Դատարանի անգնահատելի մարդասիրությունը

Նիկոլ Փաշինյանի անկախ դատարանը հերթական անգամ արիաբար մերժեց Ազգային ժողովի նախկին պատգամավոր Մանվել Գրիգորյանի պաշտպան Լևոն Բաղդասարյանի միջնորդությունները: Բաղդասարյանը միջնորդել էր վերացնել իր պաշտպանյալի խափանման միջոց կալանավորումը, իսկ եթե դատարանը վճռի, որ կալանքի հիմքեր կան, ապա կիրառել այլընտրանքային խափանման միջոց գրավ՝ մինչև 10 մլն դրամի չափով:

Փաստաբանը թվարկեց Գրիգորյանի բազմաթիվ հիվանդությունները, ասելով, որ նման պարագայում անձին կալանքի տակ պահելը խոշտանգում է, և որ մեկ տարվա ընթացքում Գրիգորյանի առողջական վիճակը վատթարացել է։ «Եթե նախկինում դրսի բժիշկներն էին բարձրաձայնում, որ հիվանդության վատթարացում է գնում, կյանքին վտանգ է սպառնում, բայց տեղացի բժշկական կենտրոնները արձանագրում էին, որ քաղաքացիական հիվանդանոցում հնարավոր է կոնպենսացնել անձի այդ հիվանդությունները, այժմ վերջիններս բարձրաձայնում են հիվանդության վատթարացման հետ կապված: Դա նշանակում է, որ նման պայմաններում անձին պահելը կալանքի տակ ուղղակի դասական խոշտանգում է: Միանշանակ դա կբարձրաձայնվի և կուղարկվի Մարդու իրավունքների եվրոպական դատարան»: Սակայն դատարանը ավելի քան լկտիություն դրսեւորեց՝ հակադարձելով, որ եթե Գրիգորյանի վիճակն այդքան օրհասկան լիներ, ապա նա դատարան չէր ներկայանա:

Հետեւելով նոր Հայաստանի դատավարական ֆարսերին՝ հատկապես Քոչարյանի ու գեներալ Գրիգորյանի գործերի շրջանակում, կարող ենք ասել, որ երկու դեպքում էլ դատավորների ընտրությունը հատուկ է կատարվում, սա ավելին է, քան դեգեներատեությունը: Մանվել Գրիգորյանը, բնականաբար, շատ մեղքեր է գործել, շատերն են նրա պատճառով հայտնվել ծանր վիճակում, բնական է եւ նորմալ, որ նա այդ ամենի համար պատասխան տա: Բայց միթե սա է արդարադատությունը, այս լուսանկարը ավելի խոսուն է, քան հազարավոր բառեր, միթե մարդուն հրապարակավ խոշտանգելն է Նիկոլ Փաշինյանի իշխանության գերխնդիրը:

Շնչառական ապարատի ուղեկցությամբ մարդուն պահել կալանքի տակ ու ասել, որ եթե վատ լիներ, դատարան չէր ներկայանա, ցինիզմի անսահման հատկանիշ է պետք ունենալ: Կոմայի մեջ ընկածին էլ կարելի է բերել դատարան ու խրախճանք կազմակերպել, եւ ի՞նչ: Իսկ ինչով եք դուք տարբերվում Մանվել Գրիգորյանից, եթե նա հին Հայաստանում է մարդկային կյանքեր խոշտանգել ու ճակատագրեր խեղել, ապա դուք դա անում եք նորում և անունը դնում արդարադատություն: Եթե սա է արդարադատությունը, եթե դա պետք է հաստատել մարդուն գերեզման տանելու ճանապարհով, ապա թող երբեք Հայաստանում արդարադատություն չլինի, քանզի մարդն է գերագույն արժեք, իսկ այսօրվա սիրո եւ համերաշխության իշխանությունը զբաղված է մարդու ոչնչացման գործով:

Այսօրվա դատական նիստը հետաձգվեց Մանվել Գրիգորյանի առողջական վիճակի վատթարացման պատճառով: Նրան տեղափոխեցին հիվանդանոց։
Բայց դատավոր Մարտիրոսյան Մնացականը, այնուամենայնիվ, որոշեց անչափելի մարդասիրություն դրսեւորել եւ բավարարել մեկ այլ միջնորդություն՝ գեներալ Մանվելի հարցով դատաբժշկական փորձաքննություն նշանակելու վերաբերյալ՝ կատարումը հանձնարարելով առողջապահության նախարարության համապատասխան մարմնին։ Անկախ դատավորը շեշտեց, որ փորձաքննությունը պետք է տա այն հարցի պատասխանը, թե ինչ հիվանդություններով է տառապում Մանվել Գրիգորյանը, և առողջական այդ խնդիրները ներառվա՞ծ են պատիժը կրելուն խոչընդոտող հիվանդությունների ցանկում:

Անի Սահակյան