Նիկոլն ասել է՝ չգնդակահարել. բոլշևիկներ շեն մնան
Արդարադատության նախարարությունը տարածել է ուշագրավ մի իրազեկում, որը վերաբերում է ապօրինի ծագում ունեցող գույքի բռնագանձման ինստիտուտի ներդրմանը: Նախարարությունը հարկ է համարում իրազեկել, որ ապօրինի ծագում ունեցող գույքի բռնագանձման ինստիտուտի ներդրումը բխում է Հայաստանի Հանրապետության վավերացրած մի շարք միջազգային կոնվենցիաներից.
<<Ապօրինի ծագում ունեցող գույքի բռնագանձման ինստիտուտի ներդրումը պայմանավորված է միջազգային բնույթի և կոռուպցիոն հանցավորության դեմ պայքարն արդունավետ իրականացնելու անհրաժեշտությամբ: Այս ինստիտուտը ներդրվում է ապօրինի ծագում ունեցող գույքն օրինական տնտեսական շրջանառությունից հանելու և այն օրինական սեփականատերերին վերադարձնելու, իսկ վերջիններիս բացակայության կամ հայտնի չլինելու դեպքում՝ հօգուտ պետության բռնագանձելու նպատակով: Այս առումով կարևոր է այն հանգամանքը, որ ապօրինի ծագում ունեցող գույքի բռնագանձումը ոչ մի պարագայում չի հետապնդում անձի մեղավորությունը ապացուցելու և նրա նկատմամբ քրեաիրավական ներգործության միջոց կիրառելու նպատակ, չունի քրեաիրավական հետևանքներ և քրեական գործի քննության վրա չի կարող ազդել: Այս ինստիտուտն ուղղված է գույքի դեմ և ոչ թե՝ անձի>>,- նշվում է հաղորդագրության մեջ:
Նկատենք, որ այս մոտեցումը հակասում է ՀՀ սահմանադրության 10-րդ հոդվածով ամրագրված սեփականության իրավունքի պաշտպանությանը և հետագայում կարող է հիմք հանդիսանալ Մարդու իրավունքների եվրոպական դատարանում ընդդեմ Հայաստանի դատական ակտերի ներկայացման և պետության պարտության, որովհետև խոշոր սեփականատերերի <<թղթերը մաքուր են>>, բացի այդ՝ նրանցից ոմանք արդեն հասցրել են լավ հարաբերություններ ստեղծել նոր իշխանությունների հետ: Հետևաբար այս գործընթացից կարող են տուժել առավելապես միջին խավի մարդիկ:
Ինչ վերաբերում է միջազգային պարտավորություններին, որոնց մասին նշվում է արդարադատության նախարարության տարածած իրազեկման մեջ, ապա դրանք բացառապես վերաբերում են փողերի լվացման, թրաֆիքինգի, միջազգային ահաբեկչության, թմրամիջոցների միջազգային շրջանառության և այլ միջազգային բնույթի հանցագործությունների բացահայտմանն ու կանխարգելմանը և այս իմաստով չեն կարող հիմք հանդիսանալ կուլակաթափման համար: Ստացվում է, որ Հայաստանում պետական ինստիտուտը բացահայտ ասում է, որ երկրում մեկնարկելու է բոլշևիկյան ժամանակներից պատմությանը հայտնի կուլակաթափության գործընթաց: Ի տարբերություն բոլշևիկների՝ Նիկոլի հեղափոխության ժամանակ, սակայն, մարդկանց բանտ չեն նստեցնի, չեն գնդակահարի, ընդամենն առանց դատարանի որոշման կվերցնեն ունեցվածքը և այն կտան, այսպես կոչված, օրինական սեփականատիրոջը: Իսկ եթե այդ օրինական սեփականատերը չգտնվի, ուրեմն գույքը կպետականացվի: Ինչպես, ով կամ ովքեր են որոշելու գույքի անօրինական ծագման փաստը, ինչպես, ինչ չափանիշով են որոշելու գույքի իրական սեփականատիրոջը՝ պարզ չէ: Եթե դատական գործընթաց տեղի չի ունենալու, կնշանակի մենք գործ ենք ունենալու յուրօրինակ ժողովրդական տրիբունաների հետ: Օրինակ՝ մի խումբ մարդիկ կարող են հավաքվել որևէ անձի պատկանող տան, գործարանի, խանութի կամ կրպակի մոտ՝ վանկարկելով դրա անօրինականության մասին և պահանջելով, որ այն վերադարձվի իրական տիրոջը: Իսկ հետո արդեն հեղափոխական իշխանության բարեհաճությունը վայելող մի խումբ պատկառելիներ կորոշեն, թե ով է այդ տերը՝ պետությունը, թե որևէ անհատ: Գույքը հանցավոր ճանապարհով ձեռք բերված լինելու հանգամանքը պետք է հաստատված լինի օրինական ուժի մեջ մտած մեղադրական դատավճռով, հակառակ պարագայում, ինչ անուն էլ որ դրան տրվի, այն լինելու է ունեզրկում և կապիտալի բռնազավթում:
Հայկ Դավթյան
Հետևեք մեզ Viber-ում
