Բատկան Նիկոլ Փաշինյանին ինչ-որ բան է ասել Ծառուկյանի մասին

ՀՀ վարչապետի աշխատակազմից տեղեկացնում են, որ վարչապետ Նիկոլ Փաշինյանը հեռախոսազրույց է ունեցել Բելառուսի նախագահ Ալեքսանդր Լուկաշենկոյի հետ:

Վարչապետ Նիկոլ Փաշինյանը Ալեքսանդր Լուկաշենկոյին շնորհավորել է Եվրոպական երկրորդ խաղերը մեծ հաջողությամբ անցկացնելու կապակցությամբ և ուրախությամբ նշել այդ մրցումներում հայ մարզիկների բարձր արդյունքներով մասնակցելու փաստը: Վարչապետը նաև շնորհավորել է Բելառուսի ազգային տոնի կապակցությամբ և այդ առիթով լավագույն մաղթանքներ հղել բարեկամ բելառուս ժողովրդին»,- ասված է հաղորդագրությունում:

Հեռախոսազրույցի ընթացքում քննարկվել են Եվրասիական տնտեսական միության շրջանակում համագործակցության և մասնավորապես Երևանում այս տարվա հոկտեմբերի 1-ին կայանալիք ԵԱՏՄ գագաթնաժողովի անցկացման հետ կապված հարցեր: Շոշափվել են նաև ԵԱՏՄ արտաքին կապերի ընդլայնման հետ կապված մի շարք հարցեր, այդ թվում՝ ԵԱՏՄ և Սինգապուրի միջև ազատ առևտրի մասին պայմանագրի ստորագրման հեռանկարները:

Լուկաշենկոյի հետ կապված` սա միակ նորությունը չէ: Դեռ 2 օր առաջ` Մինսկում գտնվող ՀՀ նախագահ Արմեն Սարգսյանի հետ հանդիպման ժամանակ, Բելառուսի նախագահ Ալեքսանդր Լուկաշենկոն ասել է, որ պատրաստ են ընդլայնել Հայաստանի հետ ապրանքաշրջանառության ծավալները։ «Այսօր մենք թեպետ մեծ ապրանքաշրջանառություն չունենք, սակայն տարեկան $50 մլն-ը վատ դինամիկա չէ, եթե այն համեմատենք նախկին ցուցանիշների հետ: Մենք շատ ջերմ հարաբերություններ ունենք Հայաստանի շատ ներկայացուցիչների հետ: Դուք գիտեք Հայաստանում իմ ընկերներին, ովքեր ներդրումներ են իրականացնում Բելառուսում, եւ ես շատ շնորհակալ եմ դրա համար»,- ասել է նա։

«Ես ունեմ մի կանոն՝ ընկերությունն ընկերություն, սակայն պետությունն առանձին է: Եվ երբ ինձ դիմեցին ինչ-ինչ ապրանքների մատակարարման հարցով, ես ասացի, որ սկզբունքը հետեւյալն է՝ գալիս եք Բելառուս, սկսում եք արտադրություն, ստեղծում եք աշխատատեղեր, ներդրումներ եք անում, խնդրեմ… Գագիկ Ծառուկյանի ընկերությունը հաջողակ ձեռնարկություն է»,- հավելել է Ալեքսանդր Լուկաշենկոն։ Նա նշել է, որ հայ-բելառուսական առեւտրի տան աշխատանքների միջոցով է իրականացվում Բելառուսի եւ Հայաստանի միջեւ ապրանքաշրջանառության 30-40%-ը: Առևտրի տունը, ինչպես հայտնի է, պատկանում է Ծառուկյանին, ում մասին փաստորեն Բատկան դրվատանքով է խոսել: 

Հետաքրիքր է` Բատկան Ծառուկյանի մասին Փաշինյանի հետ զրույցում ևս նույնն բանն ասել է, թե` ոչ: Եթե անգամ չի ասել, թերևս Արմեն Սարգսյանի հետ զրույցի մանրամասները պետք է որ փոխանցված լինեին վարչապետին: Լուկաշենկոն շատ պարզ ասել է` Ծառուկյանի ընկերությունը հաջողված օրինակ է: Ասել է թե` Ծառուկյանն ընկերություն հիմնել ու հաջողությամբ գործ անել գիտի: Մի բան, որ Փաշինյանի նոր կառավարության մոտ դեռևս ոչ մի կերպ չի ստացվում: Ասել կուզի` եթե ԵԱՏՄ-ում կապերը ընդլայնել ես ուզում` Ծառուկյանին կոնսուլտանտ վերցրո'ւ, Նիկոլ Վովայիչ: ԵԱՏՄ երկրորդ հզոր խաղացող Բատկան նրա ընկերն է, Երևան ժամանելիս էլ նրա տանն է հյուրընկալվում, համ էլ Բելառուսի հետ ապրանքաշրջանառության 40 տոկոսի տերն է:

Հայկ Դավթյան