջոցով, երբեմն էլ Սահմանադրության նոնսենս իրավճակներում եւ մեկնաբանությամբ: Այս կոմպլեքսներ արտահայտվեցին նաեւ Փաշինյանի՝ օրվա առթիվ տարածված ուղերձում. «Նախորդ տարի մեր երկրում տեղի ունեցած իրադարձությունները, որոնք իրենց բնույթով լիարժեք համապատասխանում էին Սահմանադրության տառին և ոգուն, եւս մեկ անգամ ապացուցում են, որ մեր քայլերը միտված են իրավունքի եւ օրենքի գերակայության ապահովմանն ու ամրապնդմանը»: Նիկոլ Փաշինյանը երեւի նկատի ունի, որ իրենց հեղափոխությունը համապատասխանում է նաեւ Սահմանադրության այս հոդվածի հոգուն ու տառին. «ժողովուրդն իր իշխանությունն իրականացնում է ազատ ընտրությունների, հանրաքվեների, ինչպես նաև Սահմանադրությամբ նախատեuված պետական եւ տեղական ինքնակառավարման մարմինների ու պաշտոնատար անձանց միջոցով», եւ «իշխանության յուրացումը որեւէ կազմակերպության կամ անհատի կողմից հանցագործություն է , եւ ինքը չէր, որ խոհրդարանական ընտրություններին հասավ ԱԺ շենքը պաշարելով, ճնշելով ու շանտաժով:
Իսկ այդ ամենից հետո գալ եւ նշել Սահմանադրության օրը, համաձայնեք, բարդույթները հաղթահարել էր պետք: Արմեն Սարգսյանը նույնպես հետաքրքիր նշանավորեց օրը: Բառացիորեն մի քանի օր առաջ Նիկոլ Փաշինյանը փորձեց ոտնահարել սահմանադրորեն նախագահին վերապահված լիազորությունները, եւ ֆեյսբուքյան իր էջում որպես կատարված փաստ տեղեկացրեց ուժային կառույցներըի ներկայացուցիչներին գեներալի կոչումով պարգեւատրումը: Արմեն Սարգսյանը Սահմանադրության տոնին այդ պաշտոնյաներին ու զինվորականներին հանձնեց իրենց կոչումները, ապա երկօրյա այցով ուղեւորվեց Սյունիք:
Ստացվում է, որ մինչ իշխանությունը պետական որոշ մարմիններում ճգնաժամ է կանխատեսում, պազվում է՝ իշխանության բարձրաստիճան այրերի մոտ է սահմանադական ճգնաժամ, բարդույթ, որը հաղթահարելն անհնար է դառնում:

Անի Սահակյան